Jméni xi bakóyaná je padrenuestro (xi títjon)

1. Jósʼin nichjén je kjoabʼetsʼoa padrenuestro kʼianga ʼmiyasoán.

NʼIO nkjín chjota xi be jotso je padrenuestro (Mateo 6:9-13). Ñá xi testigole Jeobá maa, kjitʼaa nokjoakaoñá chjota xi tʼatsʼe kjoabʼetsʼoa jebi kʼianga ʼmiyasonlee. Tobʼelañá, nichjénñá je én xi “katjinroa kjoatéxomali” tso kʼianga ʼmiyalee chjota nga Chjotaxále Niná xotsole kʼoa nga jeme ʼndenaxó sikao je Sonʼnde. Kʼoati nichjén je én xi “kataʼyaxkón jaʼaínli” tso kʼianga ʼmiyalee chjota nga tjínle jaʼaín je Niná kʼoa nga tjínnele jchaxkoán nga̱ tsjení (Mateo 6:9).

2. Jósʼin ʼyañá nga tsínkui xi mele Jesús nga tikui tima én si̱chjénñá kʼianga kʼoétsʼoaa.

² Nʼio nkjín chjota xi to jenya jko̱ jotso je padrenuestro kʼoa kui bʼéxkia kʼianga bʼétsʼoale Niná. Tonga a kui xi kitso Jesús nga kʼoasʼiaan. Mai. Je Jesús kitso: “Kʼia nga bʼetsʼoai, ali tikuijinni én nichjain” (Mateo 6:7). Ñandia kʼianga kui tíbakóyale Jesús je chjotale josʼin kʼoetsʼoa, kui kisikʼaxki̱ je padrenuestro tonga kjaʼaí én kisichjén (Lucas 11:1-4). Kui xi bakóyaná nga kui kitsoya Jesús jmeni xi si̱jé kʼianga kʼoétsʼoaa.

3. Jméni xi chjónangilai yaoli kʼianga chótʼayai nga jao kjoaʼmiya jebi.

³ Kjoaʼmiya jebi kao xi ijngo kui jchaa tʼatsʼe padrenuestro. Kʼianga chótʼayá kjoaʼmiya jebi, chjónangilai yaoli: “Jósʼin bakóyana je padrenuestro nga ngisa ndasʼin kʼoetsʼoa. A kʼoatisʼian jotso je padrenuestro”.

“NʼAINAJIN XI TIJNAI NGʼAJMI”

4. 1) Jméni xi bakóyaná je én xi “Nʼainajin” tso. 2) Ánni kʼoabixónsíñá kʼianga kʼoati nʼaile mani je Jeobá je xi koatio i̱ Sonʼnde.

⁴ Kʼianga tsakʼétsʼiakao kjoabʼetsʼoale je Jesús i kitso: “Nʼainajin”. Je én jebi kui síkjaʼaitsjenjinná kʼianga je Jeobá nʼaile mani ngatsʼi je ndsʼee kao tichjaa xi tjío jngo tjíjtsa Sonʼnde (1 Pedro 2:17). Je Jeobá tíkjoejin kʼa chjotale Cristo kʼianga ya koatio ya ngʼajmi kʼianga xtile kuitsole. Kʼoa kuinga nʼaile mani je Jeobá (Romanos 8:15-17). Ánni kʼoabixónsíñá kʼianga kʼoati nʼaile mani je Jeobá je xi koatio i̱ Sonʼnde. Kuinga Jeobá títsjoále kjoabijnachon kʼoa tojmeni xi machjénle. Kʼoa nichxin xi nroaján, kʼianga jechjotatsje koa̱n nga jekjoaʼatojin je choa̱ xi tokjoetʼani, kʼoati xtile Niná koa̱n (Romanos 8:21; Apocalipsis 20:7, 8).

