BIBLIOTECA Watchtower
BIBLIOTECA
Watchtower
énná
a̱
  • a̱
  • e̱
  • i̱
  • o̱
  • ñ
  • ʼ
  • BIBLIA
  • XO̱N XI TJÍO
  • KJOAJTÍN
  • mrt kjoaʼmiya 38
  • Je religión, a koaan kjoa política tsjónjin yaole

Tsín video i̱ página jebi.

Likui nda kjima je video.

  • Je religión, a koaan kjoa política tsjónjin yaole
  • Xi nchja̱sani
  • Subtítulo
  • Xi me tikui tínchja̱ni
  • A kjoa política kitsjonjin yaole Jesús
  • A kjoa política kitsjonjin yaole je chjotale Cristo xi tsakatio ngasʼa
  • Je chjotale Cristo xi tjío ndʼai alikui i̱ tsjonjin yaole xi chon sonʼnde
  • Ánni nga tsín ya tsjonjinsíni yaole testigole Jeobá je kjoa política
    Xi nʼio kjonangi chjota xi tʼatsʼe je testigole Jeobá
  • “Je kjoatéxomana likui tsʼe i̱ sonʼndebi”
    Xo̱n xi Bájinkonná Tʼatsʼe Chjotaxále Jeobá 2018
Xi nchja̱sani
mrt kjoaʼmiya 38
Jngo chjota político kao jngo xi séntítjonle yo̱ngo̱ ya sonxja tjíotsoa xínkjín kʼoa nkjín chjota tjío sítiʼnda.

Je religión, a koaan kjoa política tsjónjin yaole

Jngo tjíjtsa Sonʼnde, nkjín xi chjotale Cristo tsole yaole xi kjoa política tsjoánganʼiole. Tjínkʼa religión xi ya tsjoánganʼiole chjota candidato kao chjota político tojoni nga katabe je chjota josʼin makjainle kʼoa josʼin fikao yaole. Kʼoa je chjota político kʼoasʼin fikao yaole josʼín je religión tojoni nga nkjín chjota religión koaitʼale. Kʼoa tjínkʼa je xi nyatítjonle religión xi candidato ma nga̱ kui xi mele nga xá tjoéle. Kʼoa tjínkʼa naxinandá jñani tojngo religión xi ngisa nʼio ʼyale.

Jósingái ji, a koaan kjoa política tsjónjin yaole xi chjotatjenngile Cristo ma. Kataʼyala jme xi kisʼin je Jesús, i kitso: “Kʼoasʼin kabʼejnachoyano josʼin nga an kasikaono” (Juan 13:15). A kjoa política kitsjonjin yaole Jesús, kataʼyala jme xi kisʼin.

A kjoa política kitsjonjin yaole Jesús

Mai. Je Jesús alikui i̱ kitsjonjin yaole jmeni xi chon i̱ sonʼnde.

Je Jesús alikui xá kiskantʼa. Kʼianga kʼoakitsole je Na̱i nga je tsjoále “ngayije kjoatéxomale sonʼnde”, je Jesús alikui kui kisimekon (Mateo 4:8-10).a Ñandia nga kʼoasʼin kisikjaʼaitsjen je chjota nga nda sitjoson xá je Jesús kʼiatsa je koatexomale kʼoa kui xi koanmele nga kjoa política katatsjonjin yaole. Tonga “tsen koanle Jesús nga mele nga kjoaʼaítsoa, nga chjotatítjonle sʼin. Tikingáni nindo nga toje” (Juan 6:15). Je Jesús alikui kʼoakisʼin josʼin koanmele je chjota, alikui kjoa política kitsjonjin yaole.

Je Jesús alikui kjoa política kitsjonjin yaole. Tobʼelañá, je chjota judío xi kʼia tsakatio, alikui kisasenle nga tao̱nbasen tsakʼéchjíle je chjotaxá xi Roma tsʼe kʼoa kʼoasʼin kisikjaʼaitsjen nga tsín ndatjín nga tao̱nbasen kinikʼéchjí. Kʼianga kui kichjonangile Jesús josʼin síkjaʼaitsjen xi tʼatsʼe kjoa jebi alikui ya kitsjonjin yaole. I kitsole je chjota: “Tʼailao César je xi tsʼe César, kʼoa tʼailao Niná je xi tsʼe Niná” (Marcos 12:13-17). Ningalani tsín kjoa política kitsjonjin yaole tonga kʼoakitso nga tjínnele katabʼéchjí chjota je tao̱nbasen xi kisijé je chjotaxá xi Roma tsʼe. Ninga kʼoalani, to choa̱ tjínle jokji tjínnele kisitjosonle je chjotaxá. Alikui koan nga ñaki toje chjotaxá kitʼale kʼoa tsa toje ngisa tsabexkón tikʼoajinni je Niná (Mateo 4:10; 22:37, 38).

Je Jesús kui ngisa kinchjani xi tʼatsʼe Chjotaxále Niná (Lucas 4:43). Je Jesús alikui kjoa política kitsjonjin yaole nga̱ koanjinle nga nijngojin chjotaxá xi koa̱nle nda sikatíoná, tojé Chjotaxále xi koa̱nle kʼoasʼin (Mateo 6:10). Kʼoati koanjinle nga tsín tsa chjota sichjén je Niná nga koatexoma nga̱ je Chjotaxále sichjén (Daniel 2:44).

