APÉNDICE C
Jósʼin koakoyalee chjota kao libro Koaan nda kuiyoaa ngantsjai nichxin
Je ndsʼee tsakʼétsʼoaa kʼoa nda kisikjaʼaitsjen jme xi koa̱n kjoaʼaítʼa je libro Koaan nda kuiyoaa ngantsjai nichxin. Kʼianga nda si̱chjain xo̱n jebi tʼintjenngi kjoafaʼaitsjen xi faʼaitʼa i̱bi kʼianga kʼoailai estudio je chjota.
Nga kjesa bʼaijin estudio
1. Nda tijnandai. Tikjaʼaitsjain jmé xi machjénle je xi tiʼmiyalai, jmé kjoa xi tífaʼatojin kʼoa jósʼin makjainle. Tikjaʼaitsjain jméni xi tsín koa̱njinle kʼoa xi ñʼai koa̱nle nga sitjoson. Chótʼayajin kʼoa chótsenlai jme xi faʼaitʼa jñani “Xi koasenkaosali” tso kʼoa tikjaʼaitsjain jósʼin koasenkao je xi tiʼmiyalai. Tsa kʼoasʼiain to jeʼyai jñanile xi si̱chjáin tsa koa̱nchjénli.
Nga tibʼailai estudio
2. Tsa mele je xi tiʼmiyalai koaan kʼoétsʼoai nga kʼoétsʼiakoai kʼoa nga si̱kjetʼai.
3. Ali tojijin nokjoai, tosa kui tichjain jmeni xi faʼaitʼa je xo̱n xi tichotʼayao kʼoa tʼaiʼndelai nga kʼoakatatso josʼin síkjaʼaitsjen je xi tibʼailai estudio.
4. Kʼianga kʼoétsʼiakao nga jngó jngó sección, tʼexkiai jme xi tínchja̱ni kʼoa tikʼaxki̱ kʼai joʼmi kjoaʼmiya xi faʼaitʼa.
5. Kʼianga jekjoetʼano nga jngó jngó sección, chótʼayajion je kjoachjonangi xi faʼaitʼa jña tofetʼani jñani “Jmé xi koanjinli” tso, ánni nga kjoaʼaítsjennile je xi tiʼmiyalai jme xi kichotʼayao.
6. Kʼianga chótʼayao nga jngó jngó kjoaʼmiya:
Tʼexkiao párrafo xi tjíotítjon.
Tʼexkiao ngayeje texto xi “Tʼexkiao” tso.
Tsa koa̱nchjénno kʼoati koa̱n kʼoéxkiao texto xi ngikʼa.
Chótsenlao video xi faʼaitʼa jñani “Chótsenlao video” tso (tsa kʼianga tjínno josʼin chótsenlao).
Tatiolai ngayeje kjoachjonangi xi faʼaitʼa.
Chótsenlao je sén xi faʼaitʼa jñani “Kataʼyasai jme xi tínchja̱ni” tso.
Tichjain je recuadro jñani “Kʼoatʼiain jebi” tso, ánni nga skoe̱ni je xi tiʼmiyalai jme xi tjínnele sʼin. Kʼoatʼinlai jmesa xi koa̱n sʼin. Koaan kui kʼoasʼin jmeni xi faʼaitʼa recuadro kʼoa koaan tsa kjaʼaínile.
Chjónangilai tsa kisasenle jme xi tsakʼéxkia kʼoa tsa jngo video kiskotsenle xi faʼaitʼa jñani “Xi koasenkaosali” tso, kʼianga tosʼa tsakʼejnanda.
Ngisaa nda nga jngó jngó kjoaʼmiya chótʼayao nga ñandia ñandia.
Nga jechótʼayao
7. Ali chajinjinli xi tiʼmiyalai Biblia. Kʼoatʼinlai Jeobá nga katasíchikontʼain jokji tíbʼénele yaole je xi tiʼmiyalai kʼoa nga katatsjoáli kjoachjine ánni nga koa̱n kuisenkaoni.