Kʼoénelee yaoná nga kʼoakoa̱nkjoaan jokjoan Cristo

1, 2. Jméni xi mená ngatsʼiaa xi Jeobá tinixálee. Jngola choa̱ tʼejnai.

KʼIANGA mangínkindaa tsojmixi ya jinndi̱tsi̱n, jméni xi kuenta nʼia. Kuijin kuenta nʼia jotjín chjíle. Tonga je xi ngisa nʼio kuenta nʼia kuinga tsa sʼa ndakjoan tsojmixi xi kuindá kʼoa tsa jema chine. ʼYañá kʼianga je tsojmixi xi ñaki nda kuiní xi jekichji.

² Kʼianga ʼyaa xi tʼatsʼe Jeobá kʼoa nga mangínsʼenngindá, kʼoati kui xi mená nga kʼoati koa̱nkjoaan jokjoan je chjotale Cristo xi jetjínle kjoafaʼaitsjen. Kʼoa ali tsakuijin xi tsonile tsa jenʼio tjínná nó. Kuiní xi tsonile nga nda sʼiaan kʼoa nga nʼio miyo katamaná je Jeobá. Je pastro Pablo kʼoakitsole je chjotale Cristo xi ya tsakatio naxinandá Éfeso kʼiatsa jtín sʼin koatio kʼoa tsa tosi tonda skótʼaya xi tʼatsʼe Jesús, kʼoati koa̱nkjoaan jokjoan je Cristo (Efesios 4:13).

3. Jósʼin mangóson je jtín xi tjío ndʼaibi kao je jtín xi kisʼejna ya Éfeso.

³ Kʼianga kiskile Pablo je jtín xi kisʼejna Éfeso, nʼio nkjín chjotale Cristo xi ya tjío xi jetjínle kjoafaʼaitsjen kʼoa xi jenkjín nó nga tjíokotʼaya. Tonga kʼoati tsakatio xi koanchjénsale nga ngisasa simiyo je Niná. Kʼoati ma jtín xi tjío ndʼaibi. Nkjín mani je ndsʼee xi jenkjín nó tjíosíxále je Jeobá. Tonga kʼoati tjío xi kje tsínjinle kjoafaʼaitsjen. Kʼoati ya maxki̱kao je ndsʼee xi jmi mani fisʼenngindá nga xki̱ nó. Ngatsʼi ndsʼee jebi machjénle nga kʼoenele yaole kʼianga kʼoati katamakjoan jokjoan je chjotale Cristo xi jetjínle kjoafaʼaitsjen. Kʼoa ji, a jetjínli kjoafaʼaitsjen jotjínnele koa̱nkjoan je chjotale Cristo (Colosenses 2:6, 7).

JÓSʼIN BAKOÁ TSA JEKʼOAKJOAAN JOKJOAN CHJOTALE CRISTO XI JETJÍNLE KJOAFAʼAITSJEN

4, 5. 1) A mangóson ngatsʼi je chjotale Cristo xi jetjínle kjoafaʼaitsjen. 2) Jméni xi mangóson je chjotale Cristo xi jetjínle kjoafaʼaitsjen. (Chótsenlai sén xi fitsʼiani kjoaʼmiya jebi.)

⁴ Ali tongayejejin tsojmixi nga ngóson kjoan. Tjín xi ʼndí kjoan kʼoa xi yʼai kjoan, tonga tsen makjoan nga jechji. Kʼoakjoánti ma je chjotale Cristo xi jetjínle kjoafaʼaitsjen. Ali tsa tongósonjin ngatsʼi. Tjín xi jejchínga kʼoa tjín xi sʼa choa nóle, kjaʼaí kjaʼaí kostumbre tjínle kʼoa kjaʼaí kjaʼaínile xi matsjoake, tonga bakó nga jngó jngó nga jetjínle kjoafaʼaitsjen. Jósʼin bakó.

⁵ Je chjotale Cristo xi jetjínle kjoafaʼaitsjen ñaki nda fitjenngi je choa̱le Jesús (1 Pedro 2:21). Je Jesús kʼoakitso nga tsjoacha katamaa Jeobá kao ngayeje ni̱ma̱ná, kjoabijnachonná kʼoa kao kjoafaʼaitsjenná. Kʼoati kitso nga tsjoacha katamaa xi ngikʼa josʼin tsjoachaa yaoná (Mateo 22:37-39). Je chjotale Cristo xi jetjínle kjoafaʼaitsjen bʼénele yaole nga sítjoson kjoatéxoma jebi. Josʼin fikao yaole kui ngisa bakó nga miyole Jeobá ma kʼoa nga tsjoake xi ngikʼa.

