Jméni xi bakóyaná je choa̱ xi tsʼe tao̱n xi talento ʼmi

1, 2. Ánni nga kui tsakʼéyanajmísíni Jesús je choa̱ xi tsʼe talento.

JE Jesús kui tsakʼéyanajmí je choa̱ xi tsʼe tao̱n xi talento ʼmi kʼianga katamajinle je chjotale xi ya koai ngʼajmi jmeni xi tjínnele sʼin. Ni ya ngʼajmi koanngián kʼoa ninga mai, nʼio tse xi bakóyaná choa̱ jebi. Tonga machjénní nga katamajinná jméni xi tsoyanile.

² Kʼiáni tsakʼéyanajmíle Jesús je chjotale je choa̱ jebi. Kʼianí nga kʼoatítsole jmeni xi koa̱n nga je rey kʼoéjna kʼoa jokoa̱n nga koaitsʼia je nichxin xi tokjoetʼani (Mateo 24:3). Kʼoa kuinga ʼyañá kʼianga je choa̱ xi tsʼe talento kʼoati ya majngokao je én xi tongini kinchja̱ Jesús kʼoa nga kʼia kuitjoson nichxin xi totífikjetʼa.

3. Jméni xi bakóyaná nga jngó jngó choa̱ xi faʼaitʼa ya Mateo 24 kao 25.

³ Kʼianga kʼoakitso Jesús jmeni xi koa̱n je nichxin xi totífikjetʼa, ño koya choa̱ tsakʼéyanajmí jmeni xi koanmele nga sʼin je chjotale nga kui nichxin. Choa̱ jebi yaa faʼaitʼa Mateo 24:45 saʼnda 25:46. Je choa̱ xi títjon, tsʼení jngo choʼnda xi nʼiotʼakon, xi tsonile, je xi jngo jtín mani xi ya koai ngʼajmi xi kui xá kjinele nga kuitsoyale je choʼndale Niná. Je Jesús kui xá kitsoyanile je jtín jebi nga kixi katama kʼoa nga katabe josʼin.a (Tʼexkiai nota.) Je choa̱ xi majaoni, kui tʼatsʼe te yánchjínxo̱ngó. Je choa̱ jebi, kui tsakájinkonni Jesús ngatsʼi xi ya koai ngʼajmi nga tjínnele koationda kʼoa nga tjenyatokon koatio nga̱ tsín be kʼiáni kjoaʼaí je Jesús.b (Tʼexkiai nota.) Je choa̱ xi majanni, kui tʼatsʼe talento. Je Jesús kui xá tsakʼéyanajmíni kʼianga nʼio kʼoenele yaole je xi ya koai ngʼajmi nga nʼio sixá kʼianga sitjoson jmeni xi kisʼenele. Je choa̱ xi mañoni, kui tʼatsʼe je barré kao tindso. Je choa̱ jebi jé bakóyale je xi i̱ tjínle kjoachoya i̱ Sonʼnde nga tjínnele nga kixi koa̱n kʼoa nga kuinyakao je xi ya koai ngʼajmi.c (Tʼexkiai nota.) Kjoaʼmiya jebi kui koakoyaná je choa̱ xi tsʼe talento.

JNGO CHJOTA XI NʼIO TSE TAO̱N TSJOÁLE CHOʼNDALE

4, 5. 1) ʼYáni xi tsoyanile je chjota xi síkʼaxki̱ choa̱ xi tsʼe talento. 2) Jméni xi talento tsakʼin. (Chótsenlai nota.)

