KJOAʼMIYA 59
Koaan kixi kʼuíntʼalai Niná ninga chjota koaitjenngikeli
Ñá xi chjotale Cristo maa toxá chjota batiochjoaniná kʼoa saʼnda fitjenngikená, tonga a koaan nga kui kuijkónlee.
1. Jósʼin ʼyañá nga toxá koaitjenngikeniná je chjota
Je Biblia itso: “Ngatsʼi xi mele nga tsje koatiokontʼale Cristo Jesús, kʼoatisʼin kjoaʼa kjoañʼai” (2 Timoteo 3:12). Kuinga chjota kitjenngikeni Jesús nga tsín i̱ kitsjonjin yaole jmeni xi chon sonʼnde. Kʼoa nga tsín kʼoati ya nojiaan yaoná kuinga fitjenngikeniná je chjotaxá kʼoa kao je religión xi tjín (Juan 15:18, 19).
2. Jmé xi sʼiaan nga tongini kuiyondaa kʼianga koaitjenngikená je chjota
Machjén nga kʼoakʼoé tokoán nga je Jeobá koasenkaoná. Kuinga machjénni nga si̱kʼayaa nichxin nga kʼoétsʼoaa kʼoa nga kʼoéxkiaa je Biblia. Xi ijngosani, nga ntsjaintsjai koanngián nga satíoná kjoajtín. Tsa kʼoasʼiaan kui xi koasenkaoná nga chókjoajinná nga chjota koaitjenngikená kʼoa tsa kʼiaje̱ nga je xíngiaa xi koatiochjoaná. Je pastro Pablo kjitʼaa kitjenngike je chjota, kʼoa i kitso: “Jé Nainá xi basenkaona, likui tsakjonnia” (Hebreos 13:6).
Ijngo koya xi kʼoati basenkaoná nga nʼiojin maa kʼiaa nga kjitʼa ʼmiyasoán. Kʼianga ʼmiyalee chjota basenkaoná nga ngisa ninʼiotʼaa yaoná je Jeobá kʼoa nga tsín chjota nokjonlee (Proverbios 29:25). Tsa nʼiojin koaan ndʼaibi, alikui jao tjín tokoán nga tosi tonda kʼuínyasoán ninga koatechjoale je chjotaxá je xá xi nʼia (1 Tesalonicenses 2:2).
3. Jósʼin basenkaoná kʼianga kaná nga chjota fitjenngikená
Alikui ʼya xi mele nga chjota koaitjenngike. Tonga kʼianga chókjoajinná ngisaa nʼio sʼejna je kjoamakjainná. Ngisaa machriantʼalee je Jeobá, nga̱ ʼyañá nga je basenkaoná kʼianga tsín tichókjoaniná (tʼexkiai Santiago 1:2-4). Je Jeobá aon male kʼianga kjoañʼai chjaʼá, tonga tsjoa male kʼianga chókjoajinná. Je Biblia itso: “Tsa jchókjoano kʼia nga bʼaino kjoañʼai nga nda nʼiao, jebi xi kjoakixi sasénle Niná” (1 Pedro 2:20). Je xi kixi koaitʼale Niná kʼoa xi chókjoajinle, je Jeobá kui kjoanichikontʼain tsjoále nga koa̱n koatio ngantsjai nichxin i̱ Sonʼnde, kʼianga tsín tiʼya xi kontra koationile je naxinandále Niná (Mateo 24:13).
KATAʼYASAI JME XI TÍNCHJA̱NI
Kataʼyala jósʼin nga koa̱n kixi kjuintʼalee je Jeobá kʼianga chjota koaitjenngikená kʼoa jmé kjoanichikontʼain xi so̱koná kʼiatsa kʼoasʼiaan.
4. Koaan kixi kʼuíntʼalai Niná ninga koatiochjoali xíngi
Je Jesús kʼoakitso nga tjíokʼa je xíngiaa xi koatiochjoaná nga je Jeobá si̱xálee. Tʼexkiao Mateo 10:34-36 kʼoa cho̱bayaño jebi:
Jótso sakʼoa je xíngiaa kʼianga je Jeobá nixálee.
Kataʼyala kʼa je chjota xi kui kjoa jaʼatojin. Chótsenlao VIDEO kʼoa cho̱bayaño jebi:
Jósʼiain kʼiatsa jngo xíngi kʼoa tsa jngo miyoli xi kʼoakuitsoli nga tikʼéjnai je Jeobá.
