Tsee jmeni xi kjimajinnajin nga je Jeobá tíbakóyanajin

CHOA̱ XI TSAKATÍONAJIN XIJCHÁNAJIN

Yaa Italia tjío tsakai je xijchána. Kʼiaa nga nó 1957 kikatio ya Kindersley ʼnde xi nchja̱ni Saskatchewan (Canadá). Kʼiaa tsakʼinyale Énle Niná je xijchána kʼianga jeya Canadá tjío kʼoa nʼio chjí tsabekon jmeni xi tsakʼinyale. Kʼianga sʼa ʼndí kjiʼe̱ ntsjaintsjai kikoa je xijchána nga kikakóyason, kʼianga nchjanajmí sakʼoa kʼoaxian nga precursor auxiliar sʼin jekisixá nga tokʼia jin nóna.

Ningalani tochoa tao̱n kisʼele xijchána nda kisixále Jeobá. Tobʼelañá, kʼianga nó 1963 nga kisʼejna jngo Kjoajtíntse ya Pasadena (California, Estados Unidos). Je xijchána koanmele ki kʼoa nkjín tsojmi xi tjíonajin tsakaténa nga kisokole tao̱n xi tsangínnijin. Kʼianga nó 1972 yaa tsangínkiyuijin ya Trail, jngo ʼnde xi nchja̱ni Columbia Británica (Canadá) nga tsangínkʼinyalaijin Énle Niná je chjota xi én italiano nchja̱ kʼoa ʼnde jebi jngo jmila kilómetro kjin tíjnale ya jñani tiyuijin tsakai. Nga kui xi koanmele pana nga tosi tonda je Jeobá sixále alikui kiskoé je xá xi tsakʼaitʼale ninga tse tao̱n kuinje̱le, tosaa ya kisitsje jngo tienda xi nʼioje kji nga tsakajngiʼanajin.

Nga nda kisixále Niná je xijchánajin nʼio nda choa̱ tsakʼéjnana kʼoa kʼoati nda choa̱ tsakʼéjnale nga jan xtindsʼe kʼoa koanjinna kʼiatsa kui xále Jeobá sikʼéjnatítjoan jé sikuindana ngantsjai (Mat. 6:33).

KʼIANGA ÑAKI TO XÁLE NINÁ KISʼIAN

Kʼianga nó 1980, kʼiaa chixankoa Debbie, jngo tichjaa xi mele nga nda sixále Niná. Nga joaijin kui xi koanmenajin nga ñaki to xále Niná sʼiainjin. Kʼianga jejan sá jaʼato nga chixainjin precursora sʼin kisixá je chjoónna kʼoa nga jekicho ñanó nga chixainjin kʼoati precursor sʼin kisixá tsanda an kʼoa yaa tsangínkʼainganʼiuijin jngo jtín jñani ngisa machjén xi tsoyason.

Nga jeki nichxin kinroajen tokuinjin kʼoa koanmenajin tsangín ijngokʼaijin ya ndʼianajin. Tonga títjonkjoanla je superintendente xi tsʼe circuito kichjakaonajmíjin, kʼoakitsokixinajin ánni nga tjíonroajenni tokuinjin. I kitsonajin: “Tijon xotinikaoño yaono, nga̱ tokui kuenta tinʼiao je kjoa xi tiyojion, tsa si̱kjaʼaitsjenjion josʼin tjíosíxále Niná je ndsʼee jchaño nga kʼoati nda tibʼainganʼio tsanda jon” (Sal. 141:5). Kʼoakinʼiaijin jokitsonajin je ndsʼee. Kui kuenta kinʼiaijin nga nkjínni ndsʼee xi tjío ya jinjtín xi mele nga ngisasa nda sixále je Jeobá, jolani je xtiʼndí kʼoa kao tichjaa xi tsín kotʼaya je xʼinle. Nga kʼoakinʼiaijin koanjinnajin nga je Jeobá koasenkaonajin nga chókjoajinnajin je kjoa xi tibitjatojinjin (Miq. 7:7). Nga jekoanni, ndani sʼin tsakiyuijin kʼoa ndani kisatio tokuinjin.

