KJOAʼMIYA 56
Kʼoainganʼioá nga ndasʼin kuiyoaa ya jinjtín
Kʼianga ya tiyokoaa je ndsʼee, kʼoati satío tokoán jokisʼe kon je rey David, i kitso: “Nʼio nda kʼoa nʼio matsjoaná nga jtín tjío je ndsʼee” (Salmo 133:1). Tonga kuinga jtín tiyoñá nga bʼainganʼioá ngatsʼiaa.
1. Jósʼin ʼyañá nga ñaki jtín sʼin tjío je testigole Jeobá ngakjijnda Sonʼnde
Kʼiatsa xin naxinandá kʼuín kʼoa kʼuín je kjoajtín xi satíoná, ninga tsín koa̱njinli je én xi ya nokjoa tonga alikuijin tsen koa̱nli tsa xin naxinandá tijnai, nga̱ jin xi testigole Jeobá maijin tikui xo̱n chotʼayanijin ngakjijnda Sonʼnde. Xi ijngosani, bʼenelaijin yaonajin nga tsjoacha maijin xíngijin. Tojña naxinandáni tiyuijin kui je jaʼaínle Jeobá nichjainjin kʼoa tojngo nixálaijin ngatsʼijin (Sofonías 3:9).
2. Jósʼin koa̱n kʼoainganʼiui nga nda kuiyoaa ya jinjtín
Je Biblia kʼoatso nga ñaki ni̱ma̱ná katanroajinni nga tsjoacha katamaa xíngiaa (1 Pedro 1:22). Jósʼin koa̱n kʼuíntjenngi kjoafaʼaitsjen jebi. ʼNdele nga tokui chótsenlai jñani saténgi je xi ngikʼa, tosa kui chótsenlai jñani nda sʼín. Ali tsa tojejin nimiyui je xi mangósuin, kʼoati timiyui je ndsʼee kao tichjaa xi xin ʼndele kʼoa xi kjaʼaísʼin ngale. Kʼoa chja̱ʼaxinlai yaoli tsa kʼoasʼin ngali nga chjota chʼasjengi (tʼexkiai 1 Pedro 2:17).a
3. Jméni xi sʼiain kʼiatsa kjoa sʼe̱li kao jngo ndsʼee
Ningalani jtín sʼin tiyoaa tonga nga chjotajée maa sakʼoa kjoa sʼená kao xíngiaa, kuinga i̱ tsoniná je Biblia: “Tichatʼalao xíngio”. Kʼoa kʼoatsoná anni, itso: “Je Jeobá kao kjoatsjoa kisichatʼano, kʼoati tʼiaon tsanda jon” (tʼexkiai Colosenses 3:13, TNM). Ningalani bijnyijée ngixko̱n Jeobá, tonga je síchatʼaná kʼoa kui xi mele nga si̱chatʼalee je ndsʼee tsa jmeni xi kasíkaoná. Tsa ʼyani xi jesa jotsakʼinlai, chja̱kaonajmí kʼoa tʼendajion je kjoa xi kisʼeno (tʼexkiai Mateo 5:23, 24).b
KATAʼYASAI JME XI TÍNCHJA̱NI
Kataʼyala jókoa̱n sʼiain ya jinjtín nga nda kʼuínkoai je ndsʼee kʼoa nga jtín sʼin kuiyo.
Jmé xi sʼiain nga nda cho̱ba ijngokʼao kao ndsʼee
4. Ali tsa chjotajin chʼasjengi
Kui xi mená nga tsjoacha koaan ngatsʼi je ndsʼee. Tonga sakʼoa tsín tsjoacha kʼa je xíngiaa, tsakui nichxin kuinga tsín kʼoasʼín jonʼia. Jméni xi koasenkaoná nga tsín kʼoakatamaa. Tʼexkiao Hechos 10:34, 35 kʼoa cho̱bayaño jebi:
Je Jeobá alikui chjota bʼasjengi, kui xi mele nga testigole katama toʼya chjotani. Kʼoa ji, jósʼin tjínnele jchatokuin je chjota xi tsín mangósuin kʼoa tsa je xi xin tsʼe.
Jósʼin bʼasjengi xínkjín je chjota ya jñani tsi. Kʼoa ánni nga tsín menili nga kʼoati sʼiain.
