KJOAʼMIYA XI CHOTʼAYA 11
KJOAJNDA 57 Kʼuínyalee ngatsʼi chjota
Kao kjoatsjoa kʼuínyasoán tojo kisʼin Jesús
“Je Nainá […] kisikasén títjonle, jaojao ngakijnda naxinandá kao ʼnde jña nga je sʼakoai” (LUC. 10:1).
XI TÍNCHJA̱NI
Ño koya tjínni jmeni xi kisʼin Jesús nga kitsoyason xi koa̱n chjénngilee.
1. Jméni xi tsín mangóson jonʼia xi testigole Jeobá maa kao chjota xi tsín je Jeobá síxále.
JE CHJOTA xi tsín je Jeobá síxále alikui tsoyason, toñá ñá xi testigole Jeobá maa xi ʼmiyasoán (Tito 2:14). Ningalani ʼmiyasoán sakʼoa likui titsjoa sʼeni tokoán nga kʼoanʼia. Tsakui nichxin kʼoati sʼe tokoán jokisʼe kon jngo ndsʼee xi chjotajchínga sʼin tíjna, nga i̱ kitso: “Sakʼoa tsín tso tokoan nga fixinyasoan”.
2. Ánni nga sakʼoa tsín tsjoa sʼeni tokoán nga ʼmiyasoán.
2 Tsakui nichxin tsjoa sʼe tokoán nga bʼainganʼioá jme xá xi tjín jinnaxinandále Niná. Jolani kʼianga masinle kʼoa nga sʼenda je Ndʼia jña chotʼayá kʼoa nga bʼainganʼiolee je ndsʼee xi kjoaxkón bichóne. Tsjoa satío tokoán nga̱ ʼyañá nga nda bichómani nga kʼoanʼia, kʼoasʼin bakonilee je ndsʼee nga tsjoachaa kʼoa ʼyañá nga chjí bekon je xá xi nʼia. Tonga kʼianga ʼmiyasoán tsakui nichxin tsínti tsjoa sʼe̱ni tokoán, ngisaa tsa jenkjín nó nga tiya tiya bʼakaoniná jña ʼmiyasoán kʼoa tsakuije̱ nga tokʼa xi nrʼoéná. Nga nichxin fetʼa tiyoaa ndʼaibi, tsakui nichxin sa nkjín sa nkjín chjota koaitjenngikená (Mat. 10:22). Tonga jméni xi koasenkaoná nga tosi tonda kao kjoatsjoa kʼuínyasoán.
3. Tojo tso ya Lucas 13:6-9, jmé xi bakóyaná jokisʼin Jesús.
3 Tsjoa sa̱tío tokoán kʼianga kʼuínyasoán tsa chótʼayajiaan jokisʼin Jesús kʼianga jaʼai i̱ Sonʼnde, nga̱ nʼio tsjoa kisʼe kon nga kitsoyason (tʼexkiai Lucas 13:6-9).a Je Jesús kʼoati kisʼin jokisʼin je chjota xi jan nó kisikuinda je yá higo xi tsín tsakale to. Jan nó kitsoyasonle chjota judío kʼoa tokʼa xi chjotatjenngile koan.
4. Jñánile xi ño koya chótʼayajiaan i̱ kjoaʼmiya jebi.
4 I̱ kjoaʼmiya jebi kui chótʼayajiaan jókisʼin Jesús nga kao kjoatsjoa kitsoyason kʼianga tongi jaonsa sá tsakʼejna i̱ Sonʼnde (chótsenlai nota de estudio jñani tso “Después de estas cosas” xi tsʼe Lucas 10:1, TNM). Ño koya tjínni xi chótʼayajiaan i̱ kjoaʼmiya jebi. Xi títjon, je Jesús kʼoakisʼin josʼin mele Nʼaile. Xi majaoni, kuenta kisʼin je én xi tongini kinokjoa. Xi majanni, jé Jeobá kisinʼiotʼa. Kʼoa xi mañoni, kʼoatsakʼé kon nga tjíokʼa chjota xi kjuinrʼoéle.
