KJOAʼMIYA 21
Nga jaʼáyale Jesús
Je Jesús nkjín kʼa tsʼatsenle chjotale, kitsjoanganʼiole kʼoa kʼoakitsosale jmeni xi sʼin
NGA kicho jan nichxin nga kʼien Cristo, nkjín yánchjín xi kʼoati chjota tjenngile koanni xi ki ya tsjó jña kisʼeñe kʼoa totixʼa nga kicho. Tjín xi tsakjaʼáxin la̱jao̱ xi sénjchxo kʼoa tokjitia je tsjó.
Xijekoan, jao ánkje tsʼatsen. Kʼoa jngo xi i̱ kitsole yánchjín jebi: “Timafasjainío Jesús xi tsʼe Nazaret [...]. Kafaʼáyanile” (Marcos 16:6). Yánchjín jebi kjitʼanangi kikʼéyanajmíle je pastro. Tonga nga tjenya yandiaa yaa kisatejin Jesús kʼoa i̱ kitsole: “Ali bijkonjion, tangín nikinrʼoáo ndsʼe, jméni nga koaisíni ya Galilea, kʼoa ya skoe̱na” (Mateo 28:10).
Xi koanskanni, jao chjotale Jesús kitjoni ya Jerusalén xi ya tjíofi ya Emaús. Kʼianga tjenya yandiaa jngo chjota kitsjenkao xi kui kiskonangile jmeni xi tjíofaoyani. Chjota jebi jéní Jesús, tonga je chjotale alikui tsabe nga kjaʼaí kji. Ñaki ba tjíole nga kʼoakitsole nga je Maestrole tjíofaoyani, kʼoa Jesús kui kitsoyale jmeni xi tso Xo̱nle Niná tʼatsʼe je Mesías. Tojosʼin ʼyaa, je Jesús kisitjoson ngayeje én xi tongini kinokjoa tʼatsʼe je Mesías, nijngojinla kichale.a Kʼianga tsabe nga jeni Cristo xi tjíofákao, je Cristo tokicha nga je kui yao yʼa ijngokʼani xi tsín matsen.
Nga jao chjotale Jesús ki ijngokʼani ya Jerusalén nga kikonle je pastro. Kʼoa je pastro tíchjoanʼiole xo̱ntjoa jñani tjíojtín. Kʼianga tjíobʼéyanajmíle ʼyani xi kisatejin ya yandiaa, toʼikoan tsʼatsenngáni Jesús kʼoa ñaki tokoanxkónle ngatsʼi. Je Jesús i̱ kitsole: “Ánni nga nʼio tjíosíkjáojinsíni ni̱ma̱no.” Kʼoa i̱ kitsosale: “Kʼoasʼin tjítʼa xo̱n, nga kʼoasʼin koanchjén nga je Cristo tsakjaʼá kjoañʼai, kʼoa nga jaʼáyajinnile kʼen nga koan jan nichxin” (Lucas 24:38, 46).
Ñachan nichxin nga nkjín kʼa tsʼatsen Jesús. Ñandia nga tsʼato aon siento chjotale tsabe. Tsakui nichxin kʼia kitsjoale xá jebi: “Tangíon, tinyaʼao ngatsʼi naxinandá, tikinjaon chjota tʼatsʼan [...]. Takoyalao nga katasítjoson ngayije kjoa xi an tsakʼeneno. Koeni an tijnakaono nga jon ngantsjai nichxin, saʼnda nga kjoetʼa sonʼndebi” (Mateo 28:19, 20).
Kʼianga tokʼoatjínsa tsakatioxkó Jesús kao nga tejngo pastrole xi kixi kitʼale, kitsole: “Tjoéno nganʼio kʼianga je Espíritu Santo kjoaʼaíno. Jon koa̱on testigona [...] jña saʼnda nga fetʼa sonʼnde” (Hechos 1:8). Je Jesús kʼia kimingʼa ngʼajmi kʼoa jngo yojbi kichaʼmajin, je chjotale likui titsabeni.
(Yaa yʼangini Mateo kapítulo 28, Marcos kapítulo 16, Lucas kapítulo 24, Juan kapítulo 20 kao 21 kao 1 Corintios 15:5, 6.)
a Yaa koa̱nsjaisali én xi tongini kinokjoa tʼatsʼe je Mesías xi kao Jesús kitjosonni ya kjoaʼmiya 14, kjoaʼmiya 15 kao kjoaʼmiya 16 i̱ xo̱n jebi kʼoa ya jñani tso “Jesucristo, jéní Mesías xi kitso Niná” ya libro Jmé kjoanni xi bakóya je Biblia.