Jókoa̱nchon nichxin xi nroaján

JE BIBLIA ITSO

“Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato.” (Apocalipsis 21:4, Nuevo Testamento en mazateco de Huautla de Jiménez, Oax.)

KJOANDA XI SʼENÁ NGA ʼYAA JEBI

Nʼio nda je xá xi sʼe̱ná kʼoa tsjoa koaya tokoán (Isaías 65:21-23).

Alikui tisʼe̱ni kjoañʼai kʼoa alikui tisʼe̱ni chʼin (Isaías 33:24; Apocalipsis 7:17).

Ñaki ndasʼin kuiyoaa kao xíngiaa ngantsjai nichxin (Salmo 37:11, 29).

A KOAAN KOA̱NKJAINNÁ JOTSO JE BIBLIA

Jaon. Jaola koya kataʼyaa anni:

• Je Niná tjínle nganʼio nga sitjoson jmeni xi tso. Ya Biblia kʼoatso nga tojé “Niná xi tjínle ngayije nganʼio”, nga̱ je nganʼiole alikui fetʼa (Lucas 1:49). Kʼianga kʼoatso Niná nga sikʼantjaiya jmeni xi chon sonʼnde, koaan kʼoéjngoaa tokoán nga kʼoasʼin. Tojo tso ya Biblia, je “Niná koaanle ngayije kjoa” (Mateo 19:26).

• Je Niná mele nga sitjoson jmeni xi tso. Tobʼelañá, je Biblia kʼoatso nga je Jeobá nʼio mele nga sikjaʼáyanile xi jekʼien (Job 14:14, 15).

  Kʼoati tso nga je ʼNdíle Niná kisindaya je chjota xi chʼin kisʼele. Ánni nga kʼoakisʼinsíni. Kuinga koanmele tsakasenkao chjota (Marcos 1:40, 41). Nga kʼoakisʼin Jesús, kʼoasʼin tsakakóni jmeni xi mele Nʼaile, nga koasenkao je chjota xi nganʼio machjénle (Juan 5:19).

  Jebi kui xi bakóná nga Jeobá kao Jesús mele nga naskásʼin kuiyoaa nichxin xi nroaján (Salmo 72:12-14; 145:16; 2 Pedro 3:9).