⁴ (Tʼexkiai Mateo 25:14-30.) Kʼianga tsakʼéjna je choa̱ xi tsʼe talento, je Jesús kui kinchja̱ni tʼatsʼe jngo chjota xi kjin ki. Kʼoati ñandia nga kinchja̱ni tʼatsʼe jngo chjota xi kjin ki nga mele nga rey koa̱n (Lucas 19:12).d (Tʼexkiai nota.) Jenkjín nó tjínle kʼianga je xo̱n xi nichjén, kʼianga kʼoasʼin bakóya nga jao choa jebi nga je Jesús tsoyanile, nga ya ki ngʼajmi nga nó 33. Tonga je Jesús alikui kʼia rey kinikao, kiskoyakaola saʼnda nga nó 1914, kʼianga “je kontrale” ya tsakationgi ndso̱ko̱ “joni tsa yá xi binyáne ndso̱ko̱” (Hebreos 10:12, 13).

⁵ Kʼianga kje fijin chjota xi síkʼaxki̱ choa̱ jebi, kinchjaale je choʼndale kʼoa jin talento kitsjoale. Ñaki tao̱nxkónní xi kitsjoale.e (Tʼexkiai nota.) Kʼoakitsole nga je talento xi jin mani xi kitsjoale katasíxákao ánni nga tsesa tao̱n katanjenile. Chjota jebi nʼio tsabechjí talentole. Kʼoa xi kao Jesús, kʼoati tíjna jmeni xi nʼio tsabechjí. Kui xá xi kisʼin kʼianga tsakʼejna i̱ Sonʼnde.

6, 7. Jméni xi tsoyanile je talento.

⁶ Xi ngisa nʼio chjí tsabekon je Jesús kuinga kitsoyason. Kʼianga kʼoakisʼin nʼio nkjín xi chjotale koanni (tʼexkiai Lucas 4:43). Je Jesús tsabení nga machjén nga ngisasa nʼio kʼuínyason je Énle Niná. Kuinga i̱ kitsosínile je chjotale: “Chjóʼaingio xkon, chótsenlao sonʼnde, nga̱ jejichotaon nichxinle nga sʼe̱xkó” (Juan 4:35-38). Je Jesús jngoyale tsojmintje kisingósonkao nga kʼoasʼin kʼuínyason. Kʼoa je Jesús jé mangóson je naile tsojmintje kʼianga ñaki kuenta sʼín nga nda katasʼexkó je tsojmintjele. Kʼianga kjesa fijin ngʼajmi jé chjotale tsakánele nga kʼoasʼin katatsoyason (2 Corintios 4:7). I kitsole: “Tangíon, tinyaʼao ngatsʼi naxinandá, tikinjao chjota tʼatsʼan” (Mateo 28:18-20).

⁷ Tojoná kisʼin je chjota xi je tsakánele talento je choʼndale, je Jesús jé tsakánele je chjotale xi ya koai ngʼajmi nga kuitsoyason (Mateo 25:14). Je talento kui tsoyanile nga kʼoasʼin kʼuínyason kʼoa nga sʼe̱sjai je xi chjotatjenngile Cristo katama.

8. Ninga tsín ngóson tjín talento kitsjoale je choʼndale, jméni xi koanmele je chjota xi síkʼaxki̱ choa̱ xi tsakʼéjna Jesús.

⁸ Je chjota xi síkʼaxki̱ choa̱ jebi aon talento kitsjoale je choʼndale xi títjon, je xi majaoni jao kitsjoale kʼoa je xi majanni jngo kitsjoale (Mateo 25:15). Tojosʼin tiʼyaa, nga jngó jngó choʼnda alikui tongóson tjín talento tsakʼaile. Tonga je chjota jebi kui xi koanmele nga kʼoenele yaole nga jan je choʼndale nga katasíxákao tao̱n jebi kʼoa nga katanjesonle. Kʼoatisʼinni, je Jesús kui xi koanmele nga nʼio kʼoenele yaole je chjotale xi ya koai ngʼajmi nga kuitsoyason (Mateo 22:37; Colosenses 3:23). Kʼianga kisʼejna sʼuí Pentecostés nga nó 33, je chjotale nʼio nkjín chjota xi xin naxinandále kitsoyasonle. Kʼoa je libro xi tsʼe Hechos yaa bakóná nga nʼio kitsoyason je chjotale Jesús (Hechos 6:7; 12:24; 19:20).f (Tʼexkiai nota.)