Ño ndsʼee kitsoyanajin kʼianga tsangíntítjuinjin je skuela xi tsʼe precursor kʼoa jan ndsʼee jebi xi xin naxinandá kitsoyason. Tsakakónajin fotole kʼoa tsakʼéyanajmínajin jme kjoa xi jaʼatojin kʼoa josʼin kisichikontʼain Jeobá. Kʼoati koanmenajin tsanda jinjin nga misionero koai̱njin.

Nga kui xi koanmenajin nga misionero koai̱njin, yaa Quebec tsangínkʼainganʼiuijin nga nó 1984. ʼNde jebi tsʼato 4,000 kilómetro kjin tíjnale ya Columbia Británica ya jñani tiyuijin tsakai. Én francés nokjoa ʼnde jebi kʼoa kui én kichotʼayaijin kʼoa kʼoati kiningalaijin yaonajin jochon ʼnde jebi. Je xi kʼoati ñʼai koannajin kuinga tsín koansonninajin tao̱n. Ñandia nga jngo chjota xi papa bántje kitsjoaʼndenajin nga tsakʼexkuíjin je papa xi tsʼangile kʼoa tokui kichinaijin. Je chjoónna nkjín koya josʼin tsakʼénda papa nga kui tsakichinijin. Ningalani kui kjoa kitjatojinjin kichokjoajinnajin nga̱ jé Jeobá kisikuindanajin (Sal. 64:10).

Kʼianga kinokjoanajin teléfono kʼoatsakʼinnajin nga ya koanngínjin ya Betel xi tíjna Canadá. Ba kisatio tokuinjin nga̱ tokʼoa jekinikasáinjin solicitud nga ya koanngínjin Skuela xi tsʼe Galaad tonga tojo tsangínníjin ya Betel. Kʼianga jekichuijin kʼoatsakʼinlaijin je ndsʼee Kenneth Little xi ya tíjnajinle Comité xi tsʼe Sucursal jósʼiainjin tsa ya Galaad kuinókjoanajin. Je ndsʼee i kitsonajin: “Kʼia kʼoakʼuínlaijin tsa kuinókjoano”.

Kʼianga jejngo xomana tiyuijin ya Betel, kʼiaa kʼoatsakʼinnajin nga ya Skuela xi tsʼe Galaad koanngínjin kʼoa kinikjaʼaitsjenjinníjin josʼiainjin. Je ndsʼee Little i kitsonajin: “Jon xi kuixonño jñáni meno si̱xálao Jeobá, a i Betel kuiyo axo yaa Galaad koanngíon, je Jeobá sichikontʼainno jñani meno si̱xálao”. Tsangínníjin ya Galaad kʼoa ninga jenkjín nó tífaʼato tojo faʼaitsjennajin jme xi kitsonajin je ndsʼee Little kʼoa kʼoati ʼmilaijin je ndsʼee nga jesoa katakjoéjin jñani mele sixále Jeobá.

NGA MISIONERO KOAINJIN

Nʼio tsjoa kisatio tokuinjin nga tsangínjin Skuela xi tsʼe Galaad xi mani 83 kʼoa 24 koannijin. Kʼiaa kitsʼia nga sá abril nga nó 1987 kʼoa yaa kisʼejna ya Brooklyn (Nueva York). Je xi kʼoati kitsoyanajin jé ndsʼee Ulysses Glass kao Jack Redford. Ngotjo jaʼani xi aon sá kʼoa kʼiaa jetʼa skuela jebi nga 6 sá septiembre nó 1987. Yaa Haití kinikasénnajin kao je ndsʼee John kao Marie Goode xi chjoónle mani.

Je misionero xi tsakatio ya Haití nga nó 1962 tsakichonsjee kʼianga kjoasi kisʼe ya ʼnde jebi. Nga jejan xomana ya tiyuijin, yaa tsakʼainganʼiuijin jngo jtín xi kjintʼa tíjna jñani 35 mani je ndsʼee xi tsoyason. Nga sʼa xtijin nga kichuijin ya Haití tsee jmeni xi tokʼia koanjinnajin kʼoa tojin tsakiyuijin ya ndʼia jña bationi je misionero. Je chjota xi ya tsʼe ma̱a sʼin tjíosíjchá yaole kʼoa me tongatsʼi nga tsín male xo̱n. Jokji tse nga ya tsakiyuijin kʼoati ñʼai koannajin nga̱ tsee kjoa kisʼe, kjoasi tsakʼétsʼiakao je chjota, ngaʼi̱ ngaján tsakʼéchjoa nga mele kʼaonsje je chjotaxá kʼoa kʼoati nʼio tsʼa jtsí kʼoa nʼio jaʼa ntjao̱.