KʼOAKISʼIN JMENI XI MELE JEOBÁ
5. Jósʼin tsakakó Jesús nga ñaki tokui xále Niná kisʼin.
5 Je Jesús tsjoa tsakʼé kon nga kitsoyason nga̱ koanjinle nga kui xi mele Jeobá nga kʼoasʼin (Luc. 4:43). Ninga kʼia nga tochoatsesa tsakʼejna i̱ Sonʼnde kui xále Niná ngisa kitsjoale kjoandosin kʼoa nkjín ʼnde kitsoyason (Luc. 13:22). Kʼoati kitsoyale chjotatjenngile nga kʼoati kui xá katasʼín (Luc. 10:1).
6. Jósʼin bʼainganʼioá nga tosi tonda kataʼmiyason je Énle Niná (kʼoati chótsenlai sén xi faʼaitʼa).
6 Je Jeobá kao Jesús kui xi mele nga tosi tonda kʼuínyasoán nichxin xi tiyoaa ndʼaibi (Mat. 24:14; 28:19, 20, TNM). Bʼainganʼioñá nga tosi tonda kataʼmiyason kʼianga bʼainganʼioá jme xá xi tjín jinnaxinandále Niná. Tobʼelañá, kui xá sʼendani Ndʼia jña chotʼayá nga ya skoe̱xkón Jeobá je chjota xi ʼmiyalee. Je xi ya Betel síxá kao jña xinsa ʼnde kʼoati tsjoánganʼio nga tosi tonda katafison je Énle Niná, kʼoa kʼianga binyakoaa je ndsʼee jñani kjoaxkón sʼe kʼoasʼin binyakaoñá nga tosi tonda katatsoyason kʼoa nga tosi tonda katabatiojtín. Kʼiatsa kuenta sʼiaan nga kui xi mele Jeobá nga kʼuínyasoán tsjoa sa̱tío tokoán nga kʼoasʼiaan. Jngo ndsʼee xi Hungría tsʼe, xi chjotajchínga sʼín tíjna, xi János ʼmi, itso: “Nkjín koya xá tjín jinnaxinandále Jeobá tonga xi ngisasa nʼio chjíle kuinga kʼuínyasoán”.
Je Jeobá kao Jesús kui xi mele nga kʼuínyasoán (Chótsenlai párrafo 6)
7. Ánni nga kui xi menile Jeobá nga tosi tonda kʼuínyasoán (1 Timoteo 2:3, 4).
7 Tosi tonda kao kjoatsjoa kʼuínyasoán kʼiatsa kʼoasʼin jchatokoán je chjota josʼin bekon Jeobá. Nga̱ je Jeobá kui xi mele nga nkjínsa chjota katanrʼoé je Énle (tʼexkiai 1 Timoteo 2:3, 4).b Tsa kjuinrʼoé Énle Niná je chjota kuitjontjaile yaole kʼoa tijé Jeobá tsoyaniná jósʼin kʼuínyalee. Tobʼelañá, je folleto xi ʼMiyalee chjota nga̱ tsjoachañá ʼmi kui tsoya jókʼuínlee chjota nga tosʼa chja̱kaonajmiá, nga kjuinchón ngindialee kʼoa nga Biblia kʼuínyalee. Ningalani tsín kjuinrʼoéná ndʼaibi je chjota tsakui nichxin kʼia koa̱nkjainle nga jetíjna kjoañʼai xi nʼio tse. Tsakui nichxin kʼia kjoaʼaítsjenle jmeni xi kʼuínlee ndʼaibi, kuinga machjénni nga tosi tonda kʼuínyasoán.