6, 7. 1) Jmésani xi mangóson jonga sʼín je chjotale Cristo xi jetjínle kjoafaʼaitsjen. 2) Jméni xi chjónangilee yaoná.

⁶ Je chjotale Cristo xi jetjínle kjoafaʼaitsjen bakó je kjoatsjoacha, tonga jmésani xi mangóson jonga sʼín (Gálatas 5:22, 23). Nda chjota, ndʼéní kʼoa tsejtaa. Kʼianga kjoa faʼatojin alikui síchangale yaole, male josʼín kʼoa kale jmeni xi kjimatʼain. Kʼianga kotʼaya Biblia, kui kjoafaʼaitsjen xi koasenkao básjaiya nga skoe̱ jmeni xi ndatjín kʼoa xi chʼaotjín, kʼoa síchjén kjoafaʼaitsjen jebi nga kui xi ndatjín kjoejin. Tjínle kjoanangitokon kʼoa bení nga kui xi ngisa ndatjín nga kjoatéxomale Jeobá mangíntjenngiaa.a (Tʼexkiai nota.) Ñaki kao kjoatsjoa tsoyason kʼoa bʼénele yaole nga tsjoánganʼio nga tsín xkoa̱ya bʼejna je jtín.

⁷ Ninga jenʼio nkjínná nó nga tinixálee je Jeobá, machjénní nga chjónangilee yaoná: “Jñásani sindaya je yaona nga kʼoakoa̱nkjoan jokoankjoan je Jesús”. Janla koya kataʼyaa je xi koasenkaoná nga kʼoakoa̱nkjoaan jokoankjoan je Cristo.

NDA CHÓTʼAYAJIAAN JE BIBLIA

8. Jósʼin ʼyañá nga nda tsabe kʼoa nda koanjinle Jesús je Énle Niná.

⁸ Je Jesucristo nʼio nda tsabe kʼoa nʼio nda koanjinle je Énle Niná. Tobʼelañá, kʼianga sʼa tejao nóle yaa yo̱ngo̱ tíjna nga tjíofákao je chjota xi bakóya kjoatéxoma kʼianga kʼoatítsole jmeni xi tsoya je Énle Niná. Ngatsʼi je xi kinrʼoéle ñaki tokoanxkónle (Lucas 2:46, 47). Kʼoa nga jeki nó nʼio nda koanle kisichjén je Énle Niná kʼoa saʼnda tsín titsabeni jokitso je chjotakontrale (Mateo 22:41-46).

9. 1) Kʼiatsa mená nga sʼe̱ná kjoafaʼaitsjen, jmé programa xi kjuintjenngiaa. 2) Jméni xi sʼiaan kʼianga chotʼayá je Biblia.

⁹ Kʼiatsa mená nga sʼe̱ná kjoafaʼaitsjen, kʼoasʼiaan jokisʼin Jesús. Alikui tokatamajngoni tokoán nga toʼi̱natjín kataʼyaa jmeni xi tso je Biblia. Machjénní nga nʼiosa chótʼayajiaan, nga̱ ʼyañá nga “je tsojmi xi taja, kui xi machjénle je xi jekoanjchá” (Hebreos 5:14). Machjénní nga katasʼená kjoankjíntokon xi ñaki kixi xi faʼaitʼa Biblia (Efesios 4:13). Kʼianga sʼe̱ná kjoankjíntokon jebi jngo programa kʼoéndaa josʼin chótʼayá. Nyaon nyaon kʼoéxkiaa je Biblia, kʼoa nga xki̱ xomana chótʼayá nga toñá kʼoa kao familianá. Kʼianga chotʼayá je Biblia, kui si̱kjaʼaitsjeen jomale Jeobá kʼoa josʼin síkjaʼaitsjen, kʼoa xijekoa̱n kui kjoafaʼaitsjen si̱chjén kʼiatsa jmeni xi mená sʼiaan. Kʼiatsa ñá xi kʼoasʼiaan, nʼio sʼe̱jna kjoamiyo xi tjínná kao Jeobá.

10. Jósʼin bakó je chjotale Cristo xi jetjínle kjoafaʼaitsjen nga tsjoake je kjoatéxomale Niná.

¹⁰ Je chjotale Cristo xi jetjínle kjoafaʼaitsjen ali tsa tokuijin xi machjén nga skoe̱ jotso je Biblia. Tjínnele nga kʼoati tsjoake koa̱n je kjoatéxomale Niná. Jósʼin koakoni. Kuinga kʼoenele yaole nga kui kʼoasʼin jmeni xi mele Niná, kʼoa nga sikʼantjaiya yaole, kjoafaʼaitsjenle kʼoa tsa jñani tsín kʼoatísʼín. Kui choa̱le Jesús fitjenngi kʼoa alikui tikʼoasʼínni josʼín ngasʼa, tosa bakó nga tífitjenngi kjoatéxoma kʼoa kixi kjima (tʼexkiai Efesios 4:22-24). Si̱kjaʼaitsjeen nga kui nganʼiotsjele Niná tsakándiaale chjota xi kiski je Biblia. Kʼianga jngo chjotale Cristo xi Biblia kotʼayajin, kui nganʼiotsjele Niná basenkao nga tsesa kjoankjíntokon sʼele kao kjoatsjoacha kʼoa nga miyole Jeobá mani.