Je ndsʼee xi Haití tsʼe tosi tonda je Jeobá kisixále ninga tse kjoa jaʼatojin nga̱ kui kʼoakisʼinni nga tsjoake je Jeobá. Tobʼelañá, jngo tichjaa xi jejchínga xi tsín male xo̱n 150 textole Biblia tjínjinkon. Nga nʼio chʼao koanchon kʼoatsakʼinlaijin je chjota xi kichjakaonajmíjin nga toje Chjotaxále Niná xi koa̱nle kʼoendajin je kjoa xi tjín sonʼnde. Kʼoati tsjoa kisatio tokuinjin nga̱ je chjota xi tsakʼinyalaijin Biblia koankjainle kʼoa tjínkʼa xi precursor regular sʼin kisixá, xi precursor especial koan kʼoa xi chjotajchínga sʼin tsakatio.

Ya Haití, jngo ti kiskajinjin xi Trevor ʼmi xi misionero sʼin tísíxá xi Mormón ʼmi je religiónle. Nkjín kʼa kichobanajmínijin xi tʼatsʼe Biblia. Nga jenkjín nó jaʼato, tokʼoakoanna nga jngo carta kisikasénna kʼoa i kitsona: “Jeme sʼe̱jnanajin kjoajtíntse kʼoa kʼiaa kjuísʼe̱nngindá. Mena nga kjuí ijngokʼa ya Haití kʼoa nga precursor especial sʼin sixá ya ʼnde jñani misionero koan kʼianga religión Mormón tsakatejnajian”. Kʼoakisʼin kjoaixi, nkjín nó nga ya Haití kitsoyason kao chjoónle.

YAA EUROPA KINIKASÉNNAJIN KʼOA SKAN KINIKASÉNNAJIN YA ÁFRICA

Nga koanskanni, yaa kinikasénnajin jngo ʼnde xi tíjna Europa jñani jekitjoʼnde ijngokʼale nga kitsoyason je ndsʼee. Kʼianga nó 1992, yaa kichuijin ya Liubliana (Eslovenia). ʼNde jebi tiyaa chrian tíjnani jñani tsakatio je xijchána nga kjesa ya Italia fikatiojin. Nga kui nichxin tokʼiaa tífitsʼia kjoajchán ya ʼnde jñani Yugoslavia ʼmi tsakai. Ngakjijnda ʼnde jebi jé tsakandiaa josʼin tsakʼinyason je ndsʼee xi tjío ya Viena (Austria), Zagreb (Croacia) kao xi tjío ya Belgrado (Serbia). Ndʼaibi, tsen tsen tjío Betel nga jngó jngó naxinandá jebi.

Kʼianga tsakiyuijin ya Eslovenia koannganajin jochon ʼnde jebi kʼoa kʼoati kichotʼayaijin je én xi male chjota xi ya tsʼe. Je chjota xi ya tsʼe i kitsonajin: “Jezik je težek”. Joxi ini kitsonajin: “Ñʼai je én xi nokjoaijin”. Kʼoatjín jokitsonajin, ñʼai je én xi nchja̱. Tsjoa kisatio tokuinjin nga tsaʼyaijin je ndsʼee nga kixi tjíofitʼale Jeobá kʼoa nga sítjoson jmeni xi síkʼantjaiyajin naxinandále Jeobá kʼoa tsaʼyaníjin josʼin kisichikontʼain Jeobá nga kʼoakisʼin. Tongisaa tinda koanjinngáninajin nga kʼiakjoan kʼoatsoná Jeobá jmeni xi machjén nga sʼiaan kʼianga bichó choa̱le. Jokjitse nga ya Eslovenia tsakiyuijin tsee jmeni xi koanjinnajin kʼoa kui xi tsakasenkaonajin nga kichokjoajinnajin je kjoa xi kitjatojinjin.

