ʼYá kjoanni xi tíbatéxoma sonʼnde

Nʼiojin nkjín chjota xi tojngokjoan én sichjén nga kuitso: Niná. Tonga, ya Biblia nijñajinla kʼoatso tsa je Jesucristo kʼoa tsa je Nʼaile tjíobatéxoma sonʼnde. Je Jesús saʼnda kitso: “Je xi tíbatéxoma sonʼndebi kuichonsjení”. Kʼoa kitsosa: “Nroa je xi batéxoma sonʼndebi. Tonga nijmejin xi tjínle xi tʼatsʼan” (Juan 12:31; 14:30; 16:11).

Kuinga je xi tíbatéxoma sonʼnde kontra tíjnale Jesús. ʼYá xótseni je chjotaxá jebi.

Jme xi chon sonʼnde tsjoá jngoná choa̱

Ninga tjíobʼénele yaole jme xi tjíosʼín je xi nda chjota, tojo nʼio tse kjoañʼai tjíofaʼá je chjota jokji tse tífaʼato nichxin. Kuinga kʼoasʼin kjonangisínile yaole je chjota xi kixi xi tʼatsʼe kjoa jebi, tojo kitso je ʼndíkʼien xi xo̱n periódico kiski xi David Lawrence tsakʼin, kitso: «“Kjoanyʼán katasʼe i̱ tʼanangi”: Me ngatsʼi chjota nga kui mele. Kitsosa: “Kjoanda katasʼele chjota”: Kʼoa me ngatsʼi naxinandá xi tjín sonʼnde nga tjínle jebi xi kao xínkjín. Tonga, jméni xi kjima. Ánni nga kjoajchán tjínsíni ninga tsínkui mele naxinandá».

Likui majinná, tsí mai. Ninga kui mele je chjota nga nyʼán sʼin koatio, me to kjoajticha tjínle kʼoa síkʼien ngañá xínkjín josʼín tsa cho̱toan. Tikjaʼaitsjenlai jokji kjoa xi nʼio chʼaotjín kʼoatjíosʼín je chjota xi tsínle kjoamatokon. Nga síkjaʼá kjoañʼai xínkjín chjota kʼoa nga síkʼien xínkjín síchjén kicha, síchjén ndoyá jña síkjaʼákon xínkjín, síchjén chʼinsá, síchjén bomba kʼoa kao xi kjaʼaisanile.

Jósi ngai ji, a koa̱nle je chjota xi nyʼán mele koatio kʼoa xi nda mele koatio nga tojé kʼoasʼin ngayeje kjoatsʼen jebi. Jmé nganʼioni xosíkao chjota nga kʼoasʼínsíni. A sakʼoa chjonangilai yaoli tsa tjío ʼyani xi tsʼen xi tsín matsen, xi tjínle nganʼio nga bʼénele chjota nga kʼoatjíosʼín kjoatsʼen jebi.

ʼYáni xi tjíobatéxoma sonʼnde

Likui toñá sinkjínle tokoan, nga ya Biblia kʼoatso kixi nga tíjna jngo xi nʼio maña xi tsín matsen xi tíbanentsja je chjota. Je Biblia kʼoatso: “I̱ ngakjijnda sonʼndebi tíjnakao nganʼiole xi chʼao kjoan”. Kʼoa síkʼéjnatsen joʼmi, i̱ tso: «Je Na̱i kao Satanás [...] xi bʼanacha[le] ngatsʼi» (1 Juan 5:19; Apocalipsis 12:9).

Kʼianga «je Na̱i koanmele nga chʼao sikao», nga kiskotʼayakao Jesús, je Jesús likui kʼoakitso tsa tsín je Na̱i xi tíbatéxoma sonʼnde. Je Biblia kʼoatso jmeni xi koan: «Je Na̱i kikao jngo nindo xi nʼio ngʼa, kʼoa tsakakóle ngayije kjoatéxomale (naxinandá) sonʼnde, kao kjoajeyale. Kitsole: Ngayije jebi tsjoale jibi, tsa kuisenxkónyʼintʼanai, kʼoa tsa jchaxkónnai. Kʼia Jesús [ki]tsole: Tʼin, Satanás» (Mateo 4:1, 8-10).

