JNGO ÉN XI TJÍNNELE SʼEJINLE NGATSʼI CHJOTA

¡Je machrianle nga tjoʼaxin religión ndiso!

▪ Jméni xi religión ndiso ʼmi

▪ Jósʼin tjoʼaxin

▪ Jókoanni ji nga tjoʼaxin religión ndiso

Jméni xi religión ndiso ʼmi.

A nʼio nikjaojin kʼianga je religión bʼenele chjotale nga katafíjin kjoajchán. A chʼao sʼe tokuin kʼianga jé chjota xi Niná síxále tsole yaole nga tsínni kʼoasʼín xi ndatjín, nga tosani kjoajchán batío, síkʼienni xínkjín kʼoa tsínnile xi kjoatéxoma ʼmi. Ánni nga tʼatsʼesíni religión nga i̱ sikji kjoa tjín. A litsa tongatsʼijin religión nga tjínle jée, xi tjínle jée jení religión ndiso. Nʼio ʼyaxkón Jesucristo xi totʼatsʼe religión xi kisʼele, kʼoa jé kʼoakitso kʼianga je religión ndiso chʼaosʼín chjotale. Joni tsa jngo «yá xi tsín nda» chʼao kjoan to xi bale (Mateo 7:15-17). Jmé to ni xi bale je religión ndiso.

Je religión ndiso

◼ JE RELIGIÓN NDISO YA TSJONJIN YAOLE KJOAJCHÁN KAO KJOA POLÍTICA. Jngo revista kʼoakitso: «Joni tsa ya Asia kʼoa jñasani xín ʼnde, jé chjota xi tjío títjonle religión nga mesale sʼele nganʼio, toyaole fíni nga nda koatio kʼoa kʼoasʼin síchjén kjoafaʼaitsjenle chjota josʼin nga mele». Kʼoa revista jebi kʼoatso, kʼianga kʼoakjima, «jé chjota likui ti beni josʼin» (Asiaweek). Jngo chjota títjonle religión xi nʼio bʼaxki xi ya tsʼe Estados Unidos kʼoakitso: «Kʼianga tsín ʼya xi ti katasíkʼienni xínkjín, tjínnele sikʼien xo sʼín». Kʼoa kʼoakitsosa josʼin sʼendajin kjoa jebi: «Kao jaʼainle Nainá sikjesonñá ngatsʼi xi kʼoasʼin chjota síkʼien». Tonga je Biblia kʼoatso: «Tsa jngo xi kʼoatso: An kjainga tjaoke Niná, tonga chʼaobe ndsʼe, ndisoní» (1 Juan 4:20). Jesús saʼnda kʼoasʼin tsakʼene: «Katamatsjoachao xi jtikeno» (Mateo 5:44). Jótjín religión ʼyai ji xi kʼoasʼin ya síkasénjin kjoajchán chjotale.

◼ JE RELIGIÓN NDISO KJOAʼMIYA NDISO BAKÓYA. Me ngatsʼi religión nga kʼoasʼin bakóya kʼianga espíritu tjínná kʼoa nga bʼejnakon kʼianga je mʼe. Nʼio nkjín religión xi kʼoasʼin bakóya nga tokui xi sʼínnile nga taon bʼasjetʼale chjota nga bʼetsʼoantjai xi je kamʼe. Tonga Biblia kjaʼai tso: «Nga jé xi tjíokon bení kʼianga kuiyá; tonga jé xi je kʼien nijmejin xi tibeni» (Eclesiastés 9:5). Jesús kʼoasʼin tsakakóya nga kjoaʼáyanile xi je kʼien. Tsa kʼialani nga espíritu tjínná xi bʼejnakon kʼianga je mʼe likuijin koanchjénná kjoafaʼáya (Juan 11:11-25). A kʼoasʼin bakóya religiónli nga bʼejnakon espírituná nga je mʼe.