Kʼianga nó 2000 yaa kinikasénnajin ya Costa de Marfil ya África Occidental. Je chjota xi ya tsʼe ʼnde jebi tijé kiskanni. Kʼiaa kitjuijin nga sá noviembre nga nó 2002, kʼoa yaa Sierra Leona tsangínkiyuijin. ʼNde jebi kʼoati tokʼia tísʼejñá, nga̱ 11 nó nga tije kiskan ʼndeʼndeni je chjota xi ya tsʼe kʼoa ba kisatio tokuinjin nga tsínti ya Costa de Marfil tsakiyonijin. Je xi tsakasenkaonajin nga tsín kinikinroajainjin tokuinjin kuinga sa jekui kjoa kitjatojinjin jñani tsakiyuijin.

Nda kinrʼoénajin je chjota kʼianga tsakʼinyalaijin je Énle Niná kʼoa kuenta kinʼiaijin je ndsʼee nga̱ kichokjoajinle ninga nkjín nó nga kjoajchán kisʼe ya ʼndele. Ningalani ma̱ tjío je ndsʼee, kitsjoanajin jme xi tjínle. Jngo tichjaa xi najño kitsjoale je chjoónna, nga títjon je chjoónna ngasin nganda kʼoakitsole nga tsín skoé, tonga je tichjaa i kitso: “Kʼianga koan kjoajchán, je ndsʼee xi xin naxinandále tsakinyakaonajin kʼoa kʼoati machjén nga kʼoasʼiainjin tsanda jinjin”. Nga kʼoakisʼin je ndsʼee kʼoati koanmenajin kʼoakinʼiaijin tsanda jinjin.

Nga koanskanni, tsangín ijngokʼaijin ya Costa de Marfil tonga nga kjoa política tsjoake je chjota kisʼee ijngokʼa kjoasi. Kʼiaa kitjo̱ ijngokʼaijin nga sá noviembre nga nó 2004, helicóptero tsangínkoaijin kʼoa tojngó jngó mochila kichʼaijin xi nyanajin najñonajin. Jngo nitje̱n nga ya tsakiyuijin jña bationi je sondado xi Francia tsʼe. Nga koannyaonni avión tsangínkoaijin nga tsangínjin ya Suiza. Jela basen nitje̱n kichuijin ya Betel, tjíokoyanajin je Comité xi tsʼe Sucursal kʼoa kao ndsʼee xi tsoya nga sʼejna je Escuela de Entrenamiento Ministerial. Nda kiskoéyanajin, kitsjoanajin xi kichinaijin kʼoa nkjín chocolate xi Suiza manda kitsjoanajin.

Yaa naxinandá Ghana tsangínkʼainganʼio choatsaijin. Kʼianga jenda koanchon ijngokʼa, tsangín ijngokʼaijin ya Costa de Marfil. Nga kʼoasʼin nkjín kʼa nga xinxin ʼnde tsangínkiyuijin nga kjoajchán kisʼe nʼio nda tsakinyakaonajin je ndsʼee. Kʼoasʼin tsakʼendajinjin kao chjoónna nga ntsjaintsjai koakuijin kjoatsjoacha kʼoa nga tsín tokui kʼoasʼiannijin nga kʼoatsoná je naxinandále Jeobá nga tjínnele kʼoasʼiaan. Nʼio tse jmeni xi koanjinnajin nga kʼoasʼin kjoa kitjatojinjin nga tinixálaijin Jeobá.

NGA XIN ʼNDE KINIKASÉN IJNGOKʼANAJIN

Kʼianga nó 2006, jngo carta kinikasénnajin jña tjen sʼendiaanile xále Niná, kʼoatsakʼinnajin nga ya si̱kasénnajin ya Asia occidental (Oriente Medio). ʼNde jebi kʼoati ñʼai chon, kjaʼaí én nokjoa kʼoa kjaʼaísʼin ngale je chjota. Kʼoati ñaki tokjoa política sinle kʼoa nʼio sísin xi tʼatsʼe religión. Tsjoa koannajin nga tsaʼyaxkuinjin je ndsʼee xi tjío ya jtín jña kinikasénnajin kʼoa kao jtín xi tiya chrian tjíoni, nga sítjoson jmeni xi tso je naxinandále Jeobá nda fikao xínkjín kʼoa jtín tjío ninga kjaʼaí kjaʼaí én nchja̱. Kʼoati kichokjoajinle je ndsʼee ninga tsakatiochjoale xi xínkjín mani, chjota xi ñatjen síxá kʼoa kao chjotandaindʼiale.