JE CHOʼNDA SÍXÁKAO JE TALENTO XI TSAKʼAILE

9. 1) Jméni xi kisʼin nga jao choʼnda xi kixi koan. 2) Jméni xi bakóyaná jokisʼin. 3) Jméni xi sʼin je xi i̱ koatio i̱ Sonʼnde nga jeʼndenaxó koa̱n.

⁹ Nga jao choʼnda xi kinjesonle je tao̱n jé tsoyanile je xi ya koai ngʼajmi, xi kixi kjima, nichxin xi totífikjetʼani. Nʼio tjíotsoyason je Énle Niná, kʼoa ngisa nʼio kʼoakisʼin kitsʼiakjoanni nó 1919. Je choa̱ xi tsakʼéjna Jesús, alikui tongóson tjín talento tsakʼaile je xi jao choʼnda. Tonga ali tsakuijin xi tsonile jebi, tsa jao jtín mani je xi ya koai ngʼajmi, je xi kixi kjima. Nga jao choʼnda xi kisikʼaxki̱ Jesús jaoya kʼoakji kitsjoanile je naile. Ngóson kji nʼio kisixá nga jao. Tonga a tojé xi ya koai ngʼajmi xi tjínnele nga kʼoasʼin nʼio kuitsoyason. Majain. Je choa̱ xi tsʼe barré kao tindso kui bakóyaná nga je xi i̱ koatio i̱ Sonʼnde nga jeʼndenaxó koa̱n machjénní nga kixi koaitʼale je xi ya koai ngʼajmi kʼoa nga kuinyakao nga kʼoasʼin kuitsoyason. Nʼio tse kjoanda tjenkao nga kui xá tíbʼaile tsanda je. Ñaki “tojngo” mani ngatsʼi nga tjíotsoyason kʼoa nga chjotale Cristo tjíosíkao chjota (Juan 10:16).

10. Jméni xi bakó nga nichxin fetʼa tiyoaa ndʼaibi.

¹⁰ Je Jesús kui xi mele nga nʼio katasíxá ngatsʼi je chjotale nga nkjínsa xi chjotale katama. Je chjotale Cristo xi tsakatio nga siglo 1 kʼoakisʼin. Kʼoa nichxin fetʼa xi tiyoaa ndʼaibi, a kʼoati kjima kʼianga tíbitjoson je choa̱ xi tsʼe talento. Kʼoakjima, kjesa kʼoasikji nʼio ʼmiyasonjin jokjima tsa ndʼaibi. Kʼianga kʼoasʼin nʼio tjíosíxá ngatsʼi je chjotale Cristo, nkjín jmi chjota fisʼenngindá nga xki̱ nó, kʼoa xijema kʼoati tsoyason tsanda je. Je Jesús nʼiojin tsjoa tjínle. Jebi kui xi bakóná nga tíbitjoson je én xi tongini kitso Jesús tʼatsʼe nichxin fikjetʼa, nga kʼuínyason Énle Niná.

