Jósʼiaan nga ndasa kʼuínyasoán: kʼuínyalee je publicador chjotse

Ánni nga nʼio chjísínile nga kʼoasʼiaan. Je chjotale Cristo xi sʼa chjotse machjénní nga kʼuínyale nga katasítjoson “ngayije kjoa” xi je Jesús tsakʼéne, jolani nga kʼuínyaa je Énle Niná (Mat. 28:19,20). Nʼio nkjín xi sʼa chjotse xi jefaʼa ya Skuela xi síchjine choʼndale Niná kʼoa tsakui nichxin jetsoyale je xi xínkjín mani kʼoa tsa je xi miyole mani. Kʼianga jekʼoatísʼín, sa chjí sa chjí skoe̱ jmeni xi tíʼmiyale. Kʼoa kʼianga jekoa̱njinle nga kui xi mele Jeobá nga ngatsʼi chjota katanrʼoé je énnda chjotse, tsakui nichxin kʼoakuitso nga jemele kuitsoyason, kʼoa kui xi koako nga jekjimataja je kjoamakjainle (Rom. 10:13, 14, Traducción del Nuevo Mundo [TNM]). Kʼianga jetjóʼndele nga jekoa̱n kuitsoyason kao je jtín, machjénní nga sa̱kóyale nga katamale josʼin ʼmiyasoán kʼoa kui xi koasenkao nga tsín tso̱kjon nga kuitsoyason (Luc. 6:40).