Si̱kʼabísoan xo̱n xi tsʼe kjoajtíntse

1. Kʼiáni kʼoétsʼiakaoñá nga kjoájinkoaan je chjota xi tʼatsʼe kjoajtíntse xi sʼe̱jnaná.

¹ Tsa tjínlani xi kʼoéndalee je miyoná kʼoa tsa je xi xíngiaa xi tse kjoama̱ sʼe̱nginá, ñaki kaojin kjoatsjoa kʼoakʼuínlee nga katanroakjen. Kʼoatisʼinni, nʼio tse kjoama̱ tísʼengi nga tísatíonda jmeni xi sa̱kóyaná nó jebi ya kjoajtíntse xi jan nichxin kʼoa kao je kjoajtíntse jñani nkjín naxinandá kjoaʼaíni xi kuicho. Kʼoa jan xomana tongini nga sʼe̱jna je kjoajtíntsená kjoájinkoaan chjota nga kʼoati katafi tsanda je. Jméni xi koasenkaoná nga ñaki kao kjoatsjoa kʼoasʼiaan.

2. Jméni xosikaoná nga nʼio kʼoénenilee yaoná nga kjoájinkoaan je chjota tʼatsʼe je kjoajtíntse.

² Tsa si̱kjaʼaitsjenjiaan josʼin basenkaoná nga jngó jngoá jmeni xi ʼmiyaná ya kjoajtíntse, kui xosikaoná nga nʼio kʼoénelee yaoná nga kjoájinkoaan je chjota nga kʼoati katafi (Is. 65:13, 14). Kʼoati si̱kjaʼaitsjenjiaan nga nʼio ndasʼin bichómani nga kʼoanʼia nga xki̱ nó. Jotjín chjota xi kjoájinkoaan tjínjinkʼa xi koai. Alikui ʼyaa jotjín koa̱nni xi kuicho. Tonga tsa kʼoénelee yaoná nga kʼoasʼiaan jé Jeobá chʼa̱sjengʼaa kʼoa kʼoasʼin skoe̱ni chjota je kjoanda xi tjínle (Sal. 145:3, 7; Apoc. 22:17).

3. Jósʼin si̱kʼabísoan je xo̱n xi tsʼe kjoajtíntse.

³ Je xi chjotajchínga sʼin tjío jé kʼoendajin jósʼin kʼoabíson je xo̱n xi tsʼe kjoajtíntse nga ngisasa nkjín chjota sʼe̱yole kʼoa tsa koa̱n sʼe̱yo ya jñani liʼya xi tjín je naile niʼya kʼoa tsa yaje̱ jña nʼio tjín chjota. Kʼianga xoto kao nga taingo kʼoati koa̱n si̱káyolee rebista je chjota tsa bele tokoán. Kʼoa tsa kʼia kʼoakaole nga xoto nga tífitsʼia je sá ngisa kui kʼoailee kjoandosin nga si̱kʼabísoan je xo̱n xi tsʼe kjoajtíntse tikʼoajinni tsa estudio kʼoétsʼiakoaa. Kʼoa xi jekjoaʼato jotjín nichxin sʼe̱jna nga kjoájinkoaan je chjota, nʼiojin tsjoa sʼe̱ tokoán nga tsakʼenelee yaoná nga kʼoakinʼia kʼoa nga nʼio nkjín chjota tsakjajinkoaan xi tʼatsʼe je kjoajtíntse jñani je Jeobá kitsoyaná.