Ánni nga nʼio chjísínile josóyoaa kʼoa jokjoan najño xi chʼa̱kjá

Nga jngó jngoá tsen tsjoachañá jokjoan najño xi chʼakjá kʼoa josoyoaa. Tsa kjuintjenngiaa kjoafaʼaitsjen xi faʼaitʼa Biblia koaanná chjoéjiaan jokjoan najño xi chʼa̱kjá xi sa̱sénná kʼoa xi tsjoa kʼoe kon je Jeobá. Kataʼyala kʼa kjoafaʼaitsjen xi faʼaitʼa Biblia.

1. Jñánile kjoafaʼaitsjen xi koasenkaoná nga nda chjoéjiaan jokjoan najño xi chʼa̱kjá

Je Biblia itso: “Katabʼakjá najño xi nda xi bakinle. Katasʼe i̱tséle kjoasoatakon nga nda katafikao yaole”. Xi ijngosani, machjén nga tsje kjoan najño xi chʼa̱kjá nga̱ kʼoasʼin koakoñá nga je Niná ʼyaxkoán (1 Timoteo 2:​9, 10). Texto jebi ño kjoafaʼaitsjen tsjoáná josóyoaa. Xi títjon, kui chʼa̱kjá “najño xi nda xi bakinná”. Jejin tsaʼyai jofayo je ndsʼee xi bichó kjoajtín, ninga kjaʼaí kjaʼaí kjoan najño xi tsjoake, tonga jokjoan najñole kʼoa jobatío ntsja̱jko̱ bakó nga bexkón je Niná. Xi majaoni, kʼianga katasʼe i̱tsená kjoasoatakon, kui xi tsonile nga tsínkui chʼa̱kjá najño xi kjoajndí ska̱niya jko̱ xi ngikʼa kʼoa nga tsín toñá skótsenná je chjota. Xi majanni, nga nda koanngínkoaa yaoná machjén nga nda si̱kjaʼaitsjeen kʼoa tsín tokui nga kʼoati sóyoñá nga kʼoafayo je chjota ninga tsín nda matsen. Xi mañoni, josoyoaa tjínnele koako nga je Niná ʼyaxkoán (1 Corintios 10:​31).

2. Ánni nga kuenta sʼiansíñá xi ngikʼa kʼianga chjoéjiaan je najño xi chʼa̱kjá

Ningalani tsín ʼya xi kʼoakuitsoná jokjoan najño xi chʼa̱kjá, tonga machjén nga kuenta sʼiaan xi ngikʼa ánni nga tsín kjoafaʼaitsjenle si̱katéngiñá. Kui xi mená nga nda katasatío kon xíngiaa kʼoa nga kuinngʼasa kjoamakjainle (tʼexkiai Romanos 15:​1, 2).

3. Tsa ndakjoan najño xi chʼa̱kjá, a kuinyakao chjota nga koa̱nmele skoe̱ xi tʼatsʼe Jeobá

Chosonnilee jokjoan najño xi nichjén ngantsjai, tonga ngisaa chosonnilee josoyoaa kʼianga mangián kjoajtín kʼoa kʼianga ʼmiyasoán. Kui xi mená nga kjuinrʼoé chjota je Énle Niná. Mená nga katabe xi tʼatsʼe Niná kʼoa nga katabe nga nʼio ndatjín je “kjoafaʼaitsjenle Niná xi bʼasjentjainá” (Tito 2:​10).

KATAʼYASAI JME XI TÍNCHJA̱NI

4. Nga ndakjoan najño xi nichjén kʼoasʼin bakoñá nga ʼyaxkoán je Jeobá

Ánni nga nʼio kuenta nʼiañá jokjoan najño xi nichjén. Tʼexkiao Salmo 47:2 kʼoa cho̱bayaño jebi:

• Kʼianga jaʼaínle Jeobá kichʼá, jókjoan je najño xi tjínnele chʼa̱kjá.

