A meli jchai jokjoan tjínni xi kjoakixi

JMÉ kjoakixini. Kui tʼatsʼe kjoachjonangi xi nʼio tjínle kjoandosin xi sakʼoa batíole yaole je chjota. Tsakui nichxin kʼoati sakʼoa chjonangilai yaoli:

• A mandosinle Niná xi tʼatsaan.

• A kuichoka nichxin nga tjóʼaxin je kjoajchán kao kjoachjaʼatokon.

• Jméni xi maná kʼianga je mʼee.

• A tjínle kjoachoya xi je kʼien.

• Jósʼin tjínnele kʼoétsʼoaa kʼianga katanrʼoéná je Niná.

• Jósʼin nga tsjoa sʼe tokoán.

Jñáni kjoásjai tsa meli jchai xi tʼatsʼe jebi. Jmi libro tjín xi kui faʼaitʼa. Tonga kjaʼai kjaʼai tso nga jngó jngó. Tjínkʼa libro xi machjén choatse kjoafaʼaitsjen xi nroatʼa tonga xijema to faʼatoní, ijngokʼa sʼendayani kʼoa tsa mai kjaʼai bitjo.

Tonga jngo libro kijna xi ñaki kʼoatjín jotso kʼoa xi koa̱n koa̱nkjainná. Je Jesucristo i̱ kitso nga tsakʼétsʼoale Nʼaile: «Je énli xi ñaki kjoakixi» (Juan 17:17). Je Én jebi Biblia ʼmile ndʼaibi. Je xi fini tochoala xi bakóyaná josʼin tsoya Biblia tʼatsʼe kjoachjonangi xi jená kʼoakabixoan.

A mandosinle Niná xi tʼatsaan.

ÁNNI NGA KUI JEBI CHJONANGISÍÑÁ. Tse kjoatsʼen tjín i̱ sonʼnde kʼoa likui kixi jmeni xi kjima. Nʼio nkjín relijión xi kʼoasʼin bakóya nga Niná xosʼin mele nga chjaʼatokoan.

JOSʼIN BAKÓYA BIBLIA. Je Niná nikʼiajinla kʼoasʼin xi chʼaotjín. Job 34:10 kʼoatso: «¡Likʼiajin kuitso kon je xi ñaki Niná nga kui kʼoasʼin xi chʼaotjín, kʼoa nga chʼaosʼin je Niná xi ngisasa tse nganʼio tjínle!». Je Niná nga nʼio tjínle kjoatsjoacha, naskánatjín xi tjínndajinle xi kao chjota sonʼnde, kʼoa kuinga kʼoakitsosíni Jesús josʼin kʼoétsʼoaa, kitso: «Nʼainajin xi tijnai ngʼajmi [...]. Katjinroá kjoatéxomali. Kʼoakatasʼín josʼin nga meli, joni ya ngʼajmi kʼoatisʼin i̱ sonʼnde» (Mateo 6:9, 10). Xi ñaki kjoaixi nʼio mandosinle Niná xi tʼatsaan kʼoa saʼnda kisikasén ʼNdíle i̱ sonʼnde nga katabitjoson jmeni xi tjínndajinle (Juan 3:16).

Kʼoati chótsenlai ya Génesis 1:26-28; Santiago 1:13, kao 1 Pedro 5:6, 7.

A kuichoka nichxin nga tjóʼaxin je kjoajchán kao kjoachjaʼatokon.

ÁNNI NGA KUI JEBI CHJONANGISÍÑÁ. Nʼio nkjín chjota xi kjoajchán tjíomʼejin. Kʼoa kjaʼai kjaʼai kjoachjaʼatokon tichjaʼá ngatsʼiaa.

JOSʼIN BAKÓYA BIBLIA. Je Niná kʼoatso nga kjoanyʼán kjoaʼaíkao jngo tjíjtsa sonʼnde. Nga je koatexoma Niná, je chjota «ni kjoajchánjinla ti kʼoetsʼiani» saʼnda «to ki̱cha̱ bʼenyi sikʼóya ki̱cha̱ espadale» (Isaías 2:4). Xi ijngosani, je Niná kjoaʼaxin jme xi tsín kixi kjima kʼoa kao kjoachjaʼatokon. Xi tʼatsʼe chjota i̱ tso Biblia: «Niná kʼoejon ngayije ndáxko̱n xi tsʼe xko̱n. Likui tisʼeni kjoabiya. Likui tisʼeni kjoaba, nijejin xi kjiʼndiá, nijejin xi aon male, nga je kjoa xi títjon je jaʼato», jolani jme xi tsín kixi kjima kʼoa kao kjoachjaʼatokon (Apocalipsis 21:3, 4).

