Je rey Salomón nʼio chjine koan

JÓKOA̱NCHON naxinandáná tsa jelani Jeobá koaitʼale je chjotaxá kʼoa kao ngatsʼi chjota kʼoa tsa skoe̱xkón kjoatéxomale. Yaa tsoyaná jebi jokoanchon je xi ñachan nó tsakatéxoma je Salomón ya naxinandá Israel.

Kʼianga kjesa mʼejin David, jé ʼndíle xi Salomón ʼmi kisikʼéjnangajao nga je koatexoma. Ñandia kʼianga kijnafe Salomón kʼoakitsole Niná ya yanijñále kʼianga katasíjéle tojmeni xi mele. Je rey Salomón kjoachjine kisijé kʼoa kao kjoankjíntokon ánni nga nda koatexomasíni. Je Jeobá nda kisasenle jmeni xi kisijé Salomón kʼoa kitsjoale. Xi ijngosani, kʼoakitsole nga kʼoati tsjoále kjoanyiná, kjoajeya, kʼoa nga tse kʼoéjna tsa je xi sitjoson.

Nga kʼoasikji chjine koan je Salomón nʼio tsakʼaxki̱. Ñandia kʼianga jao yánchjín kichonrʼoe xi jngo ʼndílee tjíokjanyani. Jméni xi kisʼin je Salomón. ¡Kʼoakitso nga jaoya katanikao je ʼndílee! Je chjoón xi títjon koanjyole, tonga je xi ijngo kʼoakitso nga tosa je katabʼaile je chjoón xi ijngo. Kʼoasʼin tsabeni je Salomón ʼyani xi ñaki na̱le kjoanni ʼndí jebi. Kʼianga je kisʼejinle kjoa jebi je naxinandá, tsabení nga je Niná títsjoále kjoachjine Salomón.

Je ndʼia xi ngisasa síxkónkji xi tsakʼénda rey Salomón kui je yo̱ngo̱le Jeobá xi kisʼejna ya Jerusalén. Yaa yo̱ngo̱ jebi tsabexkón Jeobá je naxinandá Israel. Kʼianga kiskoxʼáʼnde yo̱ngo̱ je Salomón jngo kjoabʼetsʼoa tsakʼéjnale Jeobá kʼoa i̱ kitsole: “¡Koeni! Saʼnda likui jchóyai ya ngʼajmi. Kʼoa jósʼin jchóyani je ndʼia xosíkji tsakʼenda” (1 Reyes 8:27).

Je Salomón tsakʼaxki̱ ninga nʼio kjin naxinandá jolani tsa ya Seba, xi nchjani Arabia. Je reina xi ya tsʼe Seba ki ya Israel nga jesoa skoe̱ kjoajeyale kʼoa kao kjoanyinále Salomón kʼoa nga skótʼayakao kjoachjine xi kisʼele. Ñaki tokʼoakoanle jmeni xi tsabe kʼoa jmeni xi kinrʼoé kʼoa saʼnda tsakʼasjengʼa Jeobá nga kʼoasikji chjine je rey xi kiskoejin. Nga kʼoasʼin kisichikontʼain Niná jokji tse tsakatéxoma Salomón, nʼio tse kjoanyʼán kisʼele je naxinandá Israel kʼoa lijme xi kichale.

Tonga xi tokʼoamaná kuinga tsín tikui kjoachjinele Jeobá kitjenngini Salomón xijekoanni. Tobʼelañá, ninga kʼoakitso je Niná nga tsín koa̱n nkjín yánchjín sʼe̱le je xi rey koa̱n, je Salomón siento yánchjín chixankao ninga xi niná ndiso tsakʼétsʼoale. Yánchjín jebi tobijbi kiskenʼndóbʼakjá je Salomón nga kʼoati kjaʼaí niná tsakʼétsʼoale kʼoa nga kisikjinle Jeobá. Je Niná kʼoakitsole Salomón nga tsín tije ntje̱le koatexomayejeni ya naxinandá Israel. Kuinga tsín tsakjáʼayejesínile je naxinandá Israel nga tsín tokatachajin je én xi kitsole David. Ningalani kʼoasʼin yátsʼi̱n tsakasén je Salomón, je Jeobá alikui kisichajin je kjoasʼendajin xi tsakʼénda kao David.

(Yaa yʼangini 1 Reyes kapítulo 1 saʼnda 11, 2 Crónicas kapítulo 1 saʼnda 9 kao Deuteronomio 17:17.)