KJOAʼMIYA XI CHOTʼAYA 43
KJOAJNDA 41 Jeobá, tinóʼyai kjoabʼetsʼoana
Kʼoétsʼoantjé xi kjaʼaí
“ Tʼetsʼoantjao xíngio [ . . . ]. Je kjoabʼetsʼoale chjotakjoakixi kjaí tjínle nganʼio” (SANT. 5:16).
XI TÍNCHJA̱NI
Ánni nga nʼio chjínile nga kʼoétsʼoantjé xi kjaʼaí kʼoa jósʼiaan nga kʼoétsʼoantjé.
1. Jómani ʼyaa nga chjí be Jeobá kʼianga bʼetsʼoalee.
TSEE kjoanda tjínná nga ma bʼetsʼoaa. Tonga si̱kjaʼaitsjenla jebi: Je Jeobá tsjoáxále ánkje kao je ʼNdíle (Sal. 91:11; Mat. 28:18). Tonga alikui ʼya xi kui xá títsjoále nga kjuinrʼoéná kʼianga bʼetsʼoaa, jesoaa Jeobá nrʼoéná (Sal. 65:2).
2. Jméni xi bakóyaná je choa̱le Pablo.
2 Koaan kʼoéyanajmílee Jeobá jmeni xi makjáojinná, tonga kʼoati machjén nga kʼoétsʼoantjé xi kjaʼaí. Kʼoakisʼin je Pablo. Tobʼelañá, i kitsole je chjotale Cristo xi Éfeso tsʼe: “Sikjaʼaitsjenno nga bʼetsʼoa” (Efes. 1:16). Tonga sakʼoa ñaki kisikʼaxki̱ joʼmi xi tsakʼétsʼoantjai. Itso xi kiskile Timoteo: “Tsjoale kjoanda Niná [ . . . ]. Likui chajinna nichxin nga nitje̱n nga sikjaʼaitsjenle nga bʼetsʼoa” (2 Tim. 1:3). Ningalani kʼoati nkjín koya xi koankjáojinle Pablo, kisikʼaya nichxin nga tsakʼétsʼoantjai xi kjaʼaí (2 Cor. 11:23; 12:7, 8).
3. Ánni nga sakʼoa tsín bʼetsʼoantjaiñá xi kjaʼaí.
3 Ánni nga sakʼoa chajinniná nga bʼetsʼoantjé xi kjaʼaí. Jngo tichjaa xi Sabrina ʼmi,a itso: “Nga tsín maʼaná toñá bʼetsʼoantjé yaoná, nga̱ tokui kuenta nʼia je kjoa xi bitjatojiaan”. Tsa kʼoamaa jotso je tichjaa, koasenkaoná jmeni xi chótʼayajiaan. Kui jchaa ánni nga nʼio chjínile nga kʼoétsʼoantjé xi kjaʼaí kʼoa jósʼiaan.
ÁNNI NGA NʼIO CHJÍNILE NGA KʼOÉTSʼOANTJÉ XI KJAʼAÍ
4, 5. Ánni kʼoatsoni Biblia nga “tjínle nganʼio” kʼianga bʼetsʼoantjé xi kjaʼaí (Santiago 5:16).
4 “Kjaí tjínle nganʼio” nga bʼetsʼoantjé xi kjaʼaí (tʼexkiai Santiago 5:16).b Binyakao xi kjaʼaí kʼianga bʼetsʼoantjé. Je Jesús be nga kʼoakuitso Pedro nga tsín bexkon, kuinga i̱ kitsonile: “Tsakʼetsʼoantjaile, jméni nga tsín tsa ndiaa cha̱ xi makjainli” (Luc. 22:32). Je Pablo be nga binyakaoná kʼianga bʼetsʼoaa. Kʼianga kinikʼéjnanʼio ya Roma, itso xi kiskile je Filemón: “An koyale nga totʼatsʼe nga tibʼetsʼoao, kjuichonrʼoeno” (Filem. 22). Tochoatsee jaʼato nga tsakʼejnandái je Pablo kʼoa kitsoyason ijngokʼa.
