Jósʼin kʼoétsʼiakaoñá nga chja̱koaa Énle Niná je chjota
1. Ánni nga tjínnesínile nga kuiyondakoaa jokjoan kʼuínlee chjota nga tosʼa kʼoétsʼiakaoñá nga chja̱koaa énle Niná.
1 Kʼiatsa ʼya xi kuinchja̱ná ya niʼyale nga kuichikoaa, tsakui nichxin sopa títjon tsjoáná kʼoa kʼia kʼoeyaná je xi ñaki kuichiñá. Kʼianga ʼmiyasoán énle Niná kʼoasʼin mangóson. Bʼantjaiya jokji tse chjakoaa nga jngó jngó chjota kʼoa jmeni xi ʼmilee nga tosʼa bʼetsʼiakaoñá nga chjakoaa, tonga tsa mená nga ñaki koa̱nndosinle je énle Niná tjínnele nga kuiyondakoaa jokjoan kʼuínlee nga tosʼa kʼoétsʼiakaoñá nga chja̱koaa (Prov. 15:28). Jméni xi kuenta sʼiaan kʼianga kuiyondaa jokuixoán.
2. Jósʼin kuiyondakoaa je én xi kʼoétsʼiakaoñá nga chja̱koaa chjota.
2 Kuenta sʼiaan jme xi mandosinle chjota. Kʼiatsa tsín nda tso én xi kʼoétsʼiakaoñá nga chja̱koaa chjota xi ʼmiyasonlee tochale likui tikjuinrʼoéniná. Kuinga machjénsíni nga si̱kjaʼaitsjenjiaan jméni xi mandosinle. A kui mandosinle josʼin batéxoma je chjotaxá. A kui tʼatsʼe yaniʼya axo kui nga kjoajchán sʼe. Nkjín chjota xi nʼio tsjoake nga kʼoatso josʼin síkjaʼaitsjen, kʼoa koaan chjónangilee tsa jmeni ánni nga kjoakaonajmísíniná. Kʼoa jmeni xi kuixoán koaan ya chjoénilee je choa̱ xi faʼaitʼa ya xo̱n Xá xi nʼia tʼatsʼe Niná. Kʼoa saʼnda koaan kʼia chótʼayá jokuixoán je Nichxin nga chotʼayajtían énle Niná ya niʼyaná.
3. Kʼiatsa kuenta sʼiaan josʼin beni chjota ya ʼndele kʼoa josʼin makjainle, jókoa̱n kʼuínlee kʼianga tosʼa kʼoétsʼiakoaa nga chja̱koaa.
3 Kuenta sʼiaan josʼin beni chjota ya ʼndele kʼoa josʼin makjainle. Tjín ʼnde jñani likui sasénle chjota kʼianga nʼio bʼetinkoaa énná. Kʼoa tjín ʼnde jñani kʼoasʼin beni nga títjon kjoanla chjonangilee jósʼin tjíoni kʼoa tsa jmesani, kʼoa skan kʼoabixoán jme xá kabichoñá. Ya ʼnde jñani bexkón Biblia je chjota, tochale koa̱n kui si̱kʼaxkiaa kʼianga tosʼa bʼetsʼiakaoñá nga chjakoaa (Hech. 2:14-17). Tonga tsa ya tiʼmiyasoán ya jñani me tsín makjainle tʼatsʼe Niná, tochale ngisa nda tsa tosa kʼia si̱kʼaxkiaa Biblia xi ngindia kuichochonlee (Hech. 17:22-31).
4. Jméni xi kuenta sʼiaan kʼianga kʼoétsʼiakoaa jokuixoán.
4 Jókuixoán nga tosʼa kʼoétsʼiakoaa nga kuinókjoaa. Tjínnele nga nda si̱kjaʼaitsjeen jokuixoán. Ngisa nda kjuinrʼoéná je chjota kʼiatsa totjíchoa̱ én kuinókjoaa. Chósonnilee josʼin kuinókjoaa. Katabe chjota nga tsjoa tjínná kʼoa nga mandosinná xi tʼatsʼe. Kʼiatsa kʼoasʼiaan, je chjota ngisa koa̱nndosinle nga kjuinrʼoé énle Niná (1 Cor. 10:21).