KJOAʼMIYA 51
Jósʼiaan nga sa̱sénle je Jeobá jotso én xi kuinókjoaa
Kʼianga kisindaná je Jeobá kui kjoatjao kitsjoaná nga maná nokjoaa. Kuinga kuenta sʼínni josʼin nichjén kjoatjao jebi (tʼexkiai Santiago 1:26). Tonga jósʼiaan nga sa̱sénle Jeobá josʼin nga nokjoaa.
1. Jméni xi koa̱n sʼiaan nga nda si̱chjén kjoatjao jebi
Je Biblia itso: “Tijetakon xíngio tʼaisalao nganʼio xíngio” (1 Tesalonicenses 5:11). A ʼyaxkonní tsa ʼyani xi jetínroajen kon. Koaan kuisenkoai nga nda katasʼe kon. Kʼoatʼinlai nga nʼio ʼyachjí. Koaan kʼoakʼuínlai jñani nda sʼín. A faʼaitsjen jngoli textole Biblia xi tsjoánganʼiole tsa ʼyani xi ʼyaxkuin. Nʼio nkjín texto tjío xi koa̱n chjoéjin. Kuenta tʼiain nga nʼio koasenkao xi ngikʼa josʼin chja̱kaonajmí. Kuinga machjénsíni nga ngasin nganda kuinókjoai (Proverbios 15:1).
2. Jmé énni xi tsín koa̱n kuinókjoaa
Je Biblia itso: “Nitojngojin én xi chʼao tso nʼósjenio ndsoʼbao” (tʼexkiai Efesios 4:29). Jebi kui xi tsonile nga tsín koa̱n kui si̱chjén én xi chʼao tso, éntsʼen, én xi nangi sikatío xi ngikʼa kʼoa xi sikiʼaon kjoafa’aitsjenle. Xi ijngosani, tsín koa̱n énndiso kuinókjoaa kʼoa tsín koa̱n chʼaosʼin si̱kʼaxkiaa xíngiaa (tʼexkiai Proverbios 16:28).
3. Jmé xi koasenkaoná nga kui én xi nda tso kuinókjoaa
Jmeni xi bixoán kui bakó jmeni xi nikjaʼaitsjeen kʼoa jotjín tokoán (Lucas 6:45). Kuinga machjénsíni nga kʼoasʼin si̱ngalee yaoná nga kui si̱kjaʼaitsjeen je xi ndatjín. Xi tsonile, “ngayije xi kjoakixi, ngayije xi tsje tjín, ngayije xi naská tjín, tojñanile xi tjínle kjoanʼosjenda” (Filipenses 4:8). Kʼianga kui xi ndatjín sʼe̱ya kjoafaʼaitsjenná, machjén nga nda chjoéjiaan jmeni xi bʼetsaojinkoaa kʼoa kao je xi nimiyoaa (Proverbios 13:20). Kʼoati machjén nga ndakjoanla si̱kjaʼaitsjeen nga kjesa nokjoajián. Tikjaʼaitsjain jókʼoe kon xi kjaʼaí jmeni xi sí. Ya Biblia itso: “Je énle chjota xi tsín síkjaʼaitsjen yaa mangóson joni tsa ki̱cha̱ tíbʼésʼenjin yaoná, tonga je énle chjota xi chjine síndayaná” (Proverbios 12:18).
KATAʼYASAI JME XI TÍNCHJA̱NI
Kataʼyala jótso je én xi sasénle je Jeobá kʼoa xi tsjoánganʼiole xi ngikʼa.
4. Chósonnilai jmeni xi si
Sakʼoa skanni kʼoamaná jmeni xi bixoán (Santiago 3:2). Tʼexkiao Gálatas 5:22, 23 kʼoa cho̱bayaño jebi:
Jñánile xi síkʼaxki̱ texto jebi xi meli si̱jélai Jeobá, xi koasenkaoli nga chósonnilai josʼin kuinókjoai. Jósʼin koasenkaoli tsa kʼoasʼiain jmeni xi si̱jái.