5 Alikui koa̱n kʼoénelee je Jeobá nga kui kʼoakatasʼín jmeni xi ʼmilee kʼianga bʼetsʼoalee, tonga kuenta sʼín jmeni xi nikjáojiaan kʼoa sakʼoa kʼoasʼín jmeni xi ʼmilee kʼianga bʼetsʼoaa. Nga ʼyaa jebi ngisaa titsongáni tokoán nga bʼeyanajmílee jmeni xi makjáojinná. Jé xi ngisa nda be josʼin koasenkaoná (Sal. 37:5; chótʼai 2 Corintios 1:11 kao notas de estudio).
6. Jósatío tokoán kʼianga bʼetsʼoantjé xi kjaʼaí (1 Pedro 3:8).
6 Kʼianga bʼetsʼoantjé xi kjaʼaí kʼoasʼin ʼyamatokonñá xíngiaa (tʼexkiai 1 Pedro 3:8).c Jngo chjota xi mamake xi kjaʼaí kuenta sʼín je kjoa xi tjíojin kʼoa basenkao (Mar. 1:40, 41). Jngo xi chjotajchínga sʼin tíjna xi Michael ʼmi, itso: “Kʼianga bʼetsʼoantje xi kjaʼaí ngisaa majinna jme kjoa xi tjíofaʼatojin kʼoa mamena basenkoa. Ningalani tsín tiʼbe je xi tibʼetsʼoantje, kuenta sʼian”. Ijngo xi chjotajchínga sʼin tíjna xi Richard ʼmi, itso: “Kʼianga bʼetsʼoantjé tsa ʼyani ngisaa mamená bisenkoaa. Kʼianga bisenkoaa je chjota xi bʼetsʼoantjé tiñá nitjosonñá jmeni xi ʼmilee je Jeobá kʼianga bʼetsʼoaa”.
7. Jósʼin basenkaoná nga bʼetsʼoantjé xi kjaʼaí (Filipenses 2:3, 4; kʼoati chótsenlai sén xi faʼaitʼa).
7 Nga bʼetsʼoantjé xi kjaʼaí alikui tokui kuenta nʼia je kjoa xi tibitjatojiaan (tʼexkiai Filipenses 2:3, 4).d Kuinga kjoa bitjatojinñá ngatsʼiaa nga je Na̱i kjinentsja sonʼnde (1 Juan 5:19; Apoc. 12:12). Tsa si̱ngalee yaoná nga kʼoétsʼoantjé xi kjaʼaí, kuenta sʼiaan nga tsín toñá xi kjoa tibitjatojiaan, nga kʼoati kjoa faʼatojin je ndsʼee xi tjío jngo tjíjtsa sonʼnde (1 Ped. 5:9). Jngo precursora xi Katherine ʼmi, itso: “Nga bʼetsʼoantje xi kjaʼaí majinna nga tsín toʼan xi kjoa tifaʼatojian. Nga kʼoasʼian alikui to yaona fiña”.
Nga bʼetsʼoantjé xi kjaʼaí alikui tokui kuenta nʼia je kjoa xi tibitjatojiaan (Chótsenlai párrafo 7)h
ʼYÁNI XI MACHJÉN NGA KʼOÉTSʼOANTJÉ
8. ʼYáni xi koa̱n kʼoétsʼoantjé.
8 ʼYáni xi koa̱n kʼoétsʼoantjé. Koaan kʼoétsʼoantjé je xi chʼin tjíokao, je xti xi skuela tjíotsoma nga̱ tjínkʼa xi to ʼyasin kʼoa tsee kjoa faʼatojin kʼoa tsa jeje̱ xi jekjimajchínga. Nkjín ndsʼee xi chjota fitjenngike, tsa tijeni xínkjín kʼoa tsa jeje̱ chjotaxá (Mat. 10:18, 36; Hech. 12:5). Tjínkʼa xi xin ʼnde fikatio xi totʼatsʼe nga kjoasi sʼe kʼoa tsakuije̱ nga kjoaxkón bichóne. Ningalani tsín ʼyaxkoaan je ndsʼee koaan kʼoétsʼoantjé. Tsa kʼoasʼiaan, kʼoasʼin tinitjosonñá jmeni xi kitso je Jesús nga tjínnele tsjoacha koaan xíngiaa (Juan 13:34).