KUENTA KISʼIN JE ÉN XI TONGINI KINIKJOA
8. Jósʼin tsakasenkao Jesús nga kuenta kisʼin je én xi tongini kinokjoa.
8 Je Jesús be josʼin kuitjoson je én xi tongini kinokjoa xi nroatʼa ya Biblia. Kʼoati koanjinle nga to ján nó basen kuitsoyason (Dan. 9:26, 27). Nga tongini kichji jme xi koa̱ntʼain kisʼejinle kʼiáni ni̱kʼien kʼoa jónikao (Luc. 18:31-34). Nga kuenta kisʼin je én xi tongini kinokjoa kui xi tsakasenkao nga ñaki to xále Niná kisʼin kʼoa nga kitjosonle je xá xi tsakánele Jeobá.
9. Ánni nga tosi tonda ʼmiyasonñá nga ʼyaa josʼin tíbitjoson jmeni xi tso Biblia.
9 Tosi tonda ʼmiyasoán kʼianga ʼyaa josʼin tíbitjoson je én xi tongini kinokjoa. ʼYañá nga tojeme kjoetʼa jme xi chon sonʼnde, nga̱ jetíbitjoson jmeni xi tso Biblia tʼatsʼe josʼin je chjota kʼoa nga sa ñʼai sa ñʼai kjimachon ndʼaibi. Kʼoati ʼyaa josʼin tíbitjoson nga tjíokjántʼa je rey xi norte tsʼe kao rey xi sur tsʼe. Je rey xi norte tsʼe jé nchja̱ni Rusia kao xi ya tsjoánganʼiole kʼoa je rey xi sur tsʼe jé nchja̱ni Estados Unidos kao Reino Unido (Dan. 11:40). Kʼoati majinná nga je ndso̱ko̱ sén xi síkʼaxki̱ Daniel 2:43-45 jé nchja̱ni Reino Unido kao Estados Unidos. Nga chotʼayajiaan jmeni xi tso texto jebi ngisaa sʼejngo tokoán nga tojeme sikjeson Chjotaxále Niná je chjotaxá sonʼnde. Nga tíbitjoson je én xi tongini kinokjoa ʼyañá nga nichxin fetʼa tiyoaa kʼoa ngisaa maxátíyale nga kʼuínyasoán.
10. Jónʼia nga ʼyaa jmeni xi tso én xi tongini kinokjoa.
10 ʼMiyalee Énle Niná je chjota kʼianga ʼyaa jmeni xi tso én xi tongini kinokjoa. Jngo tichjaa xi Carrie ʼmi xi ya tsʼe naxinandá República Dominicana, itso: “Kʼianga sikjaʼaitsjenjian nga naskánasichon sonʼnde je Jeobá nichxin xi nroaján, kʼoati xinyale chjota ánni nga kʼoati katabeni jme xi tjínndajinle Jeobá”. Ya Biblia kʼoatso nga je Jeobá basenkaoná nga bitjosonná xá jebi, kuinga tosi tonda ʼmiyasonñá. Jngo tichjaa xi Hungría tsʼe xi Leila ʼmi, itso: “Ya Isaías 11:6-9 kui bakóyana nga je Jeobá basenkao toʼya chjotani nga síndaya yaole, kʼoa kuinga tosi tonda xinyanile Énle Niná je chjota ni kjuinrʼoéna kʼoa ni mai”. Jngo ndsʼee xi Zambia tsʼe xi Christopher ʼmi, itso: “Ya Marcos 13:10 kʼoatso nga kʼuínyason Énle Niná jngo tjíjtsa sonʼnde kʼoa tsjoa tjín tokoan nga kʼoati tisitjosoan tsanda an jmeni xi tso texto jebi”. Kʼoa ji, jñánile én xi tongini kinokjoa xi basenkaoli nga tosi tonda ʼmiyasuin.