JE CHJOTA KJOAʼAÍ

11. Jósʼin ʼyañá nga kʼia kjoaʼaí Jesús nga tísʼejna kjoañʼai xi nʼio tse.

¹¹ Je Jesús i kitso: “Kʼia nga jekoan nkjín nichxin, jaʼai naile choʼndabe, kʼoa tsakʼénda kuentale kao je” (Mateo 25:19). Kʼiáni kjoaʼaí je nai, xi tsonile, je Jesús. Kʼiaa kjoaʼaí kʼianga jetífikjetʼa je kjoañʼai xi nʼio tse. Jósʼin ʼyañá. Je én xi tongini kinchja̱ ya Mateo 24 kao 25, je Jesús nkjín kʼa kʼoakitso kʼianga kjoaʼaí. Tobʼelañá, kʼoakitso kʼianga skoe̱ je chjota nga “je ʼndíle chjota xi kjoaʼaíjinni yojbi ya ngʼajmi”. Jebi kʼiaa kuitjoson nga tísʼejna je kjoañʼai xi nʼio tse, kʼianga kjoaʼaísíjtsoʼa ngatsʼi chjota je Jesús. Je Jesús kʼoati tsakájinkon je chjotale je xi kʼia tjío je nichxin xi totífikjetʼa nga tjenyatokon katabatio. Kitsole: “Nga̱ tsín tsa ʼyao jme ora nga kjoaʼaí Naino”. Kitsosale: “Nga̱ je ʼndíle chjota kjoaʼaí kui ora kʼia nga tsín tjínjinno” (Mateo 24:30, 42, 44). Je choa̱ xi tsʼe talento, kʼoati kui nchja̱ni kʼianga kjoaʼaísíjtsoʼa Jesús je chjota kʼoa nga kjoaʼaísíkje jmeni xi chonle Na̱i i̱ Sonʼnde.g (Tʼexkiai nota.)

12, 13. 1) Jméni xi kitsole je chjota xi kisikʼaxki̱ je Jesús nga jao choʼndale xi títjon. 2) Ánni nga kʼoakitsosínile. 3) Kʼiáni sʼe̱choa̱ je xi ya koai ngʼajmi. (Chótsenlai je rekuadro xi tso: “Jé Niná tsjoále chjíle kʼianga jekuiyá”.) 4) Jmé kjoanda xi tsjoále Jesús je xi tjíobinyakao je xi ya koai ngʼajmi nga tjíotsoyason.

¹² Kʼianga jejaʼaini je chjota xi kisikʼaxki̱ je Jesús i kitsole nga jao choʼndale xi títjon: “[Nda kinʼiai] ndai choʼnda, kʼoa xʼinkjoai. Kjaínga nda kinikitjosuin kjoa xi tochoa tjín. Ndʼai kʼoejnatʼale xi ngisa tse tjín” (Mateo 25:21, 23). Ánni nga kʼoakitsosínile. Kuinga je choʼnda xi títjon nga aonsa talento kinjesonle, kʼoa je choʼnda xi majaoni nga jaosa talento kinjesonle. Jméni xi tsoyanile jebi. Xi tsonile, jméni xi sʼin je Jesús kʼianga kjoaʼaí.

¹³ Kʼianga tojeme kjoaʼaí je kjoañʼai xi nʼio tse, je Jeobá kʼoechoaa je xi ya koai ngʼajmi je xi kixi, xi i̱ tjíosa i̱ Sonʼnde nga kʼia. Kui xi tsonile, kʼianga je Jeobá ñaki sa̱sénle xi tʼatsʼe kʼianga ya ngʼajmi koai (Apocalipsis 7:1-3). Kʼianga kjesa fitsʼiajin Armagedón, je Jesús yaa koaikao ya ngʼajmi. Kʼoa jókoa̱nni je xi i̱ koatio i̱ Sonʼnde nga jeʼndenaxó koa̱n, je xi kʼoasʼin tjíobinyakao je xi ya koai ngʼajmi, nga kʼoasʼin tjíotsoyason. Jé Jesús sijtsoʼa kʼoa jngoyale barré sʼin skoe̱kon. Kui xi tsonile, nga ya sikatío jngo ʼNdenaxó kʼianga jekoatexoma je Chjotaxále Niná (Mateo 25:34).

JE CHOʼNDA XI TSʼEN KʼOA XI TSÍN JME XI SʼÍN

14, 15. Jósʼin ʼyañá nga tsínkui xi kitsole Jesús nga nkjín mani, xi ya koai ngʼajmi, xi tsʼen koa̱n xi tsín jme xi sʼin.

