Jméni xi sʼiaan kʼianga koa̱nchriantʼalee Niná

1. A nrʼoéle Niná ngatsʼi chjota kʼianga bʼétsʼoa.

Je Niná kʼoatso nga katabʼétsʼoale toʼya chjotani xi tjín ngakjijnda Sonʼnde ánni nga koa̱nchriantʼasínile (Salmo 65:2). Tonga ali tsakuijin xi tsonile nga nrʼoéle ngatsʼi chjota kʼianga bʼétsʼoa. Tobʼelañá, je Biblia kʼoatsokixi nga je chjota xi totaon be chjoónle satéchjoale je kjoabʼetsʼoale, likui nrʼoéle Niná (1 Pedro 3:7). Je Niná kʼoati likui kinrʼoéle je kjoabʼetsʼoa xi tsakatío je chjota israelita nichxin kjoatse kʼianga kui kʼoakisʼin xi chʼaotjín. Ninga kʼoalani, je Niná nrʼoéle je kjoabʼetsʼoa xi batío je chjota xi kʼoamanile jée xi bajngi. Tʼexkiai Isaías 1:15 kao 55:7.

Chótsenlai je video A nrʼoéle Niná ngatsʼi chjota kʼianga bʼétsʼoa

2. Jósʼin mele Niná nga kʼoétsʼoalee.

Tjínnele nga tojékjoan Jeobá kʼoétsʼoalee, nga̱ jé kisindaná kʼoa tojé xi ñaki Niná (Mateo 4:10; 6:9). Kʼoa mani nga chjotajée kitje̱nñá, tjínnele si̱chjén jaʼaínle Jesús kʼianga kʼoétsʼoaa, nga̱ totʼatsʼe jéená nga kʼoasʼin kinikʼien (Juan 14:6). Je Jeobá alikui mele nga to jkoaa kuinyaa jme xi kʼuínlee kʼoa tsa to xo̱n kʼoéxkialee. Kui xi mele nga ni̱ma̱ná katanroajinni jokʼuínlee kʼianga kʼoétsʼoalee. Tʼexkiai Mateo 6:7 kao Filipenses 4:6, 7.

Je Niná kʼoati nrʼoéná ninga tojinni̱ma̱ná kʼoétsʼoanilee (1 Samuel 1:12, 13). Kʼoatsoná nga ntsjaintsjai kʼoétsʼoalee, jolani kʼianga bisotjeen, kʼianga soyoaa, kʼianga bichaa kʼoa tsakʼiaje̱ nga kjoa tibitjatojiaan. Tʼexkiai Mateo 15:36 kao 1 Pedro 5:7.

3. Ánni nga machjénsíni nga koa̱nñaa kao je xi ñaki chjotale Cristo ma.

Alikui choa ñʼai maná kʼianga nichriantʼalee Niná, nga̱ je chjota xi tjín ndʼaibi likui makjainle tʼatsʼe Niná kʼoa saʼnda besin Énle Niná kʼianga kʼoatso nga kjoanyʼán kjoaʼaíkao i̱ Sonʼnde (2 Timoteo 3:1, 4; 2 Pedro 3:3, 13). Kuinga machjénsíni nga koa̱nñaa kao je xi ñaki chjotale Cristo ma ánni nga je sinʼiojinsíniná. Kʼoa je xíngiaa jebi kʼoati machjénle nga si̱nʼiojiaan. Tʼexkiai Hebreos 10:24, 25.

Kʼianga biyoxkoá kao xíngiaa xi tsjoake Niná ngisa machriantʼasalee Niná. Kʼoa je kjoajtín xi batío je testigole Jeobá nʼio tsjoánganʼioná, nga̱ yaa ʼyaa josʼin tjíobakó kjoamakjainle je xi ngikʼa. Tʼexkiai Romanos 1:11, 12.

4. Jméni xi sʼiaan kʼianga koa̱nchriantʼalee Niná.

Kʼianga koa̱nchriantʼalee Niná machjénní nga si̱kjaʼaitsjenjiaan jmeni xi jetiʼyaa ya Biblia xi tʼatsʼe. Koaan si̱kjaʼaitsjenjiaan jokjoan tsojmi xi kisinda kʼoa jmeni xi sʼín. Kʼoati koa̱n si̱kjaʼaitsjenjiaan kjoafaʼaitsjen xi tsjoáná kʼoa jme kjoanda xi tso nga kjoaʼaíkao. Kʼiatsa si̱kjaʼaitsjenjiaan xi tʼatsʼe jebi kʼoa kʼoétsʼoalee Niná koa̱nchoyaná jokji kjoatsjoacha tjínle kʼoa jokji chjine. Tʼexkiai Josué 1:8 kao Salmo 1:1-3.

Tokʼiaa nga koa̱nchriantʼalee Niná tsa ñaki je si̱nʼiotʼaa kʼoa koa̱nkjainná xi tʼatsʼe. Kʼianga tsín kjuinroajen kjoamakjainná tjínnele si̱kjaʼaitsjenjiaan jme xi makjainná kʼoa ánni nga kʼoasʼin makjainsíniná. Nga̱ je kjoamakjainná kʼoasʼin mangóson joni tsa jngo chjota nga tjínnele koakje̱n kʼianga tosi tonda kʼoéjnakon. Tʼexkiai Mateo 4:4 kao Hebreos 11:1, 6.

5. Jmé kjoanda xi so̱koná tsa si̱chriantʼalee Niná.

Je Jeobá nʼio mandosinle je chjota xi tsjoake. Koaanle sikuindaná tʼatsʼe kjoa xi xkón sikʼéjna kjoamakjainná kʼoa kao xi xkón sikʼéjna kjoabijnachon xi tichoyalee (Salmo 91:1, 2, 7-10). Xi ijngosani, tongini bájinkonná nga tsínkui kʼoasʼiaan xi tsjoáchʼinná kʼoa xi kjoaʼaxin je kjoatsjoa xi tjínná. Kʼoa tsoyaná josʼiaan nga ñaki ndasʼin kuiyoaa. Tʼexkiai Salmo 73:27, 28 kao Santiago 4:4, 8.