ÑAKI KʼOATSAKʼÉ KON NGA JE JEOBÁ KOASENKAO
11. Kʼianga kitsoyason Jesús, ánni nga je Jeobá kisinʼiotʼani (Lucas 12:49, 53).
11 Kʼianga kitsoyason Jesús ñaki kʼoatsakʼé kon nga je Jeobá koasenkao. Ningalani ngasin nganda tsakjákao Jesús je chjota xi kitsoyasonle kʼoati koanjinle nga tjíokʼa xi tsín sa̱sénle Énle Niná kʼoa xi koatiochjoale (tʼexkiai Lucas 12:49, 53).c Je chjota xi tsakinyatítjonle religión alikui kisasenle jmeni xi kitsoyason Jesús kʼoa koanmele kisikʼien (Juan 8:59; 10:31, 39). Tonga je Jesús tosi tonda kitsoyason nga̱ be nga je Jeobá koasenkao, i kitso: “Tsín tsa toʼanjian, tonga an kao je xi kisikasénna, je Nʼainá” (Juan 8:16). Kʼoati i̱ kitsosa: “Je Nʼainá likui kisikʼéjnana nga toʼan, nga̱ kʼoasʼian ngantsjai je xi sasénle nga je” (Juan 8:29).
12. Jókitsole Jesús je chjotatjenngile jme xi tjínnele sʼin kʼiatsa chjota koaitjenngike.
12 Je Jesús kʼoakitsole je chjotatjenngile nga je Jeobá katasínʼiotʼa kʼoa nkjín kʼa kʼoakitsole nga je Jeobá koasenkao nga̱ be nga chjota koaitjenngike (Mat. 10:18-20; Luc. 12:11, 12). Kʼoati kitsole nga katasíkuinda yaole (Mat. 10:16; Luc. 10:3). Kʼoa nga tsín kjoanʼio katabʼénele chjota nga kjuinrʼoé Énle Niná kʼiatsa kaile (Luc. 10:10, 11). Kʼoati kitsole nga katabanga tsa chjota koaitjenngike (Mat. 10:23). Je Jesús jé Jeobá kisinʼiotʼa tonga kʼoati kisikuinda kaoni yaole kʼianga kitsoyason (Juan 11:53, 54).
13. Ánni tjínjngoni tokoán nga je Jeobá koasenkaoná.
13 Nichxin xi tiyoaa ndʼaibi kʼoati batiochjoaná chjota kʼianga ʼmiyasoán kuinga kʼoaʼminilee Jeobá nga katasíkuindaná, ánni nga tosi tonda kao kjoatsjoa kʼuínyasonñá (Apoc. 12:17). Tjínjngoo tokoán nga je Jeobá basenkaoná nga̱ jesoaa Jesús tsakʼétsʼoale Nʼaile nga kʼoakitsole nga katasíkuinda chjotatjenngile kʼoa je Jeobá kinrʼoé tojo tso ya Juan capítulo 17. Ya libro xi tsʼe Hechos kʼoatso nga je Jeobá tsakasenkao chjotatjenngile Jesús nga tosi tonda kitsoyason ninga chjota kitjenngike. Kʼoati kitsole Jesús je Jeobá nga katasíkuinda je xi kjuinrʼoé kʼoa xi koa̱nkjainle jmeni xi kitsoya pastro. Tjínjngoo tokoán nga kʼoati síkuindaná je Jeobá nga ʼmiyasoán tojosʼin kisikuinda je chjotatjenngile Jesús (Juan 17:11, 15, 20).
14. Ánni nga tosi tonda kʼuínyasonñá ninga ñʼai koa̱nchon (kʼoati chótsenlai sén xi faʼaitʼa).
14 Nga nichxin fetʼa ʼmi xi tiyoaa sa ñʼai sa ñʼai koa̱nná nga kʼuínyasoán tonga je Jesús kʼoakitso nga je koasenkaoná (Luc. 21:12-15). Kʼoati nʼia jokisʼin je Jesús kao chjotatjenngile, ʼmiyalee Énle Niná ngatsʼi chjota ni kjuinrʼoéná kʼoa ni mai tonga alikui kjoanʼio nʼialee kʼiatsa kaile. Tjín ʼnde jñani tsín tjoʼndele ndsʼee nga tsoyason tonga básjaile josʼin tsoyason nga̱ be nga je Jeobá koasenkao. Tojo kisʼin je chjotatjenngile Cristo xi tsakatio nga siglo 1, nkjín ʼnde kitsoyason kʼoa jé Jeobá tsakasenkao. Kʼoati je tíbasenkaoná ndʼai nga tosi tonda tiʼmiyasoán saʼnda nga kʼoakuitsoná nga tsín tikʼoasʼianñá (2 Tim. 4:17). Alikui jao kʼoé tokoán nga je Jeobá koasenkaoná nga tosi tonda kʼuínyasoán.