Tʼexkiao 1 Corintios 15:33 kʼoa cho̱bayaño jebi:
Jósʼin nikjaʼaitsjain, a kʼoetʼali josʼin nchja̱ je miyo xi tjínli kʼoa kao xi bʼetsaojinkoai. Jósʼin kʼoetʼali.
Jñá nroani jotso én xi nokjoaa
Tʼexkiao Eclesiastés 3:1, 7 kʼoa cho̱bayaño jebi:
Jósingái ji, kʼiáni machjén nga jyó kuiyoaa kʼoa kʼiáni machjén nga tochóyakaola jme xi kuixoán.
5. Nda tikʼaxki̱ xi ngikʼa
Jmé xi sʼiaan nga tsínkui kʼoakuixoán jmeni xi sikiʼaon xi ngikʼa. Chótsenlao VIDEO kʼoa cho̱bayaño jebi:
Ánni nga tsín tichʼaosʼin kisikʼaxki̱ni xi ngikʼa je ndsʼee xi faʼa ya video.
Jmé xi tsakasenkao nga tsín tikʼoakisʼinni.
Tʼexkiao Eclesiastés 7:16 kʼoa cho̱bayaño jebi:
Jméni xi tjínnele si̱kjaʼaitsjeen nga kjesa chʼaosʼin nikʼaxki̱jián xi kjaʼaí.
Tʼexkiao Eclesiastés 7:21, 22 kʼoa cho̱bayaño jebi:
Tsa ʼya xi chʼaosʼin sikʼaxki̱li, a koasenkaoli texto jebi nga tsín yaoli si̱jtilai. Ánni.
6. Nda tso én tichjain nga chja̱koai familiali
Je Jeobá kui xi mele nga nda tso én si̱chjén nga chja̱koaa familianá kʼoa nga ngasin nganda chja̱koaa. Chótsenlao VIDEO kʼoa cho̱bayaño jebi:
Jméni xi koasenkaoli nga ngasin nganda chja̱koai je familiali.
Tʼexkiao Efesios 4:31, 32 kʼoa cho̱bayaño jebi:
Jótso én xi chja̱koaa je familianá nga nda katasatío kon.
Je Jeobá kʼoakitso jokisʼe kon xi tʼatsʼe Jesús. Tʼexkiao Mateo 17:5 kʼoa cho̱bayaño jebi:
Jósʼin chjénngilai Jeobá nga chja̱koai familiali.
Kʼoatʼinlai xi ngikʼa jme xi nda sʼín
TJÍNKʼA XI I̱ TSO: “Kʼoaxian josʼin sikjaʼaitsjen, tsa tsín sasénle xi ngikʼa to kuenta tsʼejin”.
Jósingái ji, a ndatjín tsa kʼoakuixoán, ánni.
XI KACHOTʼAYÁ
Je én xi nokjoaa koaan koasenkao kʼoa tsa sikiʼaon je xíngiaa. Machjén nga nda chósonnilee jótso én xi kuinókjoaa, kʼiáni kʼoa jósʼin kuinókjoaa.
Jmé xi kamajinli
Jósʼiain nga kuinyakao xi ngikʼa je én xi kuinókjoai.
Jñánile je én xi tsín koa̱n kuinókjoaa.
Jmé xi koasenkaoná nga kui én kuinókjoaa je xi kuinyakao xíngiaa.
XI KOASENKAOSALI
Jméni xi koasenkaoná nga kui én xi nda tso kuinókjoaa.
Kataʼyai jméni xi koasenkaoli nga tsínkui én xi chʼao tso kuinókjoai.
“A nʼio chʼaotjín tsa chʼao tso én kuinókjoaa” (Yaa faʼaitʼa ya Internet ya jw.org)
Kataʼyai jókoa̱n sʼiain nga tsín énndiso cha̱nibasuin.
Kataʼyai jósʼin tsakasenkao Jeobá jngo chjota xi chʼao tso én nchja̱ tsakai.
“Kisikjaʼaitsjenña josʼin tifikoa yaona” (La Atalaya, 1 de agosto de 2013)