KʼOAINGANʼIOÁ NGA JTÍN KUIYOAA YA JINJTÍN

11. Kʼianga tsakʼejna Jesús i̱ Sonʼnde, jókoankjoan je chjota xi tsabexkon.

¹¹ Kʼianga tsakʼejna Jesús i̱ Sonʼnde, ñaki chjotatsje koan. Tonga je xijchále, je ndsʼe̱ kʼoa kao chjota xi tsabe chjotajée koan. Saʼnda je chjotale sakʼoaa to yaole kini. Tobʼelañá, nitje̱n nga toje si̱kʼien je Jesús tsakjáotiyani ʼyáni xi ngisa ngʼa tíjna (Lucas 22:24). Ninga kʼoalani kisʼin, je Jesús bení nga sʼe̱nile kjoafaʼaitsjen kʼoa nga jtín sʼin koationi ya jinjtín. Nga tikuini nitje̱n, je Jesús kʼoakitsole Jeobá nga katabasenkao je chjotale nga jtín sʼin koatio josʼin tjío je. Kitsole: “Jméni nga tojngo koa̱nsíni joni tsa ñá tojngo manía” (Juan 17:21, 22).

12, 13. 1) Jméni xi mená sʼiaan ngatsʼiaa. 2) Jméni xi kisʼin jngo ndsʼee kʼianga kitsjoanganʼio nga tsín xkoa̱ya kʼoéjna je jtín.

¹² Je chjotale Cristo xi jetjínle kjoafaʼaitsjen bʼénele yaole nga tsjoánganʼio nga tsín xkoa̱ya bʼejna je jtín (tʼexkiai Efesios 4:1-6, 15, 16). Ngatsʼiñá nga kʼoainganʼioá kao ndsʼee nga jtín sʼin kuiyoaa. Kʼianga kʼoasʼin kuiyoaa, machjénní nga nangitokon katamaa. Tobʼelañá, kʼiatsa jngo ndsʼee xi sa̱téngi kʼoa sijtiná, jónʼia. A tsín tinokjoakaoñá. Axo bijnyisjailee nga nyʼán biyoaa kao je ndsʼee. Kʼiatsa jetjínná kjoafaʼaitsjen, kʼoéndajinjián je kjoa xi sʼe̱ ʼndele nga katamatse.

¹³ Si̱kjaʼaitsjenla je choa̱le jngo ndsʼee xi Uwe ʼmi. Ndsʼee jebi nʼio jti male kʼianga jngo ndsʼee saténgi. Tonga chan kisikjaʼaitsjen kʼoa kui kiskotʼayajin xi tʼatsʼe David, kʼoa kui kisichjén je Biblia kao libro Perspicacia. Ánni nga tʼatsʼe David kiskotʼayajinsíni. Kuinga kʼoati kisʼele kjoa kao je chjota xi kʼoati Jeobá tsakʼétsʼoale. Tobʼelañá, je rey Saúl koanmele kisikʼien. Kʼoati ñandia nga je chjota israelita koanmele nga la̱jao̱ sikʼienkaoni je David. Kʼoa ñandiaje̱ nga tsabesin je chjoónle jmeni xi tísʼín David (1 Samuel 19:9-11; 30:1-6; 2 Samuel 6:14-22). Ninga kjoa jaʼatojin, tosi tonda tsjoake koan je Jeobá kʼoa jé kisinʼiotʼa. Kʼoati ndʼé koan kao je chjota. Kʼianga kui kiskotʼaya je Uwe, koanchoyale nga kʼoati tjínnele sʼin jokisʼin je David kʼoa nga tsínkui kuenta sʼin jñani saténgi je ndsʼee. Kʼoati koanchoyale nga tjínnele sichatʼa kʼoa nga tsjoánganʼio nga tsín xkoa̱ya kʼoéjna je jtín. Kʼoati mená nga kui choa̱ kjuintjenngiaa tsanda ñá, tsí jaon.

MIYONÁ KATAMA XI KIXI TJÍOFITʼALE JEOBÁ

14. ʼYá chjotani xi kisimiyo je Jesús.