A kjoa política kitsjonjin yaole je chjotale Cristo xi tsakatio ngasʼa

Mai. Je chjotatjenngile Jesús kisitjoson nga kʼoakitsole nga tsin koa̱n i̱ tsjónjin yaole jmeni xi chon sonʼnde (Juan 15:19). Kui choa̱le Jesús kitjenngi kʼoa tsín kjoa política kitsjonjin yaole (Juan 17:16; 18:36). ʼNdele nga kui kjoa tsjónjin yaole tosaa kui kʼoakisʼin je xá xi tsakánele, jolani nga koakoyason kʼoa nga kuitsoyale chjota je énnda xi tʼatsʼe Chjotaxále Niná (Mateo 28:18-20; Hechos 10:42).

Je chjotale Cristo xi títjon tsakatio koanjinle nga kui xi ngisa chjíle nga je Niná sitjosonle. Tonga kʼoati koanjinle nga kʼoati tjínnele sitjosonle je chjotaxá (Hechos 5:29; 1 Pedro 2:13, 17). Kuinga kisitjosonni kjoatéxoma kʼoa kuinga tsakʼéchjíni tao̱nbasen (Romanos 13:1, 7). Ningalani tsín kjoa política kitsjonjin yaole tonga kisichjén kjoatéxoma nga kisitoánntjai yaole kʼoa kʼoati kisichjén je nganʼio xi kitsjoa je chjotaxá (Hechos 25:10, 11; Filipenses 1:7).

Je chjotale Cristo kao kjoa política: xi tso je chjota xi kui kotʼayason jme xi koan ngasʼa

  • “Je xi chjotale Cristo koan alikui kʼoati kisʼin jokisʼin je chjota naxinandá xi Roma tsʼe [...]. Alikui xá kiskantʼa”. On the Road to Civilization—A World History (Camino a la civilización. Historia mundial), jé kiski Albert K. Heckel kao James G. Sigman, página 238.

  • “Nijñajinla kʼoatso tsa kui xi koanmele je Jesús nga sondado koan kʼoa tsa kjoa política kisimekon, kʼoa [...] nijejinla xi chjotatjenngile koan”. Jesus and Judaism (Jesús y el judaísmo), jé kiski E. P. Sanders, página 231.

  • “Xi chjotale Cristo koan, ngisaa chjí tsabe religiónle kʼoa alikui ya kisikʼójin kjoa política; ngisa kixi kitʼale Cristo tikʼoajinni César (César y Cristo, jé kiski Will Durant, jé kisikʼatoya Luis Tobío, página 404).

  • “[Je pastro] Pablo chjota romano koan kʼoa kui kisichjén je kjoatéxoma xi ya tjín nga kisitoánntjai yaole, tonga alikui kjoa política kitsjonjin yaole [...]. Ningalani koanjinle nga tjínnele skoe̱xkón je chjotaxá, je chjotale Cristo xi tsakatio nichxin kjoatse koanjinle nga tsín kjoa política tsjónjin yaole”. Beyond Good Intentions—A Biblical View of Politics (Más que buenas intenciones. La visión bíblica de la política), jé kiski Doug Bandow, página 122 kao 123.

  • “Je xi chjotale Cristo koan kʼoakitso nga tsín koa̱n xá xi̱nyá nga je koatexomale naxinandá [...]. Kʼianga tífitsʼia siglo 3, je xi Hipólito tsakʼin kʼoakitso nga kui costumbre kisʼele je chjotale Cristo nga tjínnele kisikatío je xá xi kisʼele ngixko̱n chjotaxá kʼia tsa mele nga yo̱ngo̱ sisin” (Historia del cristianismo, tomo 1, jé kiski Kenneth Scott Latourette, jé kisikʼatoya Jaime kao Lemuel Quarles, página 309).

Je chjotale Cristo xi tjío ndʼai alikui i̱ tsjonjin yaole xi chon sonʼnde

Ya Biblia kʼoatso nga tsín kjoa política kitsjonjin yaole je Jesús kʼoa kao chjotatjenngile xi tsakatio nichxin kjoatse. Kuinga kʼoati tsín i̱ tsjonjinni yaole jmeni xi chon sonʼnde je testigole Jeobá. Tojo kisʼin je chjotatjenngile Cristo xi tsakatio nichxin kjoatse, kui ngisa tsjoále kjoandosin nga tsoyale chjota “je énnda xi tʼatsʼe je kjoatéxomale ngʼajmi” (Mateo 24:14).

a Je Jesús alikui kiskoé jme xi kitsjoatʼale je Na̱i nga̱ be nga je Na̱i kjinentsja je chjotaxá sonʼnde. Nga jekoanskanni je Jesús kʼoakitso nga “je na̱i xi batéxoma sonʼndebi” (Juan 14:30).

    Xo̱n xi énná faʼaitʼa (2002-2025)
    Tʼechjoalai cuentali
    Titjásʼain cuentali
    • énná
    • Tikasénlai tsa ʼyani
    • Josʼin meli nga katamatsen
    • Copyright © 2025 Watch Tower Bible and Tract Society of Pennsylvania
    • Josʼin koa̱n koa̱nchjén
    • Josʼin sʼejnatjao én xi faʼainajin
    • Josʼin machjén jme xi betʼai
    • JW.ORG
    • Titjásʼain cuentali
    Tikasénlai tsa ʼyani