Jósʼin koa̱n si̱chjaon je tao̱nno

Ngatsʼiñá nga tao̱n machjénná nga bijnyiʼá je familianá (Proverbios 30:8). Nga̱ “je tao̱n [...] basenkaoná” (Eclesiastés 7:12). Sakʼoaa to kjoa bichómani nga tao̱n fáoyani xíngiaa, tonga tʼenelao yaono nga tsín kʼoakatamao jon (Efesios 4:32). Tʼejngo tokon nga tsín toxkia sikje tao̱n je xi ijngo kʼoa cho̱bayaño josʼin si̱chjaon je tao̱nno.

1 NDA TʼENDAJION JOSʼIN SI̱CHJAON TAO̱NNO

JE BIBLIA ITSO: “ʼYáni xi jonbi xi mele skómitje̱n jngo torre xi tsín títjon kʼoéjna skósonnile jotjín sʼe̱ngile, tsa tjínle xi machjénle nga sikjetʼa” (Lucas 14:28). Nʼio machjén nga cho̱bayaño josʼin si̱chjaon je tao̱nno (Amós 3:3). Cho̱bayaño jokjoan tsojmi xi machjénno xi kuindáo kʼoa jotjín koa̱n si̱kjeyao (Proverbios 31:16). Ningalani tíjnano tao̱n xi kuindáño jngo tsojmi xi meno, alikui koa̱n nga tokjoán kuindáo. Ali tao̱njin mjetʼaon yaono, tokuikjoan tindáo xi kuinje̱no (Proverbios 21:5; 22:7).

KOAAN I̱ SʼIAIN:

• Kʼiatsa njengi choali tao̱n nga fetʼa je xomana kʼoa tsa kʼiaje̱ nga fetʼa je sá, cho̱bayaño josʼin si̱chjaon

• Kʼiatsa tsesa tao̱n kafeyano jotjín tjínndajinno nga si̱kjeyao, cho̱bayaño jmeni xi koa̱n sʼiaon nga choasa si̱kjeyao. Tobʼelañá, koaan tosa ya niʼyano kʼoéndao xi kuichiño ʼndele nga ya koanngínkicho jñani machjí

2 KIXI KATAMAI KʼOA ALI NIKʼATONEJINLAI JOTJÍN TAO̱N NIKJEYAI

JE BIBLIA ITSO: Kixi katamao, “nga [je]kichjaʼaxion kjoandiso, cho̱bakao xíngio xi kjoakixi” (Efesios 4:25). Ali bʼeʼmajinlao xíngio jotjín tao̱n njeno kʼoa jotjín nikjeyao.

Kʼiatsa tse tao̱n si̱kjeyai, títjon kjoanla chja̱koai je chjoónli (Proverbios 13:10). Kʼiatsa kjitʼa cho̱bayaño xi tʼatsʼe jebi, nyʼán kuiyokao xíngio. Ali kʼoajinsʼin nikjaʼaitsjain tsa totsi je tao̱n xi njeli, kʼoati tsʼe familiali (1 Timoteo 5:8).

KOAAN I̱ SʼIAIN:

• Cho̱bayaño kao chjoónli jotjín tao̱n koa̱n si̱kjeyao nga jngó jngó

• Tongi cho̱bayaño xi tʼatsʼe tao̱n, ali kʼiajin saʼnda nga jekjoa tísʼeno