9. Ánni ndatjínni nga kʼoétsʼoantjé je ndsʼee xi xá kjinele jinnaxinandále Niná kʼoa kao yánchjínle.
9 Kʼoati koa̱n kʼoétsʼoantjé je ndsʼee xi xá kjinele jinnaxinandále Niná. Jolani je Cuerpo Gobernante kao xi binyakao, Comité xi tsʼe Sucursal, ndsʼee xi xá kjinele jñani tjío sucursal, superintendente xi tsʼe circuito, xi chjotajchínga sʼin tjío kʼoa kao siervo ministerial. Je ndsʼee jebi binyakaoná, tonga kʼoati kjoa faʼatojin (2 Cor. 12:15). Jngo superintendente xi tsʼe circuito, xi Mark ʼmi, itso: “Xi ngisa sikjáojian kuinga kjin tjío je xijchána, nga̱ jejchínga kʼoa chʼin tjínle. Ningalani binyakao je tichja kao xʼinle, alikui nda sʼe tokoan nga̱ tsín kjima josʼin tibasenkoa”. Ningalani tsín ʼyaa jme kjoa xi faʼatojin nga jngó jngó je ndsʼee, ndatjín nga kʼoétsʼoantjé (1 Tes. 5:12, 13). Kʼoati kʼoétsʼoantjé je yánchjínle, nga̱ kʼoati binyakao nga tosi tonda sítjoson xá xi kjinele je ndsʼee.
10, 11. A sasénle Jeobá kʼianga bʼetsʼoantjé ngatsʼi je ndsʼee.
10 Kʼianga bʼetsʼoaa sakʼoa kui kʼoaʼmilee je Jeobá nga katabasenkao je ndsʼee xi ndoyá tjíoʼya kʼoa tsa jeje̱ xi xínkjín kisicha. Jngo ndsʼee xi Donald ʼmi, itso: “Nga nʼio nkjín mani je ndsʼee kao tichjaa xi kjoa tjíofaʼatojin, sakʼoa tobʼetsʼoantjé ngatsʼi”.
11 Je Jeobá sasénle nga bʼetsʼoantjé ngatsʼi ndsʼee, nga̱ tsínkjoan ʼyaa jméni xi machjénle nga jngó jngó (Juan 17:20; Efes. 6:18). Kʼoasʼin bakoñá nga tsjoachaa je ndsʼee nga bʼetsʼoantjé (1 Ped. 2:17).
JÓSʼIAAN KʼIANGA TOJNGO NDSʼEE KʼOÉTSʼOANTJÉ
12. Jósʼin jchañá ʼyáni xi kʼoétsʼoantjé.
12 Kuenta sʼiaan ʼyani xi kʼoétsʼoantjé. Ndatjín nga bʼetsʼoantjé ngatsʼi ndsʼee, tonga kʼoati koa̱n nga tojngokjoan xi kʼoétsʼoantjé. Tobʼelañá, tsa jngo ndsʼee xi táo chʼin tjínle, tsa jngo ti xi tísíkinroajen kon nga kjoa faʼatojin ya ndʼiaskuela, tsa jngoje̱ ndsʼee kʼoa tsa jngo tichjaa xi toje tísíjchá je ʼndíxtile (Efes. 6:4). Tsa kuenta sʼiaan ʼyani xi nganʼio machjénle, si̱jinjinlee yaoná jotjío kon kʼoa kʼoétsʼoantjaijián (Rom. 12:15).e
