Jósʼin kʼuínyasoán nga biyoʼndá je xi ma xinyáya xo̱n

Kʼianga kui kjimachjén je yámixa̱ kʼoa kao xi ma xinyáya xo̱n xi Énle Niná faʼaitʼa nga ʼmiyasoán, nʼio nkjín chjota xi ndʼé tjío ni̱ma̱le xi tjíobe xi kjoakixi (Juan 6:44). Kʼoa kuinga kʼoaʼmisínile je xi chjotajchínga sʼin tjío nga katabʼéndajin nga kʼoasʼin kataʼmiyason ya jña nʼio nkjín chjota faʼa ya ʼnde jña bʼakaole tsoyason je jtínle. Mani nga tsín toya satíoʼnde je yámixa̱ kʼoa kao xi ma xinyáya xo̱n xi Énle Niná faʼaitʼa, alikuikjoan machjén nga je chjotaxá ni̱jéʼndelee. ʼYáni xi koa̱n tsjoánganʼio nga kʼoasʼin sa̱kóyason. Jéní xi jetsoyason xi nkjín kon, xi nda fa kʼoa xi tsín ñʼai male nga nchja̱najmí. Kataʼyala jmeni xi koa̱n sʼiaan kʼoa jmeni xi tsín koa̱n sʼiaan kʼianga biyoʼndá je xi ma xinyáya xo̱n xi Énle Niná faʼaitʼa ánni nga ngisa nda kʼuínyasonsíñá.

Jméni xi koa̱n sʼiaan:

Ndʼé si̱koaa kʼoa kuenta sʼiaan je chjota xi ya faʼa. Kuijnokoaa kʼoa si̱tiʼndaa. Kʼianga jngo chjota koase̱njna kʼoa skótsenle je xo̱n koaan i̱ kʼuínlee: “Tsa matsjoali koaan chʼa̱ jngui xo̱n jebi”.
Chósonnilee jokji kjin kuise̱njnalee je xi ma xinyáya xo̱n. Tjínkʼa ʼnde jñani nga je xi jetsoyason me tiya binyachrianni tonga sakʼoaa likui kjenndiaa jebi. Tsakui nichxin ngisa nda nga tikjinkjoanni kuinyalee je xi ma xinyáya xo̱n kʼoa kʼia chja̱kaonajmiá tsa jngo chjota kuichokotsenle je xo̱n kʼoa i̱ kʼuínlee: “A sakʼoaa chjonangilai yaoli xi tʼatsʼe jebi”.
Koaan si̱chjén je Biblia kʼiatsa bele tokoán.
Kʼiatsa kui kʼoa̱ je xo̱n xi nichjén nga bʼé estudio, jolani tsa je libro Jmé kjoanni xi bakóya je Biblia, kʼoakʼuínlee josʼin ʼmiyaa je Biblia kʼoa koakolee je video xi Ánni nga machjénsíni nga chótʼayai Biblia ʼmi ya celularná kʼoa tsa tabletaná.
Kʼiatsa koa̱nndosinle je Énle Niná je chjota koaan chjónangilee joʼmi, jña tíjnani kʼoa kao númerole teléfonole.

**Jméni xi tsín koa̱n sʼiaan:**

Likui koa̱n nga kuixkankoaa chjota, nga kjoanʼio kʼoénelee kʼoa nga kʼoasʼin si̱kuindaa je xi ma xinyáya xo̱n joni tsa jngo polisía.
Likui koa̱n nga kʼoasʼin si̱kjaʼaitsjeen nga tokui xále nga nʼio nkjín xo̱n si̱kʼabísoan. Kʼianga ʼmiyasoán je Énle Niná kuinga estudio kʼoétsʼiakoaa kʼoa kuinga kʼoénesínilee yaoná nga chja̱kaonajmiá je chjota.
Likui koa̱n ya kuisenchjoalee je xi ma xinyáya xo̱n kʼoa tsa toyala cho̱banajmíkoaa je xi ñatjen kabʼakaoná. Kʼiatsa nʼio machjén nga celularná si̱chjén koaan kjin kjuinkisenjnaa nga kuinókjoaa.
Likui koa̱n cho̱batiaa kao chjota xi tsín sasénle je Énle Niná. Kʼiatsa tokoa̱ntsʼen je chjota tosa tʼaxin kjuinkoaa je xi ma xinyáya xo̱n.