Ninga sʼechjoale xá xi nʼia, je ndsʼee básjaile josʼin tsoyason (Chótsenlai párrafo 14)e
KUENTA KISʼIN NGA TJÍOSA CHJOTA XI KJUINRʼOÉ ÉNLE NINÁ
15. Jmé xi tsakasenkao Jesús nga tosi tonda kitsoyason.
15 Je Jesús be nga tjínsa chjota xi mele kjuinrʼoé Énle Niná kʼoa kuinga tosi tonda kitsoyasonni. Kʼianga jetífetʼa je nó 30, je Jesús koanjinle nga tjín chjota xi mele kjuinrʼoé je Énle Niná kuinga ya kisingósonkaoni joni je tsojmintje xi jekoa̱n sʼe̱xkó (Juan 4:35). Jela me jngo nó jaʼato nga i̱ kitsole chjotatjenngile: “Nʼio tse xi majchá” (Mat. 9:37, 38). Nga koanskanni i kitsongánile: “Nʼio tse xi majchá […]. Tʼetsʼoalao tsokʼoa je Naile xi tsʼe je xi kjimajchábe nga katasíkasén chjota xi síxá xi tʼatsʼe xi majchále” (Luc. 10:2). Je Jesús kui kuenta kisʼin nga tjínsa chjota xi mele kjuinrʼoé je Énle Niná kʼoa tsjoa kisʼe kon kʼianga koankjainle je chjota (Luc. 10:21).
16. Jñánile choa̱ xi kisichjén Jesús xi tsakinyakao chjotatjenngile nga tosi tonda kitsoyason (Lucas 13:18-21; kʼoati chótsenlai sén xi faʼaitʼa).
16 Jaola choa̱ kataʼyaa xi kisichjén je Jesús xi tsakinyakao chjotatjenngile nga tosi tonda kao kjoatsjoa kitsoyason (tʼexkiai Lucas 13:18-21).d Xi títjon, je Jesús kui kisingósonkao je Énle Niná je na̱xi̱nle mostaza, ninga ʼndí kjoan na̱xi̱nle mostaza tonga je yále ngʼa makjoan. Kui xi kitsonile nga nkjín chjota xi koa̱nmele skótʼaya je Énle Niná ninga tjín xi koatiochjoale. Xi majaoni, je Énle Niná kui kisingósonkao je naʼyo̱san, xi tsonile, nga nkjín naxinandá kʼuínyason kʼoa nga kui kuinyakao chjota nga sindaya yaole ninga ñʼai koa̱nle. Nga kui choa̱ jebi kisichjén Jesús koanjinle je chjotatjenngile nga machjén nga tosi tonda kuitsoyason nga̱ nkjín chjota tjín xi mele kjuinrʼoé je Énle Niná.
Tojo kisʼin Jesús, tjínjngoo tokoán nga kjuinrʼoé kʼaná chjota nga kʼuínyasoán (Chótsenlai párrafo 16)
17. Ánni nga tosi tonda kʼuínyasonñá.