Tʼexkiao Salmo 27:10 kao Marcos 10:29, 30. Kʼianga jekʼoéxkiao nga jngó jngó texto, cho̱bayaño jebi:
Jósʼin koasenkaoli én jebi kʼiatsa xíngi kʼoa tsa miyoli koatiochjoali.
5. Tosi tonda tixálai Jeobá ninga chjota koaitjenngikeli
Tjínnele nʼiojin koaan nga si̱xálee je Jeobá ninga chjota koatiochjoaná. Chótsenlao VIDEO kʼoa cho̱bayaño jebi:
Jméni xi faʼa ya video xi koasenkaoli nga nʼiojin koai̱n.
Tʼexkiao Hechos 5:27-29 kao Hebreos 10:24, 25. Kʼianga jekʼoéxkiao nga jngó jngó texto, cho̱bayaño jebi:
Ánni nga nʼio chjísínile nga tosi tonda si̱xálee je Jeobá ninga tsín titsjoáʼndeniná je chjotaxá nga kʼuínyasoán kʼoa nga kuiyojtián.
6. Jé Jeobá koasenkaoli nga chókjoajinli
Je testigole Jeobá xi xinxin naxinandále, je xi sʼa xti kʼoa xi jekoanjchínga kixi tjíofitʼale Jeobá ninga chjota tjíofitjenngike. Nga jchai jmé xi tjíobinyakao, chótsenlao VIDEO kʼoa cho̱bayaño jebi:
Jmé xi tsakinyakao ndsʼee jebi kʼianga kichokjoajinle je kjoa xi jaʼatojin.
Tʼexkiao Romanos 8:35 kao 37-39, kʼoa kao 2 Corintios 4:7. Kʼianga jekʼoéxkiao nga jngó jngó texto, cho̱bayaño jebi:
Tojo tso texto jebi, jósʼin ʼyani nga chókjoajinli tojme kjoa xi kuitjátojin.
Tʼexkiao Mateo 5:10-12 kʼoa cho̱bayaño jebi:
Ánni nga koa̱n tsjoa sʼe̱ni tokuin ninga chjota koaitjenngikeli.
Millón mani je choʼndale Jeobá xi tjíochókjoajinle ninga chjota tjíofitjenngike, kʼoati chókjoajinli tsanda ji
TJÍNKʼA XI I̱ TSO: “Nitsejinla chókjoajinna tsa an xi chjota koaitjenngikena”.
Tsa ʼya xi kʼoatso, jñánile texto xi koakolai xi koasenkao nga nʼiojin koa̱n.
XI KACHOTʼAYÁ
Je Jeobá chjí bekon jokji bʼenelee yaoná nga nixálee ninga chjota fitjenngikená. Chókjoajinná nga̱ ʼyañá nga je koasenkaoná.
Jmé xi kamajinli
Jómani ʼyaa nga toxá koaitjenngikeniná je chjota.
Jmé xi koa̱n sʼiain nga tongini kuijnandai nga kjesa fitjenngikejinná je chjota.
Jméni xi koasenkaoli nga kʼoakʼoaí tokuin nga koa̱n tosi tonda si̱xálai Jeobá ninga tojme kjoa kuitjátojin.
XI KOASENKAOSALI
Kataʼyai jósʼin tsakasenkao Jeobá jngo ndsʼee xi ndoyá kinikʼéjnaʼya nga kixi koan.
Kataʼyai jméni xi tsakasenkao jngo ndsʼee kao chjoónle nga kixi kitʼale Jeobá ninga nkjín nó nga chjota tsakatiochjoale.
Kataʼyai jméni xi koasenkaoli nga nʼiojin koai̱n kʼianga chjota koaitjenngikeli.
“Tongini kuiyondaa kʼianga chjota koaitjenngikená” (Xo̱n xi Bájinkonná, julio 2019)
Jósʼin tjínnele jchatokoán xíngiaa xi batiochjoaná. Jósʼiaan nga nda kjuinkoaa xíngiaa kʼoa nga kixi kjuintʼalee je Jeobá.
“Je xi kjoakixi alikui kjoanyʼán tjenkao kjoajchán tjenkao” (Xo̱n xi Bájinkonná, octubre 2017)