◼ JE RELIGIÓN NDISO TOTSJOÁʼNDE NGA KJOACHAJNGI SʼÍN CHJOTA. Tjínkʼa naxinandá jñani nga je religión tsjoáʼnde nga jé katabinya títjon chjota xi ti xʼin xínkjín fayokaoni kʼoa yánchjín xi ti yánchjín xínkjín fayokaoni. Kʼoa bʼenele chjotaxá nga katatsjoáʼnde nga ti xʼin xínkjín katabixankaoni chjota kʼoa nga ti yánchjín xínkjín katabixankaoni. Saʼnda religión xi tsín tsjoake nga kjoachajngi sʼín chjota totsjoáʼndele chjota títjonle nga síkaojée xtiʼndí. Tonga Biblia kʼoatso: «A li chʼanachajinno. Ni jéjin xi chajngi, ni jéjin xi xkóson bexkón, ni jéjin xi síchajngitʼale chjoónle a xo xʼinle [...] ni jéjin xʼin xi ti xʼin xínkjín fayokaoni [...] sʼe kjoatjaole kjoatéxomale Niná» (1 Corintios 6:9, 10). A ʼyani ji religión xi totsjoáʼnde nga kjoachajngi sʼín chjota.

Jmé xi koanle religión xi kʼoasʼin mangoson joni jngo yá xi chʼao kjoan to bale. Jesús kʼoakitso: «Ngayije yá xi tsi tsa bale to xi nda, jtíní, kʼoa sʼejin lʼí» (Mateo 7:19). Kʼoatjín, je religión ndiso tjoʼaxinní kʼoa sikjesónní. Tonga jósʼin tjoʼaxin kʼoa kʼiáni. Je én xi tongini kinokjoa xi ya faʼaitʼa Apocalipsis, capítulo 17 kao 18 ya kʼoatsóná tʼatsʼe jebi.

Jósʼin tjoʼaxin religión ndiso

Tikjaʼaitsjenjinlaini jebi. Ya Biblia kʼoatso kʼianga jngo chjoón chajngi jngo cho̱ tíjnasonle xi tonokjonle jokji, xi ñato mani jko kʼoa te mani nrale (Apocalipsis 17:1-4). ʼYá xi tsoyanile chjoón jebi. Chjoón jebi je kjinentsja «chjota[xá] sonʼnde», kʼoa najño xi yʼakjá jkoní sʼin tsen, xongósja síchjén kʼoa nʼio nyiná. Xi ijngosani, «je kjoabʼendal[e] t[jíob]ʼanachale ngatsʼi naxinandá» (Apocalipsis 17:18; 18:12, 13, 23). Ya Biblia kʼoatsoná kʼianga chjoón chajngi jebi je tsoyanile religión ndiso xi tjín jngo tjíjtsa sonʼnde. Xi tsonile nga tsín tojngo religión tínchjani, tínchjani ngatsʼi religión xi kʼoasʼin mangoson joni jngo yá xi tsín nda kjoan to bale.

Je cho̱ xi tíjnasonle chjoón chajngi jebi je tsoyanile naxinandá xi tjínle nganʼio i̱ sonʼnde (Apocalipsis 17:10-13).a Kʼoa je religión ndiso tíjnasonle cho̱ jebi nga tíbandiale kʼoa kʼoatítsole jme xi sʼin.

Tonga tokʼoamaná jmeni xi je me koan. Je Biblia kʼoatso: «Je nra xi te mani xi kaʼyai kao cho̱be, jebi xi majtike chjoón chajngibe. Kjoaʼale ngayije, kʼoa sikanajtí, kʼoa skine je yaole, kʼoa koakajin lʼí» (Apocalipsis 17:16). Je naxinandá xi tjínle nganʼio i̱ sonʼnde toxijña kʼoetʼale religión ndiso kʼoa jngokʼa sikjeson. Ánni kʼoasikaosíni. Én xi nroatʼa ya Apocalipsis 17:17 kʼoatso: «Niná kʼoasʼin kitsjoale chjotabe nima xi kʼoasʼin sitjosonle josʼin mele Niná». Kʼoatjín, Niná sijéle cuenta je religión ndiso kʼianga kʼoatso nga tʼatsʼe Niná kʼoatjíosʼínni xi chʼaotjín. Tonga kixi jmeni xi sʼin jé Niná nga jé sichjén chjota político nga kjoaʼaxin chjoón chajngi jebi, xi tsoyanile religión ndiso.

Jméni xi tjínneli sʼiain nga tsín kʼoati koantʼain jokoantʼain je religión ndiso. Niná kʼoasʼin bʼene: «Titjojinlao, naxinandána» (Apocalipsis 18:4). Ndʼai ndʼaibi nga koan kuitjokajinlai je religión ndiso. Tonga jñáni kʼuin, a kui xi tsonile nga tsín ti katamakjainnili tʼatsʼe Niná. Majain, nga tsa tsín koankjainná tʼatsʼe Niná tsínná kjoachoya nichxin xi nroaján (2 Tesalonicenses 1:6-9). Toya kjoan religión xi kjoakixi jñani kʼoangilai yaoli. Tonga jósʼin jchani religión xi ñaki kjoakixi.