5, 6. 1) Jmé kjoatjao xi nʼio chjíle xi koa̱n tsjoále je ʼndíxtile je xi xijchá ma. 2) Jméni xi koa̱n sʼin nga jngó jngó je ʼndíxti kʼianga tíbʼaile kjoatjao jebi. (Chótsenlai sén xi fitsʼiani kjoaʼmiya jebi.)

⁵ Je kjoatjao xi nʼio chjíle xi koa̱n tsjoále je ʼndíxtile je xi xijchá ma kuinga kuitsoyale nga Nʼaile mani je Jeobá kʼoa nga kuitsoyale josʼin kʼoetsʼoa. Jngo superintendente viajante xi Sudáfrica tsʼe kʼoatso nga saʼnda nga kitsin je xtiyánchjínle, ntsjaintsjai tsakʼétsʼoa kao je kʼianga manjio, tokʼiakjoán nga tsín kʼoakisʼin kʼianga je xi tsín. Je xtiyánchjínle kʼoatso nga tsín faʼaitsjenle jme én xi kisichjén kʼianga bʼétsʼoa je nʼaile. Tonga je xi faʼaitsjenle kuinga nda kisatio kon nga kʼoakisʼin je nʼaile. Kʼoa nga jekoanle tsakʼétsʼoa, je nʼaile kʼoakitsole nga ñaki katanchja̱ nga kʼoetsʼoa. Je nʼaile kʼoasʼin kinrʼoéle jmeni xi kitsole je Jeobá josʼin síkjaʼaitsjen kʼoa jotjío kon. Xi ijngosani, kʼoasʼin tsabeni jokjoan tjío kon nga jngó jngó. Kʼoa tsabe josʼin tsakasenkao nga kui katafitjenngi jotso je padrenuestro kʼoa nga ngisasa nda kʼoetsʼoa.

⁶ Kʼianga jekoanjchínga xtiyánchjínle ndsʼee jebi, ngisa nʼio koanmiyosa Jeobá. Ndʼaibi jechixan kʼoa to xále Niná tjíosʼín kao je xʼinle. Je kjoatjao xi ngisasa nio nda xi koa̱n tsjoále je xijchá je ʼndíxtile kuinga kuitsoyale nga ñaki tíjna je Jeobá kʼoa nga koa̱n miyole koa̱n. Nga jngó jngóní je ʼndíxti nga kuenta sʼin josʼin tjíosímiyo je Jeobá (Salmo 5:11, 12; 91:14).

“KATAʼYAXKÓN JAʼAÍNLI”

7. 1) Jmé kjoanda xi tjínná xi testigole Jeobá maa. 2) Jósʼin bakoá nga ʼyachjiá kjoanda jebi.

⁷ Ñá xi testigole Jeobá maa, kui kjoanda tjínná nga ʼyaa je jaʼaínle Jeobá kʼoa nga kui kichʼá (Hechos 15:14, TNM; Isaías 43:10). Ya padrenuestro, je Jesús kʼoakitso nga si̱jélee je Jeobá nga kataʼyaxkón je jaʼaínle, kitso: “Kataʼyaxkón jaʼaínli”. Kui xi tsonile nga mená nga katabitjotsje je jaʼaínle Niná. Jósʼin bakoá kʼianga ʼyachjiá nga ʼyaa je jaʼaínle Jeobá kʼoa nga kui kichʼá. Kuinga nijélee nga katabasenkaoná nga tsínkui kʼoakuixoán kʼoa nga tsínkui kʼoasʼiaan xi sijndí je jaʼaínle. Alikui koa̱n kʼoasʼiaan jokisʼin kʼa je chjotale Cristo xi tsakatio nga siglo 1 nga likuini kʼoakisʼin jmeni xi kitsoya. Je pastro Pablo kʼoakitso nga totʼatsʼe chjota jebi nga chʼaosʼin kisikʼaxki̱ jaʼaínle Niná je chjota (Romanos 2:21-24).

8, 9. Jósʼin tsakasenkao Jeobá jngo tichjaa xi tsakʼénele yaole nga tsabexkón jaʼaínle.