Kʼoati chótsenlai ya Salmo 37:10, 11; 46:9, kao Miqueas 4:1-4.

Jméni xi maná kʼianga je mʼee.

ÁNNI NGA KUI JEBI CHJONANGISÍÑÁ. Me ngatsʼi relijión nga kʼoasʼin bakóya nga fi nimale chjota nga je mʼe. Kʼoa tjínkʼa xi kʼoatso nga je xi je kʼien koanle nga tjín xi sikao je xi tjíokon, kʼoa tsa maije̱ nga kjoañʼai tsjoále Niná je chjota xi tsʼen ya jña títi lʼí.

JOSʼIN BAKÓYA BIBLIA. Nga je mʼee likuiti biyochonñá. Eclesiastés 9:5 kʼoatso nga «je xi je kʼien nijmejin xi tibeni». Nijmejin xi ti majinnile, nijmejin xi tisʼínni, kʼoa kuinga tsín josíkaosíni je xi tjíokon, kʼoa nijojinsʼin koan koasenkaoni (Salmo 146:3, 4).

Kʼoati chótsenlai ya Génesis 3:19 kao Eclesiastés 9:6, 10.

A tjínle kjoachoya xi je kʼien.

ÁNNI NGA KUI JEBI CHJONANGISÍÑÁ. Ngatsʼia mená kuiyochoan kʼoa kʼoétsaojiaan kao chjota xi tsjoachaa. Kʼoa kuinga mesíniná nga jcha ijngokʼa xingiaa xi je kʼien.

JOSʼIN BAKÓYA BIBLIA. Me ngatsʼi je chjota xi je kʼien nga kjoaʼáya ijngokʼanile. Saʼnda Jesús kʼoakitso «kʼia nga je ngatsʼi xi tjío ya nyʼoákʼen kjuinrʼoéle jta̱le. Kʼoa kuitjoni ngatsʼi» (Juan 5:28, 29). Je chjota xi kjoaʼáyale i̱ sonʼnde koa̱n i̱ koatioson kʼoa skoe̱ nga sonʼndenaxó koa̱n, jokjoansʼin koanmele Niná ngasʼa (Lucas 23:43, NM). Kʼoatjín, kʼianga je sʼejna kjoanda xonaskánatjín, je xi kixi koaitʼale Niná koa̱n koatio tokʼia saʼndani kʼoa koanndaya yaole. Je Biblia kʼoatso: «Je xi kixi tsʼee koa̱n i̱ sonʼnde, kʼoa i̱ koatioson ngantsjai nichxin» (Salmo 37:29).

Kʼoati chótsenlai ya Job 14:14, 15; Lucas 7:11-17, kao Hechos 24:15.

Jósʼin tjínnele kʼoétsʼoaa kʼianga katanrʼoéná je Niná.

ÁNNI NGA KUI JEBI CHJONANGISÍÑÁ. Me ngatsʼi relijión nga bʼétsʼoa. Tonga nkjín chjota xi kʼoatso nga tsín noʼyale kjoabʼetsʼoale.

JOSʼIN BAKÓYA BIBLIA. Jesús kʼoakitso nga tsín koa̱n nga tikui tima én sichjénñá nga kʼoétsʼoaa, kitso: «Kʼoa kʼianga bʼetsʼoai, ali tikuijinni én nichjain» (Mateo 6:7). Tsa mená nga kjuinrʼoéná Niná, kʼoasʼin kʼoétsʼoale josʼin nga mele. Kʼoa kuinga machjénsíni nga kataʼya jméni xi mele ánni nga kʼoasʼin kʼoétsʼoasínilee. Ya 1 Juan 5:14 kʼoatso: «Tsa nijé tojmeni kjoa josʼin mele nga je, je nrʼoéná».

Kʼoati chótsenlai ya Salmo 65:2; Juan 14:6, 14, kao 1 Juan 3:22.

Jósʼin nga tsjoa sʼe tokoán.