Jósʼin jchañá religión xi kjoakixi

Jmé to ni xi tjínnele koale religión xi kjoakixi (Mateo 7:17).

Je religión xi kjoakixi

◼ JE RELIGIÓN XI KJOAKIXI BAKÓ KJOATSJOACHA. Xi ñaki choʼndale Niná ma likui i̱ tsjonjin yaole xi chon i̱ sonʼnde, likui faʼájin xi xín ʼndele xi kjaʼai tso én nchja kʼoa xi kjaʼai sʼin tsen yaole kʼoa tjínle kjoatsjoacha xi kao xínkjín (Juan 13:35; 17:16; Hechos 10:34, 35). ʼNdele nga tijé sikʼienni xínkjín tosa nʼio tsjoake xínkjín kʼoa saʼnda tsjoántjai kjoabijnachonle xi totʼatsʼe ndsʼe (1 Juan 3:16).

◼ JE RELIGIÓN XI KJOAKIXI ÉNLE NINÁ SÍNʼIOTʼA. Je religión xi kjoakixi likui «costumbre» bakóya kʼoa nikuijinla bakóya «kjoatéxomale chjota», jme xi bakóya ñaki ya Biblia bʼangini (Mateo 15:6-9). Ánni. Kuinga «ngayije xon escritura Niná jinroani, kʼoa kjain nga nda machjén nga bakóyaná, nga nchjatikaoná, nga síchoyandaná, nga síkinyayandianá xi kjoakixi» (2 Timoteo 3:16).

◼ JE RELIGIÓN XI KJOAKIXI JTÍN SIKATÍO YANIʼYALE CHJOTA KʼOA TSJOÁ NGANʼIOLE NGA NDA SʼIN KATAFIKAO YAOLE. Je religión xi kjoakixi kʼoasʼin síjéle jé xi xʼin nga «tsjoake katama [chjoón]le, joni tsa ti tsʼeni yao», kʼoa jé chjoón nga «xkón katabe xʼinle» kʼoa jé xti nga«[katas]ítjosonl[e] xijchá[le]» (Efesios 5:28, 33; 6:1). Xi ijngosani, jé chjota xi xá tjínle ya naxinandále Niná tjínnele nga nda koaikao yaole (1 Timoteo 3:1-10).

A tíjna jngo religión xi sítjoson kjoatéxoma jebi. Jngo libro xi kitjo nó 2001 kʼoatso: «Kʼia tsa nkjínlani chjota xi sitjoson jme xi bakóyason jé testigole Jeobá kʼoa kʼoasʼin josʼín jé, likuijin kʼoasíkji chjota judío kinikʼien nga kisʼejna kjoajchántse xi koanjaoni, kʼoa likuijin tikui skoyanile chjota nga tokui sikʼienni xínkjín nga kjaʼai sʼin tsen yaole» (Holocaust Politics).

Kʼoatjín, jé testigole Jeobá —xi jao siento kao kan xjan aon naxinandáyʼai tjíotsoyason— sítjosonní jme xi tso Biblia litsa totsoyasonjin. Kʼoatʼinlai nga katabasenkaoli kʼianga kataʼyai jme xi koyale Niná xi tʼatsan ánni nga ñaki nda katasasénsínile josʼin jchaxkoán. Ndʼai ndʼaibi nga kʼoasʼian. Li choyakaojin. ¡Je machrianle nga tjoʼaxin religión ndiso! (Sofonías 2:2, 3.)

Kʼia tsa mesali jchai tʼatsʼe én xi bakóyason jé testigole Jeobá, koan chjítʼai ngitsʼin xon jebi.

□ Mena nga sikasén jngonao xon xi Jméni xi síjéná Niná ʼmi.

Tʼetʼai jme énni.

□ Mena sʼejinna tʼatsʼe josʼin ʼmiyao Biblia.

[Nota xi faʼaitʼa]

«Titjojinlao, naxinandána»

Je religión ndiso je kʼoatítsole jme xi sʼín «chjota[xá] sonʼnde»