⁸ Ñá xi chjotale Cristo maa, bʼenelee yaoná nga ʼyaxkoán je jaʼaínle Jeobá. Tobʼelañá, jngo tichjaa xi Noruega tsʼe xi kʼien xʼinle kʼoa xi jngo mani tiʼndíle xi jao nóle, itso: “Nʼio ñʼai koanna. Ntsjaintsjai tsakʼetsʼoale je Niná, me to xki̱ ora tsakʼetsʼoanile, nga katatsjoána nganʼio kʼoa nga katabasenkaona nga tsín chʼao katasʼe tokoan. Alikui mena nga je Na̱i skoe̱sin Jeobá xi totʼatsʼe nga kui kʼoasʼian xi tsín kixi tíjna. Kʼoa alikui mena nga yándsʼian koasenle je Niná. Je xi koanmena kuinga skoexkoán je jaʼaínle kʼoa nga je tiʼndína ijngokʼa katabeni je pale ya ʼNdenaxó” (Proverbios 27:11).

⁹ Tichja jebi tsakʼénele yaole nga tsabexkón je jaʼaínle Jeobá. Kʼoa jósʼin tsakasenkao Jeobá. Tobʼelañá, kitsjoanganʼiole je ndsʼee xi tjío ya jtín jña fi, kʼoa kui xi tsakasenkao nga tsín nʼio kisikjáojin kʼoa nga kui xi ndatjín kʼoakisʼin. Nga koanni aon nó jngo xi chjotajchínga sʼin tíjna chixankao. Ndʼaibi jekanle nó je tile kʼoa jekisʼenngindá. Je tichjaa itso: “Nʼio tsjoale kjoanda je xʼinna nga kʼoasʼin tsakasenkaona nga kisijchínga je ʼndína”.

10. Jósʼin kʼoasjetsje je jaʼaínle Jeobá.

¹⁰ Je Jeobá ñaki kʼoasjetsje je jaʼaínle kʼianga sikjeson ngatsʼi chjota xi tsín tjíobechjí kʼoa xi bʼasjengi nga je koatexomale (tʼexkiai Ezequiel 38:22, 23).a Xijekoa̱n, je chjota ñaki chjotatsje koa̱n. Kʼoa ngatsʼi xi ya koatio ngʼajmi kao i̱ Sonʼnde jé Jeobá kʼoetsʼoale kʼoa skoe̱xkón jaʼaíntsjele. Je Jeobá tsʼee koa̱nyeje “tʼatsʼe ngatsʼi”, xi tsonile, nga je koatexomale ngatsʼi xi tjío ya ngʼajmi kao i̱ Sonʼnde (1 Corintios 15:28).

“KATJINROA KJOATÉXOMALI”

11, 12. Jméni xi kisʼin je Jeobá kʼianga nó 1876.

¹¹ Kʼianga kjesa fijin Jesús ya ngʼajmi, je chjotale kui kiskonangile kʼiatsa jeme koatexoma je Chjotaxále Niná. Tonga je Jesús kʼoakitsole kʼianga kjesa choa̱lejin nga kui sʼe̱jinle kʼoa nga tosala kui xá katasʼín nga kuitsoyason (tʼexkiai Hechos 1:6-8). Xi ijngosani, kʼoakitsole nga katasíjé nga katafaʼai je Chjotaxále Niná kʼoa nga kuenta katasʼín kʼiani nga koatexoma Chjotaxá jebi. Kʼoa kuinga tosi tonda nijésínilee tsanda ñá ndʼaibi je Jeobá nga katafaʼai Chjotaxá jebi.