ÁNNI NGA KUI JEBI CHJONANGISÍÑÁ. Nkjín chjota xi kui nʼio fitjenngile nga nʼio katabʼaxki, nga nda katamatsen yaole kʼoa nga katasʼele taon, nga kʼoasʼin makjainle nga kui jebi xi tsjoa kʼoe kon, tonga likuini tsjoa satíole.

JOSʼIN BAKÓYA BIBLIA. Jesús kʼoakitso jósʼin nga tsjoa satío tokoán kʼianga kitso: «Ngisa toxkón ndani je xi nrʼoé énle Niná, kʼoa xi sítjoson» (Lucas 11:28). Tokʼia nga tsjoa satío tokoán nga kuijnyisje jme kjoanni xi machjénná: nga kataʼya jokjoan tjínni xi tʼatsʼe Niná kʼoa jme xi tjínndajinle xi kao ñá. Yaa Biblia nroatʼa jebi, kʼoa nga ʼyaa kui xi basenkaoná nga ʼyaa jmé kjoanni xi nʼio tjínle kjoandosin kʼoa jméni xi mai. Kʼianga bʼaiʼndele yaoná nga je Biblia bándiale kjoafaʼaitsjenná jmeni xi nʼiaa kʼoa josʼin manginkoaa yaoná, ngisa ndasʼin biyoaa.

Kʼoati chótsenlai ya Proverbios 3:5, 6, 13-18 kao 1 Timoteo 6:9, 10.

Je kachotʼayajin choaa nga jaon koya kjoachjonangi jebi josʼin bakóya Biblia. A mesali jchai. Kʼiatsa ji xi kʼoati tsjoachai nga fasjaiyai je xi kjoakixi, ngo tsejinsa xi meli jchai. Tsakui nichxin sakʼoa chjonangilai yaoli ánni nga kʼoasʼin títsjoáʼndesíni Niná nga kʼoasikji kjoatsʼen kao kjoachjaʼatokon tjín kʼiatsa mandosinle xi tʼatsaan. Kʼoa tsakui nichxin kui meli jchai josʼin nda kuiyo ya yaniʼyali. Yaa Biblia bakóyaná xi tʼatsʼe jebi kʼoa jmesani xi chjonangiaa.

Tonga nkjín chjota xi tsín kjoan mandosinle nga kui skótʼa. Kʼoasʼin síkjaʼaitsjen nga nʼio ñʼai tíjna kʼoa nga likui majinná. A meli nga tjín xi koasenkaoli nga katamajinli jotso Biblia. Tsa meli, jao koya xi síkatíobasenli je testigole Jeobá.

Xi títjon je xo̱n xi Jmé kjoanni xi bakóya je Biblia ʼmi, xo̱n jebi kui xá kisʼendani nga koasenkao je chjota —ngisa xi tsín nanda maʼale— nga katakotʼajin jotso Biblia tʼatsʼe jmeni xi nʼio kjonangile yaole. Xi majaoni kuinga koan kʼuinya kjoatjaoli Biblia ya ndʼiali. Kao kjoatsjoa nga jngo testigole Jeobá xi ndabe Biblia kuicho kakóya ngotjoli ya ndʼiali kʼoa tsa jñani nga kʼoakoa̱nli nga xki̱ xomana. Miyón chjota xi tjíobasenkao Énle Niná nga kʼoasʼin tjíoʼmiyale, kʼoa tjíobení nga kjimasjaile jokjoan tjínni je xi kjoakixi.

Kʼoati kataʼyai tsanda ji jokjoan tjínni xi faʼaitʼa ya Biblia nga tsínsa jme xi mangósonkao. Kʼianga ʼyaa xi kjoakixi faʼáxinná kjoaʼmiya ndiso xi to sískayajinná kʼoa kao xi nokjonlee, kʼoati faʼaxínná josʼin makjainle chjota jolani kʼianga tsokjónle nga cho̱ kjiʼndíase̱n kʼoa xi kjaʼaisale. Nga ʼyaa xi kjoakixi tosa sʼená kjoachoya, kʼoa ngisa nda sʼin biyoa kʼoa tsjoa sʼe tokoán. Je Jesús kitso: «Jchanío xi kjoakixi, kʼoa je xi kjoakixi sikatíondaíno» (Juan 8:32).