13. A koaan kʼoétsʼoantjé je ndsʼee ninga tsín ʼyaxkoaan.
13 Si̱kʼaxkiaa jaʼaínle ʼyani xi kʼoétsʼoantjé. Kʼianga kʼoétsʼoaa koaan si̱kʼaxkiaa je jaʼaínle ndsʼee ninga tsínkjoan ʼyaxkoaan. Jolani je ndsʼee xi ndoyá tjíoʼya ya Crimea, Eritrea, Rusia kao Singapur. Yaa jw.org faʼaitʼa joʼmi je ndsʼee.f Jngo superintendente xi tsʼe circuito xi Brian ʼmi, itso: “Nga bʼetʼaxoan jaʼaínle je ndsʼee xi ndoyá tjíoʼya kʼoa nga sikʼaxkia joʼmi, ngisaa choa ñʼai mana nga faʼaitsjenna kʼianga bʼetsʼoa”.
14, 15. Jósʼin jchañá jmeni xi si̱jé kʼianga kʼoétsʼoantjé je ndsʼee.
14 Kʼoakʼuínlee je Jeobá josʼin mená nga koasenkao je ndsʼee. Je Michael, xi sajená kabʼaxki̱ ya párrafo 6, itso: “Kʼianga bʼexkia ya jw.org xi tʼatsʼe ndsʼee xi ndoyá tjíoʼya kui sikjaʼaitsjen jósʼe̱ tokoan tsa anlaña xi kui kjoa tijnajian. Jejin chjoónna sikjáojian kʼoa kuijin xi koa̱nmena nga kʼoakʼuínna nga nda tíjna. Nga kui sikjaʼaitsjen ʼbeña joxinle je Jeobá kʼianga bʼetsʼoale nga sijéntje je ndsʼee xi ndoyá tjíoʼya xi yánchjín tjínle” (Heb. 13:3).
15 Kʼianga kjitʼa nikjaʼaitsjenjiaan je ndsʼee xi ndoyá tjíoʼya, ngisasa nkjín koya jmeni xi ʼmilee je Jeobá kʼianga bʼetsʼoalee. Tobʼelañá, koaan kʼoakʼuínlee je Jeobá nga tsín totaon katabe je xi síkuinda ndoyá kʼoa tsakuije̱ nga tosi tonda katabʼaiʼndele nga katabexkón Niná (1 Tim. 2:1, 2). Kʼoati koa̱n kui si̱jélee Jeobá nga katabinyakao je choa̱le ndsʼee je jtín xi ya tjíochrian, kʼoa nga kʼoati kui choa̱le ndsʼee kuinyakao nga kjuinrʼoé Énle Niná je xi tsín testigole Jeobá ma (1 Ped. 2:12). Tojosʼin jekaʼyaa, tsa kuenta sʼiaan ʼyani xi nganʼio machjénle, tsa si̱kʼaxkiaa jaʼaínle ʼyani xi kʼoétsʼoantjé kʼoa tsa kʼoakʼuínlee Jeobá josʼin mená nga katabasenkao je ndsʼee, koaan kʼoakuixoán nga kʼoétsʼoantjé toʼyani ninga tsínkjoan ndoyá tíjnaʼya. Tsa kʼoasʼiaan, kʼoasʼin koakoñá nga tsjoachaa xíngiaa (1 Tes. 3:12).
JÉ JEOBÁ XI NGISA NDA BE JOSʼIN KOASENKAONÁ
16. Jméni xi kuenta sʼiaan nga kʼoétsʼoaa (Mateo 6:8).
16 Tojosʼin tiʼyaa, nʼio chjíle kʼianga bʼetsʼoaa nga̱ binyakao xi kjaʼaí. Tonga kʼoati kuenta sʼiaan nga jebe Jeobá jmeni xi nijé kʼianga bʼetsʼoaa. Alikui machjén nga ñá kʼoakʼuínlee josʼin kʼoendajin jngo kjoa, nga̱ tongini jebe jmeni xi machjénle choʼndale. Saʼnda tikje ʼyañá jmeni xi machjénle je ndsʼee kʼoa saʼnda tikje bejinni tsanda je, tonga je Jeobá jetongini be (tʼexkiai Mateo 6:8).g I̱ kjoaʼmiya jebi nkjín koya kaʼyaa ánni nga nʼio chjínile nga kʼoétsʼoantjé xi kjaʼaí. Ijngosa koya anni nga kʼoanʼiañá, kuinga mandosinná je xíngiaa. Kuinga bʼetsʼoantjaiñá nga̱ tsjoachañá, kʼoa je Jeobá nda sʼe kon nga kʼoasʼin chjénngilee nga tsjoacha maa xíngiaa.