¹² Kʼianga nó 1876, je Jeobá tsakasenkao je choʼndale kʼianga koanjinle nga nó 1914 kʼoetsʼiakao nga koatexoma je Jesús. Jósʼin tsakasenkao nga koanjinle. Kʼianga kui nó jebi, je ndsʼee Russell jngo artículo kiski xi i ʼmi: “¿Cuándo terminan los tiempos de los gentiles?”. Yaa kitsoya kʼianga je én xi tongini kinchja̱ je Daniel tʼatsʼe xi “ñato nichxin” tikuini je én xi “nichxinle je chjota xi li judíojin” kitsole Jesús (Daniel 4:16; Lucas 21:24). Artículo jebi kʼoakitso kʼianga nichxin jebi kʼiaa kjoetʼa nga nó 1914.b (Chótsenlai nota.)

13. 1) Jméni xi koan kʼianga nó 1914. 2) Jméni xi bakóná jmeni xi kjima jngo tjíjtsa Sonʼnde saʼnda tjen nó 1914.

¹³ Kʼianga nó 1914, ya Europa jngo kjoajchán kisʼe xi tsangabason jngo tjíjtsa Sonʼnde. Nʼio nkjín chjota xi kjinrá kʼien. Kʼoa nga nó 1918, jngo chʼinndʼai xi toán kisʼe xi ngisa nkjín chjota kisikʼien tikʼoajinni xi kjoajchán kʼienjin. Kʼianga kʼoakoan to jngoní “choa̱” jmeni xi kitsole Jesús (Mateo 24:3-8; Lucas 21:10, 11). Kʼianga kʼoakoan kao kui tsaʼyanile kʼianga kʼia tsakʼétsʼiakao Jesús nga tsakatéxoma ya ngʼajmi nga nó 1914. Kʼianga kui nó jebi “jitjo nga tínjele” (Apocalipsis 6:2). Je Jesús i Sonʼnde tsakʼaonjenngi je Na̱i kao nai xi ndajin. Kʼianga jekʼoakisikao kʼiaa kitjoson én jebi jñani tso: “Ma̱xóni xi tjío sonʼnde kao ya ndáchikon, nga je na̱i jekʼoasʼin jitjojenjinno nga jon. Ali tokʼoakji jti male, nga be nga tochoa nichxin tjínle” (Apocalipsis 12:7-12).

14. 1) Ánni nga tosi tonda nijésíñá nga katafaʼai je Chjotaxále Niná. 2) Jmé xáni xi nʼio machjén nga tosi tonda kʼoasʼiaan.

¹⁴ Je én xi tongini kinokjoa xi faʼaitʼa Apocalipsis 12, sínkjín tokoán anni nga nʼio chʼao koanchonni je Sonʼnde kʼianga jetsakatéxoma je Jesús. Ninga jetíbatéxoma Jesús ya ngʼajmi, je xi tíbatéxoma i̱ Sonʼnde jéní Na̱i. Tonga je Jesús, jeme kjoaʼaxin ngayeje kjoatsʼen xi tjín, kʼoa kʼoasʼin sikinje. Kʼoa ñá tosi tonda si̱jé nga katafaʼai je Chjotaxále Niná. Xi ijngosani, jngo xá tíjnaná xi nʼio machjén nga si̱tjosoán. Jmé xáni. Kuinga kʼoakʼuínlee chjota xi tʼatsʼe Chjotaxále Niná. Kʼianga ʼmiyasoán tíbitjoson je énle Jesús kʼianga i̱ kitso: “Je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá. Kʼia kjoaʼaí xi kjoetʼa” (Mateo 24:14).

“KʼOAKATASʼÍN JOSʼIN NGA MELI” I̱ SONʼNDE

15, 16. Ánni nga tsín tsa tokui xi machjénsíni nga si̱jé nga kʼoakatama josʼin mele Niná i̱ Sonʼnde.