17 Je xi basenkaoná nga tosi tonda ʼmiyasoán kuinga ʼyaa nga nʼio ndasʼin tíbichómani nga tíʼmiyason. Nga xki̱ nó millón chjota bichó kʼianga faʼaitsjenya Kjoabiyale Cristo kʼoa nkjín xi kotʼaya je Biblia. Kʼoati nkjín jmi mani xi tosʼa tjíotsoyason kʼoa xi tjíofisʼenngindá. Alikui ʼyaa jótjínsa chjota xi sʼa koa̱nkjainle tonga je xi ʼyaa kuinga kui xi mele Jeobá nga nkjín chjota katabitjontjaile yaole nga kjoaʼaí je kjoañʼai xi nʼio tse (Apoc. 7:9, 14). Je xá xi tinʼia tsʼee Jeobá kʼoa be nga nkjínsa chjota tjío xi mele skoe̱ xi tʼatsʼe kuinga tosi tonda kao kjoatsjoa ʼmiyasonñá.
18. Jmé xi mená nga katabe chjota.
18 Je xi ñaki chjotale Cristo ma kʼoasʼin ʼyale nga tsoyason. Tobʼelañá, nga nʼiojin koan je pastro nga kitsoyason, je chjota tsabe nga ya tsakʼetsomakao Jesús (Hech. 4:13). Ñá kʼoati kui xi mená nga katabe chjota nga kʼoati nʼia jokisʼin Jesús nga ñaki kao kjoatsjoa ʼmiyasoán.
KJOAJNDA 58 Koasjaiña je xi nyʼán tjío kon
a Lucas 13:6-9: “Kʼia Jesús kitso je kjoaxkóson: Jngo chjota xi tjínle yá higo xi tjínntjele yajin tsojmintjele. Jaʼai kásjai tole, kʼoa likui kisakole. 7 Kʼoa kitsole xi síkuinda tsojmintjebe: Koeni, jekoan jan nó nga faʼai kasje tole yá higo xokjibi, kʼoa likui sakóna. Ticháo, ánni nga tokjoatjao síkjitsónni nangi. 8 Je choʼndabe kitsole: Señor, kataséjnalasa tojesa nóbi saʼnda kuinyaxa̱nle nangi, kʼoa sitjéʼndele. 9 Kʼia tsa nó xijngo koa̱le to, ndaníʼni. Kʼoa tsa mai, kuicháiʼni”.
b 1 Timoteo 2:3, 4: “Jebi xi nda tjín, xi sasénle Niná xi bʼasjentjainá. 4 Je mele nga ngatsʼi chjota kuitjontjai, kʼoa nga kuichonrʼoe xi kjoakixi”.
c Lucas 12:49, 53: “Lʼí jaʼai sikasʼenjian i̱ sonʼnde. Jmésa xi mena tsa je títi. 53 Koa̱njaoya ngatsʼi. Je nʼai kontra koaile tile, kʼoa tile kontra koaile nʼaile. Na̱le kontra koaile tsotile, kʼoa tsotile kontra koaile na̱le, kʼoa xi na̱chá kontra koaile ʼndale, kʼoa xi ʼnda kontra koaile na̱chále”.
d Lucas 13:18-21: “Kʼia Jesús kitso: Jmé xi ngóson koa̱nná kjoatéxomale Niná. Jmé kjoa xi singósonkoa. 19 Kʼoasʼin ngoyale jngo ʼndína̱xi̱n xi tsʼe mostaza xi kiskoé chjota. Tsakʼéntje jin tsojmintjele. Koanntje, kʼoa jngo yá koan, kʼoa nise xi símajinsén tsakʼéndaʼa tjéle. 20 Kʼoa kitso ngijngokʼa: Jmé kjoa xi singósonkoa je kjoatéxomale Niná. 21 Kʼoasʼin ngoyale naʼyo̱san xi kiskoé jngo chjoón, kʼoa jan choa̱ skoa̱n nioxtila kisikʼójin saʼnda kitsinjin ngayije naʼyo̱skoa̱nbe”.
e XI TÍNCHJA̱NI SÉN XI FAʼAITʼA: Jngo ndsʼee xi gasolina tíbatse, tíbásjaile josʼin títsoyale je chjota ninga tíchjoale xále Niná ya jñani tsʼe.