Je chjota político kʼoatso jokji xkón tíjna je xi Armagedón ʼmi | Jótso je Biblia

Nga tanjio nga 10 sá octubre nó 2022, nkjín bomba kisikʼatsao ya naxinandá Ucrania je sondado xi ya Rusia tsʼe. Kui kʼoakisʼinni nga jao nichxin nga tongini je puente xi fichó Crimea saʼnda Rusia, tjín xi kicho síxkoa̱. Nga tongini, nkjín koanni je chjota político xi kʼoakitso nga jetíjnachrian Armagedón.

• “Saʼnda nga tsakatéxoma je Kennedy [xi presidente koan ya Estados Unidos] kʼoa nga kisʼe kjoajchán ya Cuba, kʼoasʼin tíʼyanile nga jechrian tiyolee Armagedón. Tsa jngo naxinandá xi bomba nuclear sichjén nga kʼoetsʼiakao kjoajchán, alikuijin ʼya xi tikoa̱n kʼoechjoanile, kʼoa tojejin koaitsʼia Armagedón” (Joe Biden, presidente xi tsʼe Estados Unidos, 6 sá octubre nó 2022).

• “Jejin kui Armagedón xi jekisʼetsʼiakao, jexkón tjío ngatsʼi chjota” (kui jebi xi kitso Volodímir Zelenski xi presidente sʼin tíjna ya Ucrania, kʼianga kui kichjonangile jósʼin kuichomani kʼiatsa bomba nuclear sichjén je chjota; BBC News, 8 sá octubre nó 2022).

Tsa bomba nuclear sichjén je chjota, a jekui xi Armagedón ʼmi koaitsʼia. Jótso je Biblia.

A kui xi tsonile nga jekoaitsʼia je Armagedón kʼiatsa bomba nuclear sichjén je chjota.

Mai. Je én xi Armagedón tso, tojngokʼa faʼaitʼa ya Biblia, yaa faʼaitʼa ya Apocalipsis 16:16. Kʼoa alikui kui xotsole je kjoajchán xi batío je chjota, nga tije kjánni. Je xi Armagedón tsole kui je kjoajchán xi kjoaʼaíkao Niná nga skan kao “chjotatítjon xi tsʼe ngakijnda sonʼnde” (Apocalipsis 16:14). Je Niná kui kjoajchán xi Armagedón ʼmi sichjén nga sikjeson ngatsʼi je chjotaxá sonʼnde (Daniel 2:44).

Tsa mesali jchai jméni xi koa̱nle sonʼnde kʼianga jekjoaʼaí je kjoajchán xi Armagedón ʼmi, tʼexkiai jñani tso Jméni xi Armagedón ʼmi.

A kjoe sonʼnde kao ngatsʼi je chjota kʼiatsa bomba nuclear sikʼatsao chjota.

Mai. Tsakui nichxin kui sichjén je chjotaxá nichxin xi sʼa nroa, tonga je Niná alikui tsjoáʼnde nga tjín xi koa̱nle sonʼnde. Je Biblia itso:

• “Je sonʼnde tíjna ngantsjai nichxin” (Eclesiastés 1:4).

• “Je xi kixi tsʼee koa̱n sonʼnde kʼoa i koatio ngantsjai nichxin” (Salmo 37:29).

Jmeni xi tso je én xi tongini kinokjoa xi faʼaitʼa ya Biblia kʼoa jmeni xi kjima nichxin xi tiyoaa ndʼaibi kui bakó nga jeme kjoetʼa jmeni xi chon sonʼnde (Mateo 24:3-7; 2 Timoteo 3:1-5). Kataʼyai jmeni xi tso Biblia tʼatsʼe nichxin xi sʼa nroa, chótʼayai Biblia.