¹⁴ Je choa̱ xi tsakʼéjna Jesús kʼoati nchja̱ni je choʼnda xi majanni. Jókoanni choʼnda jebi. Je Jesús kʼoakitso nga tsín kisixákao talento xi tsakʼaile nga tsesa tao̱n katanjele. Kʼoa ni yajinla banco kikao nga sikinjeson ʼndíle. Tosa totsakʼéjnañe je talento. Je chjota xi kitsjoale je talento kʼoakitsole nga to choʼnda tsʼen ma kʼoa tsín jme xi sʼín. Tsakjáʼale je talento kʼoa jé kitsjoale je choʼnda xi títjon. Kʼoa tsakʼaonsje je choʼnda tsʼen jebi ya “nditsin jña njio” chon. Kʼoa choʼnda jebi yaa nʼio kiskiʼndá (Mateo 25:24-30; Lucas 19:22, 23).

¹⁵ Kʼianga kʼoakitso je Jesús nga jngo choʼnda xi tsʼen koan, a kui xi kitsonile kʼiatsa jan mani xi ya koai ngʼajmi nga jngo xi chʼaosʼin. Majain. Jósʼin ʼyañá. Kao kui ʼyañá nga ningósonkoaa je choa̱ xi tsʼe choʼnda xi nʼiotʼakon kao je xi tsʼe te yánchjínxo̱ngó. Je choa̱ xi tsʼe choʼnda xi nʼiotʼakon, je Jesús jngo choʼnda tsʼen kisikʼaxki̱ je xi kitjenngike je choʼnda xi ngikʼa. Je Jesús ali tsakuijin xi kitsonile kʼianga tsʼen koa̱n je choʼnda xi nʼiotʼakon. Totsakájinkonní nga tsín kʼoakatasʼín jokisʼin je choʼnda tsʼen xi síkʼaxki̱ choa̱ jebi. Kʼoati mangóson josʼin kitsoya Jesús je xi tsʼe te yánchjínxo̱ngó. Kʼoakitso nga aon mani xi chini koan. Tonga ali tsakuijin xi kitsonile tsa basen xi ya koai ngʼajmi xi chini koa̱n. Kʼoati totsakájinkon ngatsʼi xi ya koai ngʼajmi nga tjínnele koationda kʼoa nga tjenyatokon koatio.h (Tʼexkiai nota.) Kʼoatisʼin tíjna je choa̱ xi tsʼe talento. Je Jesús ali tsakuijin xi kitsonile nga tsʼen koa̱n je xi ya koai ngʼajmi nichxin xi tiyoaa ndʼaibi. Totsakájinkonní je xi ya koai ngʼajmi nga nʼio katasíxá, nga tsín kʼoakatasʼín jokisʼin je choʼnda tsʼen xi kisikʼaxki̱ (Mateo 25:16).

16. 1) Jméni xi bakóyaná je choa̱ xi tsʼe talento. 2) Jósʼin kʼuínyai je choa̱ xi tsʼe talento kʼianga jekachotʼayá kjoaʼmiya jebi. (Chótsenlai je rekuadro xi tso: “Jmé xi tsoyanile je choa̱ xi tsʼe talento”.)

¹⁶ Jméni xi bakóyaná je choa̱ xi tsʼe talento. Jao koya tjínni xi bakóyaná. Xi títjon, kʼianga nʼio chjíle jmeni xi tsakánele Jesús je xi ya koai ngʼajmi. Jméni. Kuinga kuitsoyason kʼoa nga chjotale Cristo sikao chjota. Xi majaoni, kui xi mele Jesús nga nʼio si̱xá ngatsʼiaa kʼianga kʼuínyasoán. Kʼiatsa nʼio kʼuínyasoán kʼoa kʼoasʼiaan tojmeni xi bʼénená je Jesús, tse kjoanda tsjoáná (Mateo 25:21, 23, 34).