¹⁴ Je Jesucristo nʼio ndʼé koan kao ngatsʼi je chjota. Tsjoa kisʼele chjota nga ya tsakatiokao, ni yánchjín ni xi xʼin, ni xtiʼndí kʼoa ni chjotajchínga. Ninga kʼoalani, ali tsa toʼya chjota xi kisimiyo. Ñandia kʼianga i̱ kitsole je pastrole: “Jon nío miyona, tsa kʼoasʼin sʼiaon ngayije josʼin bʼeneno” (Juan 15:14). Je chjota xi kisimiyo Jesús tojéní xi kixi kitʼale kʼoa xi tsjoake koan je Jeobá kʼoa je kisixále. Kʼoati nʼio machjén nga toje si̱miyoaa je xi ñaki tsjoake kjoaixi je Jeobá. Ánni.

15. Ánni nga ndatjínsíni nga je xi sʼa xti je katasímiyo je chjotale Cristo xi jetjínle kjoafaʼaitsjen.

¹⁵ Je tsojmixi ngisa nʼio nda chji kʼianga bʼakaole je ndoá. Je kjoatsjoacha xi tjínle je ndsʼee ya jtín kui mangóson joni tsa ndoá. Ánni. Nga̱ kui xi basenkaoná nga kʼoamakjoaan jokoankjoan Cristo. Kʼiatsa sʼa xti, a jeʼyai jmeni xi sʼiain. Kʼiatsa meli nga kui xi ndatjín chjoéjin, je timiyui je ndsʼee xi jenkjín nó tjíosíxále Jeobá kʼoa je xi tsjoánganʼio nga tsín xkoa̱ya kʼoéjna je jtín. Ndsʼee jebi jebe jonikao nga kjoa bitjatojiaan kʼoa koaanle koasenkaoli josʼin nga nda kʼuínkoai yaoli. Kʼiatsa je si̱miyui, koasenkaoli nga kui xi ndatjín chjoéjin kʼoa nga sʼe̱li kjoafaʼaitsjen (tʼexkiai Hebreos 5:14).

16. Je ndsʼee xi jetjínle nó, jósʼin tsakinyakao jngo tichjaa xi sʼa xti.

¹⁶ Jngo tichjaa xi Helga ʼmi kʼoatso nga kʼianga tojeme tífele skuela, ngatsʼi je xtixínkjín kui fáoyani jmeni xi mele kuichotjenngi. Nʼio nkjín xi kʼoakitso nga mele universidad koai kʼoa nga jngo carrera xi nʼio nda skótʼaya. Tonga je Helga jé kisijé kʼale kjoafaʼaitsjen je ndsʼee xi jetjínle kjoafaʼaitsjen ya jinjtín. Kʼoa me ngatsʼi nga ngisa jchínga tikʼoajinni je. Je Helga kʼoatso nga nʼio tsakinyakao kʼoa kʼoakitsole nga tosa to xále Niná katasʼín. Kʼoa nga kitjenngi kjoafaʼaitsjen xi tsakʼaile, aon nó nga precursora sʼin kisixá. Jesáni kjoatse nga kʼoakoan, tonga je Helga nʼio tsjoa kisʼele nga kʼoasʼin Jeobá kisixále nga sʼa xti.

17, 18. Jméni xi sʼiaan kʼiatsa mená nga ndasa katasíchjénná je Jeobá.

¹⁷ Kʼiatsa kjuintjenngiaa choa̱le Jesús, sʼeená kjoafaʼaitsjen. Xi ijngosani, ngisa koa̱nmiyosa je Jeobá kʼoa ngisa koa̱nmesaná nga nʼio si̱xálee. Ngisa sichjénsaná je Jeobá. Je Jesús i kitsole je chjotatjenngile: “Katamaʼisenle lʼíno ngixko̱n chjota, jméni nga skoe̱síni xándano, kʼoa kʼoasjejeyasíni Nʼaino xi tíjna ngʼajmi” (Mateo 5:16).

¹⁸ Tojosʼin tiʼyaa, je chjotale Cristo xi jetjínle kjoafaʼaitsjen koaan nʼio tsjoánganʼio ya jinjtín. Kʼoa ndsʼee jebi kui nʼio ʼyanile josʼin nga nda síchjén kjoafaʼaitsjenle. Jósʼin basenkaoná kjoafaʼaitsjenná nga kui chjoéjiaan xi ndatjín. Jósʼin bakoá nga ʼyaxkoán jotjío kjoafaʼaitsjenle xi ngikʼa. Xi tʼatsʼe jebi yaa chótʼayá kjoaʼmiya xi ijngo.