Tsjoacha katamao ngantsjai xíngio

Je Jeobá kui xi mele “nga jchachjí je kjoakixi” (Miqueas 6:8). Nʼio machjén nga kixi katamalee je chjoónná, nga̱ tsa tsín kʼoasʼiaan likuijin nʼiotʼa koaan xíngiaa. Kʼianga nʼiotʼaa xíngiaa sa nʼio sa nʼio matsjoachaa.

Nichxin xi tiyoaa ndʼaibi, nʼio nkjín xi jechixan xi tsín kixi kjimale xínkjín. Kʼianga nda kuiyo, jao koya jmeni xi tjínnele sʼiaon nga jngó jngó.

1 NʼIO CHJÍ JCHATOKUIN KJOABIXANLI

JE BIBLIA ITSO: “Kixi timao, ali joni chjota xi tsínle kjoafaʼaitsjenjin, tonga joni chjota xi tjínle kjoafaʼaitsjen” (Efesios 5:15, 16). Je chjota xi tjínle kjoafaʼaitsjen nʼio chjí bekon je kjoabixanle kʼoa kui títjon síkʼéjna.

Je Jeobá kui xi mele nga tojekjoan chótsenlai je chjoónli kʼoa nga nda kuiyokao xíngio (Eclesiastés 9:9). Alikui mele nga tokuinjíotokon xíngio, tosa kui xi mele nga kjoásjailao josʼin nga tsjoa kʼoáo kon xíngio (1 Corintios 10:24). Ñaki katasʼejngo kon je chjoónli nga ʼyachjí kʼoa nga nʼio machjénli nganʼiole.

KOAAN I̱ SʼIAIN:

• Ngisa tse nichxin tikʼayalai je chjoónli, ali kjaʼaíjinla kjoa nikjaʼaitsjain kʼianga ya tijnakoai

• Kuenta tʼiain je chjoónli, ali to yaolijin nikjaʼaitsjain

2 TIKUINDAI NI̱MA̱LI

JE BIBLIA ITSO: “Toʼyanibe xi kotsenle jngo chjoón nga maxkaile, jekisichajngi jajin ni̱ma̱le kao je” (Mateo 5:28). Tsa ʼyani xi kjoachajngi jetíkaníya kjoafaʼaitsjenle jelikui kixi kjima kao chjoónle.

Je Jeobá kʼoatso nga nʼio machjén nga si̱kuindai je ni̱ma̱li (Proverbios 4:23; Jeremías 17:9). Kʼianga kuitjosonli jebi tjínneli si̱kuindai jmeni xi chotsenlai (Mateo 5:29, 30). Koaan chjénngilai jokisʼin je chjota xi Job tsakʼin. Chjota jebi ñaki kʼoasʼin tsakʼéndajin kao xko̱n nga tsín tsa kjaʼaí chjoón simekon (Job 31:1). Ninroajinla nichxin nga pornografía chotsenlai. Nitsejinla je nimetokuin je xi tsín tsa chjoónli mani.

KOAAN I̱ SʼIAIN:

• Katabe xi ngikʼa nga tsín tsa kjaʼaí chjoón mandosinli

• Tikjaʼaitsjain josʼe kon je chjoónli kʼoa ndi̱to̱n tikjinlai tsa ʼyani xi nʼio tísíchriantʼali