Tʼexkiao 2 Corintios 6:11-13 kʼoa cho̱bayaño jebi:
Jméni xi koa̱n sʼiain nga tsjoacha koai̱n ngatsʼi je ndsʼee kao tichjaa.
5. Tichatʼalao xíngio kʼoa cho̱bandaño
Je Jeobá síchatʼaná ninga ñá alijme xi tjínná xi si̱chatʼalee. Tʼexkiao Salmo 86:5 kʼoa cho̱bayaño jebi:
Tojo tso texto jebi, jméni xi bakóyaná josʼin síchatʼaná je Jeobá.
A bʼailai kjoanda je Jeobá kʼianga síchatʼaná. Ánni.
Jméni xosikao sakʼoaná nga tsín nda kjuinkaoñá xíngiaa.
Jméni xi sʼiaan nga chjénngilee je Jeobá kʼoa nga jtín sʼin kuiyoaa kao je ndsʼee. Tʼexkiao Proverbios 19:11 kʼoa cho̱bayaño jebi:
Kʼiatsa ʼyani xi kui kʼoasʼín jmeni xi tsín sasénli, jméni xi koa̱n sʼiain.
Sakʼoa ñá xi tjín xi nikoaa je xi ngikʼa, jméni xi tjínnele sʼiaan tsa kʼoakoa̱n. Chótsenlao VIDEO kʼoa cho̱bayaño jebi.
Jókisʼin je tichjaa xi bakó ya video nga nda tsakjao ijngokʼani kao je tichjaa xi ijngo.
6. Kui kuenta sʼiaan jñani nda sʼín je ndsʼee
Kʼianga ngisasa nda ʼyaxkoaan je ndsʼee kao je tichjaa ʼyañá jmeni xi nda sʼín kʼoa jmeni xi mai. Jméni xi tjínnele sʼiaan nga tokui kuenta sʼiaan jñani nda sʼín. Chótsenlao VIDEO kʼoa cho̱bayaño jebi:
Jméni xi koasenkaoli nga tokui kuenta sʼiain jñani nda sʼín je ndsʼee.
Je Jeobá kui kuenta sʼín jñani nda nʼia. Tʼexkiao 2 Crónicas 16:9a kʼoa cho̱bayaño jebi:
Jósʼe tokuin nga ʼyai nga tokui kuenta sʼín je Jeobá jñani nda nʼiai.
Ninga rayajon kji jngo anillo xi kui koanndani je tsojmi xi nʼio chjí, tojo chjíle. Kʼoatisʼinni je ndsʼee, chjotajée ma ngatsʼi, tonga je Jeobá nʼio chjí bekon
TJÍNKʼA XI I̱ TSO: “Sichatʼale tonga alikʼia jchajinna”.
Jósingái ji, ánni nga ndatjínni nga ñaki si̱chatʼa kjoaixilee xíngiaa.
XI KACHOTʼAYÁ
Tsa si̱chatʼalai je ndsʼee kʼoa tsa tsjoacha koai̱n ngatsʼi ndasʼin kuiyoaa ya jinjtín.
Jmé xi kamajinli
Jókoa̱n sʼiain nga tsín chjota chʼa̱sjengi.
Jméni xi koa̱n sʼiain kʼiatsa kjoa sʼe̱li kao jngo ndsʼee.
A meli kʼoati sʼiain josʼín je Jeobá kʼianga síchatʼaná. Ánni.
XI KOASENKAOSALI
Kataʼyai je choa̱ xi kisichjén je Jesús je xi basenkaoná nga tsín xíngiaa joʼmilee.
A tjínnele si̱jé kjoanichatʼa kʼiatsa tsín jme xi chʼaotjín kanʼia.
“Kʼianga nijé kjoanichatʼa ndasʼin biyoaa” (La Atalaya, 1 de noviembre de 2002)
ʼMiyaná nga tongóson sʼin jchatokoán xíngiaa.
Kataʼyai jósʼin kʼoéndajiaan je kjoa xi sʼená kao xíngiaa ánni nga nda kuiyoñá ya jinjtín.
“Kao kjoatsjoacha kʼoéndajiaan je kjoa xi sʼená kao xíngiaa” (Xo̱n xi Bájinkonná, mayo 2016)