Tikjaʼaitsjenlai jebi. Satanás kiskotʼayakao Jesús nga kitsjoatʼale «ngayije kjoatéxomale (naxinandá) sonʼnde». Tsa tsínlani je kjoaixi Satanás xi tíbatéxomale ngatsʼi naxinandá, a koan kisikʼéjnabasenle Jesús jebi. Maijin. Tikjaʼaitsjenlaije̱ nga Jesús likui kʼoakitso tsa tsín je Satanás kjinentsja ngayeje. Kuinga ¡je kjoaixisíni Satanás je Na̱i xi tíbatéxoma sonʼnde! Je Biblia saʼnda i̱ tso xi tʼatsʼe Nai̱: «je niná xi tsʼe sonʼndebi» (2 Corintios 4:4). Tonga, jókoannile nga kʼoasikji nganʼio kisʼesínile jngo xi kʼoasikji tsʼen joni tsa jé.

Je xi Satanás tsakʼin nga koanskanni, jngoní ánkje xi Niná kisinda kʼoa xi koanxínkonke josʼin tíjna je Niná. Kʼoakitso nga likui nda tíbatéxoma Niná. Kʼoa kuinga jngo ye̱ kisichjénsíni nga tsakjákao kʼoa tsakʼanachale je chjoón xi títjon koannda, xi Eva tsakʼin, kʼoa kʼoakoan josʼin koanmele, kʼianga je Eva kʼoa kao xʼinle xi Adán tsakʼin tosa je kisitjosonle ʼndele nga Niná sitjosonle (Génesis 3:1-6; 2 Corintios 11:3). Kʼoati kitso nga koa̱nle nga sikinyáxinle Niná ngatsʼi ntje̱le Adán kao Eva. Kuinga kiskanichxinsíni Niná nga katabakó Satanás tsa kʼoatjín jme xi kitso, tonga Satanás likui kjimale tíbakó (Job 1:6-12; 2:1-10).

Xi kʼoati tjínle kjoandosin kuinga tsín tojé Satanás tíbatéxoma sonʼnde. Kitjoe kʼale ánkje xi kjaʼai nga ya kitʼale kʼoa tsakatiochjoale Niná. Ánkje jebi ánkjele Satanás koan. Je nchjani Biblia nga kʼoatsole je chjota tjenngile Cristo: «Kuiyotajal[e] kjoamañale je Na̱i. Likui chjota sonʼnde xi njín xi yao tjínle xi kuixkánkoa. Toje [...] xi ngakijnda batéxoma jña njion, xi je ngatsʼi ntjao̱ xi chʼaosʼín xi tsʼe jangʼá» (Efesios 6:11, 12).

Tijnachjoalai nganʼio xi chʼaokjoan

Je ánkje tsʼen xokjoan, ñaki kʼoatjío kon nga kʼoanachale ngatsʼi chjota sonʼnde, nga tsínti Niná katabʼétsʼoanile. Jngo xi síchjén kui kjoafaʼaitsjen xi tso nga xín mangian kʼianga je mʼee, ninga kʼoalani tso kixi énle Niná nga je kʼien nijmejin xi tibeni (Génesis 2:17; 3:19; Ezequiel 18:4; Salmo 146:3, 4; Eclesiastés 9:5, 10). Je xi sʼín kuinga síchjén chjinebʼenda kʼoa tsa maije̱ jngo «jta̱» xi nchja jinsén, jngo ánkje tsʼen koa̱nle kʼoasitso jta̱le jotso tsʼe xi je kʼien kʼoa kjoakao xínkjín kʼoa tsa miyole xi tjíokonsa. Ninga kʼoakjoan tso jta̱je jotso tja̱le xi je kʼame, ¡je xosʼín jngoni ánkjele Na̱i!

Kuinga tsa kʼiani nga kʼoatso «jta̱» xi kuinóʼyai ali bʼaiʼndejin nga kʼoanachali. Chʼasjengi jme xi kuitsoli kʼoa kʼoasi jokitso Jesús: «Tʼin Satanás» (Mateo 4:10; Santiago 4:7). Li bʼaiʼndejin tsa tokui nga mesali jchai xi tʼatsʼe nganʼio xi chʼao kjoan nga ya kuinójinni yaoli. Jebi kjoabʼenda ʼmi kʼoa Niná kʼoatsole chjota xi je bexkón nga tsín ya katatsjonjin yaole jokji koya kjoabʼenda tjín. Je Biblia kʼoatso nga chʼaosʼín toʼyani xi «kui síchjén xi tongini kʼoatso jme xi koa̱n», je xi «chjinebʼenda fikonle kʼoa tsa je fikonle xi tongini kʼoatso jmeni xi koa̱n» kʼoa tsa je «xi kʼien fakao» (Deuteronomio 18:10-12; Gálatas 5:19-21; Apocalipsis 21:8).