Kʼianga nó 2012, tsangínníjin je kjoajtíntse xi jao nichxin kisʼejna ya Tel Aviv (Israel). Josaʼnda nga kisʼejna je sʼuí Pentecostés nga nó 33, alikui tikʼoakji nkjín ndsʼee mañani tsakai jokoan nga kisʼejna kjoajtíntse jebi.

Nga tikuini nó, kʼoatsakʼinnajin nga ya koanngínni̱xatʼaijin jngo naxinandá jñani tíchjoale xále Niná. Kʼianga tsangínjin kichʼa kʼaijin je xo̱n xi bʼasje naxinandále Niná, tsakʼinyasonníjin kʼoa tochoa choaa tsakatíojtín je ndsʼee nga kisatio kʼa kjoajtíntse xi jao nichxin. Nʼio nkjín sondado tjín naxinandá jebi kʼoa ngaʼi̱ ngaján binya nga síkuinda chjota, tonga alikui kinokjuinjin nga̱ kikao kʼanajin je ndsʼee nga tsakitsomaijin kʼoa kitsoyanajin josʼiainjin nga si̱kuindaijin yaonajin.

YAA ÁFRICA KINIKASÉN IJNGOKʼANAJIN

Kʼianga nó 2013, yaa kinikasénnajin ya Betel xi tíjna Kinsasa (República Democrática del Congo). Naxinandá jebi naskáchon tonga kʼoati ma̱ tjíosíjchá yaole chjota xi ya tsʼe kʼoa kjitʼaa sʼe kjoasi. Kʼianga tokʼia kichuijin i tsakixuínjin: “ʼYaxkonníjin jochon África nga̱ jesa i̱ tsakiyuijin”. Tonga tsínni nda ʼyaxkuinjin jochon, jolani nga tsín carretera kʼoa nga tsín puente jñani ma bitjatoyaa. Kʼoati tsaʼyaijin nga tjíochókjoajinle je ndsʼee ninga ma̱ tjíosíjchá yaole, tsjoake nga tsoyason, fi kjoajtín kao kjoajtíntse. Kʼoati tsaʼyaijin josʼin kisichikontʼain Jeobá je ndsʼee nga̱ sa koannkjínya sa koannkjínya. Jokjitse tsakiyuijin ya Congo-Kinsasa nʼio tse jmeni xi koanjinnajin kʼoa jo familianajin sʼin tsaʼyatokuinjin je miyonajin.

Kʼianga tífe nó 2017, yaa kinikasénnajin ya Betel xi tíjna Sudáfrica kʼoa kui Betel jebi xi ngisasa je kji kʼoa nisañandiajinla kui xá nʼiaijin je xá xi kitsʼainajin. Kʼoa jmeni xi koannajin nga xinxin naxinandá tsakʼainganʼiuijin tikui tsakinyakaoninajin nga nda kitjosonnajin je xá xi tsakʼainajin. Ya Betel jebi nkjín ndsʼee xi jekjoatsele nga ya tjíosíxá. Jtín sʼin tjío ningalani xinxin naxinandále kʼoa ningalani kjaʼaí kjaʼaísʼin ngale. Ndasʼin tjío je ndsʼee nga je Jeobá kjenngile kʼoa nga sítjoson jmeni xi tso je Biblia.

Jokji tífaʼato nó, xinxin ʼnde kinikasénnajin nga tibʼainganʼiuijin. Manganajin jochon ʼnde jñani bichuijin kʼoa chotʼayaníjin je én xi male chjota xi ya tsʼe. Ningalani tse kjoa tibitjatojinjin, tíbakónajin kjoatsjoacha je naxinandále Jeobá kao ndsʼee (Sal. 144:2). Kʼoa nga ñaki to xále Jeobá tinʼiaijin kʼoati tíbasenkaonajin nga tinindayaijin yaonajin josʼin tinixálaijin.

Nʼio chjí ʼbe nga kitsoyana xijchána xi tʼatsʼe Niná, josʼin tsjoánganʼiona je chjoónna kao je choa̱ xi batío je ndsʼee xi tjío jngo tjíjtsa Sonʼnde. Jokji nga koai nichxin, tiyondaníjin nga tosi tonda je Jeobá kuitsoyanajin.