Chjénngilee je profetale Niná: Sofonías

1. Jókoanchon kʼianga profeta koan je Sofonías, kʼoa ánni nga ndasíni je choa̱ xi tsakʼéjnaná.

¹ Tongileni nga nó 648 nga kjesa chʼajin nó 1, jé niná xi Baal ʼmi nʼio tsaʼyaxkón ya naxinandá Judá. Chriankʼiaa kinikʼien je rey Amón xi nʼio tsʼen koan kʼoa jé ti xi Josías tsakʼin tsakʼejnangajaole (2 Crón. 33:21–34:1). Kʼoa kui nó jebi kiskoejin Jeobá je Sofonías nga koajinkon je chjota tʼatsʼe je kjoaxkón xi kjuichokaone. Je Sofonías tsakui nichxin ya kitje̱nni je rey xi tíjna ya Judá, ninga kʼoalani ñaki kʼoakitsoyejele je xi nyatítjonle naxinandá tʼatsʼe kjoañʼai xi kitso Jeobá nga tsjoále (Sof. 1:1; 3:1-4). Tojo kisʼin je Sofonías, ñá kʼoati bʼenelee yaoná nga bakoá kjoanʼiojin kʼoa alikui je xi xíngiaa mani mangínñá josʼin nga tiʼyaxkoán je Jeobá (Mat. 10:34-37). Jméni xi kinchja̱ni Sofonías kʼianga tsakájinkon chjota, kʼoa jósʼin kichotsjoá jebi.

2. Jméni xi tjínnele sʼiaan kʼianga kʼoasjentjainá Jeobá nichxin nga koako kjoajtile.

² Kjoásjee je Jeobá. Tojéní je Jeobá xi koa̱nle kʼoasjentjai chjota nichxin nga koako kjoajtile. Kuinga kʼoakitsosínile Sofonías je chjota Judá nga katabásjai je Jeobá, kao kjoakixi kʼoa kao kjoandʼé nga choa̱lesa (Sof. 2:2, 3). Kʼoa kʼoatisʼinni nichxin xi tiyoaa ndʼaibi. Tojo kisʼin je Sofonías, kʼoaʼmilee chjota nga katabásjai je Niná. Tonga ñá kʼoati tjínnele kʼoasʼiaan kʼoa kʼoakʼoé tokoán nga tsínkʼia si̱kʼéjnaa je Jeobá (Sof. 1:6). Jósʼin fasjee je Jeobá. Kʼiaa nga nda chotʼayá je Énle kʼoa nga nijélee nga katabándiaaná. Jósʼin fasjee je kjoakixi. Kʼiaa nga tsje mangínkoaa yaoná. Kʼoa jósʼin fasjee je kjoandʼé. Kʼiaa nga bakoá kjoanangitokon kʼoa nga kao kjoatsjoa nitjosoán josʼin tíbándiaaná je naxinandále Jeobá.

3. Ánni nga tsín si̱kinroajensíñá tokoán kʼianga ʼmiyasoán.

³ Ndasʼin bichómani. Tjínkʼa chjota xi kinrʼoé je én xi kisikʼabíson Sofonías. Tonga xi ngisa kitsjoanganʼiole én jebi jé Josías, nga̱ kʼiaa tsakʼétsʼiakao nga tsakásjai je Jeobá nga sʼa ti. Xijekoan, tse xá tsakʼétsʼiakao nga tsakjaʼáxin je xkóson ya Judá nga tsín tikui katabʼétsʼoanile chjota (2 Crón. 34:2-5). Nichxin xi tiyoaa ndʼaibi, je én xi nikʼabísoán, xi jngoyale na̱xi̱n, xi tʼatsʼe je Chjotaxále Niná, sakʼoaa ya tsao ya ndai ndiaa, sakʼoaa ya tsaojin la̱jao̱ kʼoa sakʼoaa ya tsaojin naʼyá, tonga tjínkʼa xi ya tsao jña nda nangi kʼoa mankjín (Mat. 13:18-23). Alikui jao tjínná nga Jeobá tosi tonda sichikontʼainná nga kʼoasʼin tibʼenelee yaoná nga tinikʼabísoan je én xi tʼatsʼe Chjotaxále.

4. Ánni nga tosi tonda tje̱nyatokon kuiyosínilee je Jeobá.

⁴ Tjíokʼa chjota Jerusalén xi kʼoasʼin kisikjaʼaitsjen nga tsínkʼia kʼoasʼin je Jeobá jmeni xi kitso. Tonga je Jeobá tongini kʼoakitsole nga jechrian tíjna je nichxinle (Sof. 1:12, 14). Kʼoatsakʼinle nga tojékjoan xi kuitjontjai je xi je Jeobá sinʼiotʼa yaole (Sof. 3:12, 17). Tosi tonda tje̱nyatokon kuiyolee je Jeobá kʼoa kao kjoatsjoa si̱xálee kao ngatsʼi ndsʼee kao tichjaa xi kʼoatjíosʼín (Sof. 3:8, 9).