• Jósingái ji, a machjén nga chósonnilee jokjoan najño xi chʼa̱kjá kʼianga mangián kjoajtín kʼoa kʼianga ʼmiyasoán je Énle Niná. Ánni.

5. Jmé xi koasenkaoná nga nda chjoéjiaan je najño xi chʼa̱kjá kʼoa josóyoaa

Chótsenlao VIDEO.

VIDEO: “Kʼoatʼiaon ngayije xi tʼatsʼe kjoajeyale Niná” (10:​18)

Je xi ngisa chjíle kuinga ndakjoan najño xi chʼa̱kjá kʼoa nga tsje kjoan, ali tsakuijin jotjín chjíle. Tʼexkiao 1 Corintios 10:​24 kao 1 Timoteo 2:​9, 10. Xijekoa̱n, cho̱bayaño ánni nga tsín koa̱n si̱chjénñá...

• najño xi tsín tsje kjoan, xi tsín nda matsen, kʼoa xi tokjoan tomani.

• najño xi kjiajonnʼio, xi koto kjoan, kʼoa xi kui ska̱niya jko̱ xíngiaa xi kjoajndí tjenkao.

Ningalani tsín tikui mangíntjenngiñá je kjoatéxoma xi tsakʼaile je Moisés, tonga basenkaoná nga ʼyaa josʼin síkjaʼaitsjen je Jeobá. Tʼexkiao Deuteronomio 22:5 kʼoa cho̱bayaño jebi:

• Ánni nga tsín koa̱n kui najño sichjénni jngo chjoón tsa jo xʼin sʼin koa̱ntsen, kʼoa jngo xʼin tsa jo chjoón sʼin koa̱ntsen.

Tʼexkiao 1 Corintios 10:​32, 33 kao 1 Juan 2:​15, 16 kʼoa cho̱bayaño jebi:

• Ánni nga tjínnenile kuenta sʼiaan tsa tsín sasénle josoyoaa je chjota xi ya tsʼe ʼndená, kʼoa tsa je ndsʼee xi tjío ya jinjtín.

• Jókjoan najño síchjén kʼoa jófayo je chjota xi tjín ya ʼndeli.

• Jñánile xi tsín bakinle nga kʼoakjoáyo je xi chjotale Cristo ma. Ánni.

XI KACHOTʼAYÁ

Kʼianga nda chjoejiaan jokjoan najño xi chʼakjá kʼoa josoyoaa kʼoasʼin bakoñá nga ʼyaxkoán je Jeobá kʼoa kao chjota xi kjaʼaí.

Jmé xi kamajinli

• Ánni nga kuenta sʼínni je Jeobá jokjoan najño xi chʼakjá.

• Jñánile texto xi koasenkaoná nga jchaa jokjoan najño xi chʼa̱kjá kʼoa josóyoaa.

• Jósʼin sikʼaxki̱ Niná je chjota xi totʼatsʼe najño xi chʼakjá.

XI KOASENKAOSALI

Jósʼin síkjaʼaitsjen chjota xi tʼatsi nga be jokjoan najño xi chʼakjái.

“Jósʼin matsejian” (Yaa faʼaitʼa ya Internet ya jw.org)

Kataʼyai ánni nga títjonkjoanla nda chósonnilee tsa tatuaje kʼoéjnatʼaa yaoná.

“Jótso je Biblia xi tʼatsʼe tatuaje” (Yaa faʼaitʼa ya Internet ya jw.org)

Kataʼyasai kjoafaʼaitsjen xi koasenkaoli nga nda chjoéjin jmeni xi sʼiain.

“A bʼasjengʼa Niná jokjoan najño xi chʼakjá” (Xo̱n xi Bájinkonná, septiembre 2016)

Kataʼyai jméni xi tsakasenkao jngo chjoón nga tsín tikisikʼatoneni choa̱le josʼin kisikjaʼaitsjen tʼatsʼe najño xi síchjén je chjota.

“Alikui kisasenna jofayo je chjota” (¡Despertad!, 22 de diciembre de 2003)