¹⁵ Nichxin kjoan jaon jmi nóján kʼoakjima tsakai josʼin mele Niná i̱ Sonʼnde. Kuinga kʼoakitsosíni je Jeobá nga “nʼio nda” ngayeje (Génesis 1:31). Tonga je Na̱i yátsʼin tsakasénle, kʼoa saʼnda nga kʼia me ngatsʼi je chjota nga tsínkui kʼoasʼín jmeni xi mele je Niná. Ninga kʼoalani kjima, je choʼndale Jeobá tsʼato jin miyón mani ndʼaibi. Kʼoa bení nga tsín tsa tokui xi machjén nga sijé nga kʼoakatama josʼin mele Niná i̱ Sonʼnde. Kuinga bʼénesínile yaole nga kʼoasʼín josʼin mele Niná. Bʼénele yaole nga nda koatio ngixko̱n Niná kʼoa ñaki kao kjoatsjoa bʼéyanajmíle chjota tʼatsʼe Chjotaxále Niná.

¹⁶ Kataʼyala je choa̱le jngo misionera xi jeñokan nóle xi ya África tísíxále Niná xi kʼia nga nó 1948 kisʼenngindá. Tichjaa jebi itso: “Kjitʼaa sijéle je Niná nga je chjota xi ndatjío ni̱ma̱le nga katabe xi tʼatsʼe kʼianga choa̱lesa. Kʼianga ʼya xi fixinyasonle, kʼoaxinle Jeobá nga katatsjoána kjoachjinele nga katakajin ni̱ma̱le chjota jebi jme xi xínyale. Kʼoati sijéle nga katabasenkaoná ngatsʼiaa josʼin si̱kuindaa je chjota xi jetjíokjoé én jebi”. Tichjaa jebi jenʼio nkjín chjota tjíobinyakao nga tjíobe je Jeobá. A ʼyaxkon kʼai ji je ndsʼee xi jetjínle nó xi ñaki kao kjoatsjoa kʼoatjíosʼín josʼin nga mele je Jeobá (tʼexkiai Filipenses 2:17).

17. Jósʼin nikjaʼaitsjain ji tʼatsʼe jme xi sʼin Jeobá nichxin xi nroaján.

¹⁷ Ñá xi choʼndale Niná maa tosi tonda si̱jé nga kʼoakatama josʼin mele Niná i̱ Sonʼnde saʼnda nga sikjeson je xi kontra tjíobatiole. Kʼoa kʼiaa ʼndenaxó koa̱n je Sonʼnde kʼoa jmi miyón chjota kjoaʼáyale. Je Jesús kʼoakitso nga “ngatsʼi xi tjío ya nyʼoákʼen kjuinrʼoéle jta̱le. Kʼoa kuitjoni ngatsʼi” (Juan 5:28, 29). Cha̱niyalai jkui jokji kjoatsjoa sʼe̱ nga jcha ijngokʼá je xíngiaa xi jekʼien. Je “Niná kʼoejon ngayije” ndáxkoaan xi tsʼe xkoaan (Apocalipsis 21:4). Me ngatsʼi je xi kjoaʼáyale nga “chjotatsʼen” ʼmile. Ánni nga kʼoaʼminile. Kuinga tsín tsabe jokjoantjínni xi tʼatsʼe Jeobá kao Jesús. Nʼiojin tsjoa sʼe̱ tokoán nga kʼuínyalee nga kʼoakatasʼín josʼin mele Niná ánni nga koa̱n koatiosíni ngantsjai nichxin (Hechos 24:15; Juan 17:3).

18. Jméni xi nʼio machjénle je chjotasonʼnde.

¹⁸ Jemachrianle kʼianga sitjoson Jeobá nga jan koya én xi fitsʼiani je padrenuestro kʼianga tsjoále jme xi machjénle je chjotasonʼnde. Nga kjoaʼaí Chjotaxále, nga kʼoasjetsje jaʼaínle Niná Chjotaxá jebi kʼoa nga tojngo koa̱nni ngatsʼi xi tjío ngʼajmi kao i̱ Sonʼnde nga kʼoetsʼoale je Jeobá. Je kjoaʼmiya xi ijngo kui jchasaa jmeni xi kitso Jesús jmesani xi koa̱n si̱jé josʼin faʼaitʼa je padrenuestro.