Pablo yaa Roma nikasén

Yaa Jerusalén kisikjetʼani xi koanjanni kʼa nga kjin kitsoyason je Pablo. Nga ya tíjna, ndoyá kinikʼéjnaʼya. Kʼoa ñandia kʼianga njio jngo sén tsabe jñani i̱ kitsole Jesús: “Yaa kʼuín ya Roma kʼoa yaa kʼuínyai”. Xijekoan, yaa kichaní Pablo ya Cesarea. Jao nó nga ya tsakʼejnaʼya ndoyá. Ñandia nga ya tíjna ngixko̱n Festo, ya jña sʼendajin kjoa, i kitso: “Mena nga je César katabʼéndajin kjoana ya Roma”. Kʼoa je Festo i kitso: “Tsa meli nga je César kʼoendajin kjoali, yaa sikaséntʼale”. Kuinga jngo chitso xi ya Roma ki kinikʼéjnayani Pablo. Kʼoa kikao je Lucas kao Aristarco.

Kʼianga tjíofijin ndáchikon nkjín nichxin jaʼa ntjao̱nʼio kao jtsínʼio kʼoa tsín tijosʼin kikaoni je chitso. Kʼoakitso ngatsʼi nga kuiyá. Tonga je Pablo i kitsole: “Jngo ánkjele Niná xi i̱ kitsona, li nokjonjin, kuichoni ya Roma kʼoa je chjota xi tjíoya chitso kuitjontjainí. Nʼiojin katamao. Likui i̱ kuiyá”.

Teño nichxin nga likui tikoanxa̱nni je jtsínʼio kao ntjao̱nʼio. Tonga tochan tsabe jñani jenangi. Yaa kicho ʼnde xi tíjnajin ndáchikon xi Malta ʼmi. Yaa kisʼejnanʼio je chitso kʼoa koanxkoaa, tonga je chjota xi 276 mani xi tjíoya chitso nda kicho saʼnda ndainandá. Tjínkʼa xi xkoa̱le chitso kitsoa kʼoa xi tokʼoasʼin kijin nandá. Je chjota xi ya tsʼe Malta kisikuindaa kʼoa jngo lʼí tsakʼétse xi kisisonile yaole.

Nga jejan sá jaʼato, je sondado yaa Roma kikao je Pablo. Kʼianga kicho ya Roma, je ndsʼee kiskoeyaa kʼoa kui xi kisinʼiojin je Pablo kʼoa kitsjoale kjoanda Niná. Ningalani kinikʼéjnanʼio je Pablo tsakʼaiʼndele nga jngo ndʼia xi sʼechjíntjai tsakʼejnaʼya kʼoa jngo sondado kisikuinda. Jao nó nga ya tsakʼejna. Kichokonle chjota kʼoa je Pablo kitsoyale xi tʼatsʼe Chjotaxále Niná kao tʼatsʼe Jesús. Je Pablo kʼoati kiski karta xi kisikasénle je jtín xi tjío ya Asia Menor kao Judea. Jé Pablo kisichjén Jeobá nga kikao énnda chjotse ngakjijnda.