A jetibiyondaa nga kjoaʼaítsjenya Kjoabiyale Cristo

Nʼio chjíle jme xi kisʼin Jesús nga tokʼoatjínsa tsakjenkao je pastrole. Nga tojeme ni̱kʼien, tsakʼasje je sʼuí Paxko, kʼoa kʼoakitso nga tok’ia fitsʼiani nga jekui Kjoabichile Nainá kjoaʼaítsjenya. Kʼoa jé Pedro kao Juan kisikasén nga kisíndachon jñani tsakʼéjna sʼuí Paxko (Lu 22:7-13; chótsenlai sén xi faʼaitʼa ya portada). Jebi kui tsoyaná nga machjén nga tongini kuiyondaa nga kjoaʼaítsjenya Kjoabiyale Cristo nga 27 sá jebi. Je jtín jetongini kʼoakitsole xi tsjoá kjoanokjoaya, jetjíonda je vino kao nioxtila kʼoa tsa jmesani xi koa̱nchjén. Jmé xi sʼiaan nga jngó jngoá nga tongini kuiyondaa.

Si̱kʼéjnandaa je ni̱ma̱ná. Si̱kjaʼaitsjenjiaan jme xi tso je texto xi maxkia nga faʼaitsjenya Kjoabiyale Cristo. Kjuintjenngiaa josʼin faʼaitʼa je folleto Nyaon nyaon chótʼayajiaan je Biblia. Kʼoa faʼaitʼasa je folleto Xo̱n xi basenkaoná nga chotʼayajiaan Énle Niná ya kjoaʼmiya 16-A kao 16-B. Kʼoa kao Xo̱n xi tjítʼa jme xi chotʼayá xi tsʼe sá abril nó 2020. Kʼiatsa kao familianá chótʼayajiaan, koaan si̱chjén je Índice de las publicaciones Watch Tower kao Xo̱n xi síchjén je testigole Jeobá nga jme xi básjaiya.

Kʼoakʼuínlee xi kjaʼaí. Nʼio kʼuínyasoán nga kʼoabíson je xo̱n xi sʼeyole chjota nga faʼaitsjenya Kjoabiyale Cristo. Kʼoakʼuínlee je chjota xi mangínchonlee, xi saje kiskotʼaya Biblia, xi xíngiaa mani kʼoa kao chjota xi ʼyaxkoaan. Je xi chjotajchínga sʼin tjío kʼoati bájinkon ndsʼee xi jekisikatío xále Niná. Kʼiatsa mená kʼoakʼuínlee je xi xin tjío, koaan kjoásjaiyaa jñani ngisa chrian koa̱nle nga kjoaʼaítsjenya Kjoabiyale Cristo. Tjasjai ya jw.org jñani XI TʼATSAINJIN tso kʼoa ya tisennelai jñani “Nga faʼaitsjenya Kjoabiyale Cristo” tso.

Jmésa xi sʼiaan nga tongini kuiyondaa