Jósʼiaon kʼiatsa kjoaxkón kjoaʼaíneno

Ningalani nʼio kʼoénelai yaoli nga taja katasʼejna je kjoabixanli kʼoa nga ndasʼin kuiyo ya niʼyali, tonga tsakui nichxin sakʼoa toʼi̱koa̱n kjoaʼaíneno kjoa xi kjoaba sikatíojinno (Eclesiastés 9:11). Tonga je Niná tsjoáná nganʼio kʼianga kjoa bitjatojiaan. Je xi fisani kui jcha kʼaa kjoafaʼaitsjen xi tsjoá Biblia. Kʼiatsa koanngíntjenngio je kjoafaʼaitsjen jebi, ji kʼoa kao familiali, skaano ninga nʼio tse kjoa kuitjátojion ya yaniʼyano.

1 TINʼIOTʼAI JE JEOBÁ

JE BIBLIA ITSO: “Je tikʼamio ngayije kjoanikjaojinno, nga̱ je tísíkuindano” (1 Pedro 5:7). Tikjaʼaitsjain kʼianga tsín tʼatsʼe Niná nroani je kjoa xi bitjatojiaan (Santiago 1:13). Kʼiatsa si̱chriantʼalai je Niná jé koasenkaoli (Isaías 41:10). Je Énle itso: “Kʼoatʼinlao jotjío jinni̱ma̱no” (Salmo 62:8).

Je xi kʼoati koasenkaoli kuinga nyaon nyaon kʼoéxkiai kʼoa chótʼayai je Biblia. Kʼiatsa kʼoasʼiain jchaní kʼianga jé Jeobá “xi síjekonná ngayije kjoañʼainá” (2 Corintios 1:3, 4; Romanos 15:4). Je Biblia kʼoatso nga je Niná tsjoáná “je kjoanyʼántakonle [...] xi ñaki faʼatole ngayije kjoafaʼaitsjenle chjota” (Filipenses 4:6, 7).

KOAAN I̱ SʼIAIN:

• Kʼoatʼinlai je Jeobá nga katabasenkaoli nga ndakjoanla ni̱kjaʼaitsjain kʼoa ali xitso xiskájin kʼoanʼiai tsa jmeni

• Títjon kjoanla tikjaʼaitsjain josʼin nga ngisa skénndiaali nga kʼoéndajin je kjoa xi tjínli

2 TIKUINDAI YAOLI KʼOA KAO FAMILIALI

JE BIBLIA ITSO: “Je ni̱ma̱le chjota xi machoyale sʼele kjoankjíntokon, kʼoa je xoño chjota xi chjine básjai kjoankjíntokon” (Proverbios 18:15). Jméni xi machjénle nga jngó jngó xi tjío ya yaniʼyali. Machjénní nga títjon kjoanla kataʼyai. Chja̱kaonajmí kʼoa nda tinóʼyalai (Proverbios 20:5).

Kʼoa jméni xi koa̱n sʼiain kʼiatsa jngo xíngi si̱chai. Ali soajin mali nga kʼoasi jomali. Tikjaʼaitsjain nga saʼnda je Jesús kʼoati kiskiʼndá (Juan 11:35; Eclesiastés 3:4). Je xi kʼoati koasenkaoli kuinga nda sójnafai kʼoa nga nda si̱kjáyai (Eclesiastés 4:6). Tsa kʼoasʼiain, ngisa choa ñʼai koa̱nli nga kuitjátojin je kjoaba xi tijnajin.

KOAAN I̱ SʼIAIN:

• Chja̱kaonajmí ngantsjai je xi tjío yaniʼyali nga nda tiyo. Kʼiatsa kʼoasʼiain, ngisa kuitso kon nga kjoakaonajmíli nga kjoa sʼe̱

• Chja̱kaonajmí je xi kʼoati kui kjoa jejaʼatojin

3 TJASJAI JE NGANʼIO XI MACHJÉNLI

JE BIBLIA ITSO: “Jngo xi ñaki miyo tsjoakená tokʼiani, kʼoa jngoyale ndsʼeñá kʼianga kjoaba tijnajiaan” (Proverbios 17:17). Tsakui nichxin kʼoati koa̱nmele nga koasenkaoli je miyoli. Tonga tsa tsín be josʼin koasenkaoli koaan kʼoakʼuínlai xi ñʼai kjimali (Proverbios 12:25). Xi ijngosani, je timiyui je chjota xi kotʼaya je Biblia. Nʼio koasenkaoli je kjoafaʼaitsjen xi tsjoáli xi ya Biblia nroatʼa (Santiago 5:14).

Kʼiatsa je si̱miyui je chjota xi ñaki makjain kjoaixile xi tʼatsʼe Niná kʼoa xi sínʼiotʼa jmeni tso, so̱koli je nganʼio xi machjénli. Kʼoati sinʼio tokuin kʼiatsa je kʼoainganʼiolai je xi jetjíonroajen kon. Tʼinyalai jmeni xi makjainli xi tʼatsʼe Jeobá kʼoa jmeni xi sʼin nichxin xi sʼa nroa. Tisenkoai xi ngikʼa kʼoa ali nikjinjinlai je xi tsjoakeli kʼoa xi makjaojinle xi tʼatsi (Proverbios 18:1; 1 Corintios 15:58).

KOAAN I̱ SʼIAIN:

• Je chja̱kaonajmí je xi ñaki miyoli mani kʼoa tʼaiʼndai nga katabasenkaoli

• Tʼeyanajmílai jokjoantjínni je kjoa xi tibitjatojin