17, 18. Jngo choa̱ tʼejnai ánni kʼoabixónñá nga kuenta sʼín je Jeobá kʼianga bʼetsʼoaa.
17 Ninga tsínkjoan kʼoakoa̱n josʼin mená nga bʼetsʼoantjé je ndsʼee, kʼianga bʼetsʼoantjé kʼoasʼin bakoñá nga tsjoachaa kʼoa nʼio chjí be je Jeobá nga kʼoanʼia. Si̱kjaʼaitsjenla jngo nʼai xi jao mani xtiʼndíle, jngo tsotiʼndí kʼoa jngo tiʼndí. Nga timʼe je tiʼndí, je tsotiʼndí itsole je nʼaile: “Tisenkoai je tindsʼe ánni nga katamandani”. Je xi nʼai ma nda tísíkuinda je tiʼndíle nga̱ tsjoake, tonga kʼoati nda sʼe kon nga kʼoatso je tsotiʼndí nga síjéntjai je tiʼndíndsʼe̱.
18 Tikʼoasʼinni, je Jeobá kui xi mele nga kuenta sʼiaan je ndsʼee kʼoa nga kʼoétsʼoantjé. Tsa kʼoasʼiaan, kʼoasʼin koakoñá nga kuenta nʼia xi kjaʼaí, nga tsín to yaoná mangínñá, kʼoa je Jeobá chjí be nga kʼoanʼia (2 Tes. 1:3; Heb. 6:10). Tojosʼin jekaʼyaa, nʼio ndasʼin bichómani kʼianga bʼetsʼoaa. Tsínkʼia si̱chajiaan nga kʼoétsʼoantjé je ndsʼee.
KJOAJNDA 101 Jtín sʼin si̱xálee Niná ngatsʼiaa
a Alikui tsa ñaki kʼoaʼmi kʼa chjota xi bʼaxki̱ i̱bi.
b Santiago 5:16: “Chja̱ʼatakontʼalao xíngio, tʼetsʼoantjao xíngio, jméni nga koa̱nndasínio. Je kjoabʼetsʼoale chjotakjoakixi kjaí tjínle nganʼio, kjaínga nda bitjosonle”.
c 1 Pedro 3:8: “Xi fetʼani, ngatsʼio tojngo tʼiaon ni̱ma̱no, tijaotakon, tjaocha katamao xíngio joni tsa ndsʼao, jchamatakon xíngio, indanangi cho̱bao”.
d Filipenses 2:3, 4: “Ali kʼoa tochʼaondai mao. Ali kʼoajin tongʼatakon mao. Tosa kjoayo̱ma̱ kjiatakon nga chósonnilao nga xikʼa ngisa nda male kjoa xi tjín kaoni tsa jon. 4 Ali kuindajin nʼiao xi totsaon kjoa, tonga kʼoati tʼiaon kuinda tsʼe xi kjaʼaí chjota”.
e Chótsenlai ya jw.org je video Takeshi Shimizu: Jé Jeobá xi nrʼoé kʼianga bʼetsʼoaa.
f Chótʼai ya jw.org jñani tso: “Testigos de Jehová presos por sus creencias (por países)”.
g Mateo 6:8: “Ali kʼoajin nʼiao jo sʼín nga je, nga̱ je Nʼaino be ngayije xi machjénno, tongini nga nijáo”.
h XI TÍNCHJA̱NI SÉN XI FAʼAITʼA: Je ndsʼee kao tichjaa tjíobʼétsʼoantjai xi kjaʼaí ninga kʼoati kjoa tjíofaʼatojin tsanda je.