Jósʼin batio xi jechixan kʼianga jejngo ʼndí sʼele

Kʼianga tsin je ʼndítjon nʼio tse kjoatsjoa tje̱nkao, tonga kʼoati nʼio tse xá sʼele je xi xijchá ma. Tsakui nichxin tokʼoakoa̱nno jokji nchjá si̱kaono kʼoa jokji tse nichxin si̱kʼayalao nga si̱kuindao je ʼndíleeno. Mani nga jetsín tikʼoakji si̱kjáyaño kʼoa nga sakʼoa likui tinda sa̱tíoni tokon, tsakui nichxin ya kjuinroani nga kjoa sʼe̱no. Machjén nga kʼoéndajion josʼin si̱kuindao je ʼndíleeno kʼoa nga kʼoati si̱sinngañálao xíngio. Jósʼin koasenkaono je kjoafaʼaitsjen xi faʼaitʼa ya Biblia nga jchao josʼin kʼoéndajion je kjoa xi sʼe̱no.

1 KATAMACHOYALI NGA JEKʼOANTJAIYA JOSʼIN KUIYO

JE BIBLIA ITSO: “Je kjoatjaocha tsejtaní, kʼoa tjínle kjoanda [...], likui básjai xi titsʼeni, likui matijta” (1 Corintios 13:4, 5). Nga tosʼa ʼndítjon je ʼndíleeli, tsakui nichxin ñaki toje nʼio si̱sinlai. Tonga tochale kʼoasʼin sikjaʼaitsjen je xʼinli nga tsín tikuenta tinʼiani. Kuinga machjénsíni nga kʼoati kuenta tʼiain. Tsejta katamai xi kao je kʼoa takolai kjoanda, ánni nga ñaki katasʼejngosíni kon nga ʼyachjí kʼoa nga nʼio machjénli nganʼiole nga si̱kuindao je ʼndíleeno.

“Jon, xi xʼion, kʼoatisʼin tiyokao yánchjínno josʼin nga nda machoyano.” (1 Pedro 3:7.) Kʼiatsa tosʼa ʼndítjon xi tíjnano, katamachoyali nga je chjoónli ngisa nʼio sikʼaya nichxin nga sikuinda je ʼndíno. Tsakui nichxin kuijtajinle, chóbele kʼoa tsa saʼnda koa̱nba sakʼoale nga jengisa tse xá tjínle. Tsakui nichxin sijti sakʼoale yaole. Tonga tsejta katamai, nga̱ “je xi tsín tokjoan síjtile yaole ngisa nda tikʼoajinni je xi tjínle nganʼio” (Proverbios 16:32). Tijinlai yaoli jméni xi machjénle je chjoónli (Proverbios 14:29).

KOAAN I̱ SʼIAIN:

• Je xi nʼai: Tisenkoai je chjoónli nga kʼoati tikuindai je ʼndíno, ninga kʼia nga jenjio. Ngisasa tse nichxin tikʼayalai je chjoónli kao ʼndíleeli tikʼoajinni xi kjaʼaí xá

• Je xi na̱: Kʼianga je xʼinli sikuindakaoli je ʼndílee alijojin ʼmilai tsa tsín ñaki kʼoakjoansʼin sikuinda. Tosa ngasin nganda tʼinyalai josʼin sikuinda

2 TIMIYOSAO XÍNGIO

JE BIBLIA ITSO: “Tojngo yao koa̱nni” (Génesis 2:24). Ninga jejngo ʼndí tíjnano, ali nichajinjion nga “tojngo yao” maño nga jao. Tʼenelao yaono nga tojo nʼio tsjoacha katamao xíngio.

Tʼailai kjoanda je xʼinli nga basenkaoli kʼoa nga tsjoánganʼioli. Kʼianga ʼya xi tsjoáná kjoanda nʼio basenkaoná (Proverbios 12:18). Tsa ji xi xʼin mai, kʼoatʼinlai je chjoónli nga nʼio tsjoachai kʼoa nga ʼyachjí. Tʼailai kjoanda josʼin basenkaoli ya yaniʼya (Proverbios 31:10, 28).

“Niʼyajin xi básjai nga nda kʼoéjna xi totsʼeni, tonga katabásjai nga nda kʼoéjna xi kjaʼaí.” (1 Corintios 10:24.) Kuenta tʼiain je chjoónli kʼoa tsa xʼinli kʼoa chjí jchai jmeni xi sʼín. Chʼa̱sjeʼao nichxin nga cho̱banajmío kʼoa nda tinóʼyalao xíngio. Kʼoa kʼianga sóyokao xíngio, likui koa̱n nga tojngo xi koaini yaole, tjínnele nga kuenta tʼiaon xíngio. Je Biblia itsole xi jechixan: “Ali maijin bixónlao xíngio”, kʼoa kʼoatsole nga katafáoyani josʼin (1 Corintios 7:3-5). Kʼoatʼinlao xíngio jotjín tokon xi tʼatsʼe jebi. Tsa tsejta koaon kʼoa tsa si̱jinlao yaono jomale xi ijngo ngisa nda kuiyokao xíngio.

KOAAN I̱ SʼIAIN:

• Tikʼayalao nichxin xíngio nga tojon

• Takolai je chjoónli nga tsjoachai. Koaan jngo xo̱n chjílai, kʼoa koaan tjín xi kʼoaikjoatjaolai

3 TʼINYALAI JE ʼNDÍLEELI

JE BIBLIA ITSO: “Saʼnda nga ʼndí tisui, tsaʼyai je xo̱n Escritura xi tsʼe Niná, je xi nda sichjineli josʼin kuitjontjai” (2 Timoteo 3:15). Tʼendajin josʼin kʼuínyalai je ʼndíli. Kuenta tʼiain nga jenʼio tse xi majinle ninga kje tsinjin. Ninga sʼa ya tíjnaya tsʼoa̱ na̱le jenrʼoé nga nokjoale kʼoa jetsen male. Kʼoasʼin tingalai saʼnda nga sʼa jtsín nga tʼexkialai. Ningalani likui majinle, kui xi koasenkao nga tsjoake koa̱n nga kʼoexkia nga jekoa̱njchínga.

Ali kʼoajinsʼin nikjaʼaitsjain nga sʼa nʼio ʼndí kji nga kui chja̱kaonajmíni xi tʼatsʼe Niná. Katanrʼoéli josʼin bʼetsʼoalai Jeobá (Deuteronomio 11:19). Kʼianga niskákoai, kui chja̱kaonajmíni tʼatsʼe jme xi kisinda Niná (Salmo 78:3, 4). Nga jekoa̱njchínga skoe̱ní nga nʼio tsjoachai je Jeobá kʼoa kʼoati tsjoake koa̱n tsanda je.

KOAAN I̱ SʼIAIN:

• Tijélai Niná kjoachjine nga kʼuínyalai je ʼndíli

• Nkjín kʼa tikʼaxki̱lai jmeni xi meli nga katama ndi̱to̱nle