Nga kʼoasʼin je Na̱i bánentsja chjota xi kjoabʼenda tsjonjin yaole, likuijin kʼoanʼiai, likuijin ʼmini ninga naskánatjín koa̱nli. Kui kʼa jebi kjoabʼenda xi tjín: xi xo̱n baraja kotʼa, xi najmé xki̱bá, xi xitjo kjoé, xi xo̱nnisé kotʼani yaole kʼoa kao xi horóscopo ʼmi. Kʼoati ya ndʼia jña batio je ánkje tsʼen jebi sakʼoa tjín xi fane kʼoa tsa jmesa xi ma.

Xi ijngosani, je ánkje tsʼen xokjoan toya tjen tsjoale nga jée kichʼa kʼoa kuinga je síchjénsíni chjota xi xo̱n bʼasje, xi película bʼénda kʼoa kao xi kui bʼénda xi faʼa ya televisión nga ya batíotsen kjoajndí xi tsʼe kjoachajngi. Je ánkje tsʼen jebi bení kʼia tsa tsín kjoaʼaxin jinkjoafaʼaitsjenle chjota xi chʼaotjín, likui tichajinnile kʼoa kui xosíkao nga kjoachajngi tsaojinni, tojo kisʼin ánkje tsʼen xokjoan (Génesis 6:1, 2; 1 Tesalonicenses 4:3-8; Judas 6).

Tsakui nichxin nkjín chjota xi tobijno kʼianga kʼoaʼmile nga je nganʼio xi tsʼen kjinentsja sonʼnde xokji. Tonga, likui tokʼoamaná jebi nga ya Biblia kʼoatso: «Satanás síkʼantjaiya yaole joni tsa jngo ánkje xi síʼisen» (2 Corintios 11:14). Je kjoamaña xi ngisasa síchjén Satanás kuinga tsín katabe je chjota nga tíjna kʼoa nga tjío ánkjele. Tonga li bʼaiʼndejin nga bʼanachali. Je Na̱i kʼoa kao ánkjele tjío kjoaixiní kʼoa tjínneli nga kuijnachjoalai ngantsjai (1 Pedro 5:8, 9).

¡Tsjoamaná nga je machrianle nichxin nga tjóʼaxin je Satanás kʼoa kao je ánkje xi fitjenngile! «Je sonʼndebi [xi ya tjíojin Satanás kʼoa kao ánkje tsʼenle] [kjo]aʼatoní, [...] —tso Biblia,—tonga je xi sítjoson jotso Niná ñaki kʼoasʼin bʼejna ngantsjai» (1 Juan 2:17). Litondajin sʼe tokoan nga je tjóʼaxin je Na̱i kʼoa kao ánkje tsʼenle. Kuinga ya kuiyojinsínile je xi kʼoasʼín jotso Niná ánni nga sʼesíniná kjoabijnachon xi tsínkʼia fetʼa ya sonʼnde chjotsele (Salmo 37:9-11, 29; 2 Pedro 3:13; Apocalipsis 21:3, 4).

Kʼianga kui én faʼaitʼa xi tsʼe Escrituras Hebreoarameas je xo̱n jebi ya kitjoeni je Biblia Traducción del Nuevo Mundo de las Santas Escrituras (con referencias). Kʼoa nga kui faʼaitʼa xi tsʼe Escrituras Griegas Cristianas ya kitjoeni Nuevo testamento en mazateco de Huautla de Jiménez, Oax. Kʼoakisʼe josʼin chji ndʼaibi. ©1992 Watch Tower Bible and Tract Society of Pennsylvania. Derechos reservados.

A mesali jchai

Chjí ya oficinale Testigole Jeoba xi chrian koa̱nli.

[Sén xi faʼaitʼa ya pájina 4]

A koanle Satanás nga kitsjoatʼale Jesús ngayeje naxinandá tsa tsínlani tsʼe