ʼYáni xi koasenkao je xi toxkia chjota nga kjoajchán tjín | Jótso je Biblia

Jmeni xi tso je Naciones Unidas:

• Nga 7 saʼnda 23 sá octubre nó 2023, jetsʼato 6,400 chjota xi kʼien kʼoa tsʼato 15,200 chjota xi tjíomiʼaon xi tʼatsʼe kjoajchán xi tísʼe ya naxinandá Gaza kao naxinandá Israel, kʼoa jme ngatsʼi chjota jebi nga toxkia chjota. Xi ijngosani siento jmi chjota xi xin naxinandá kikatio.

• Nga 24 sá septiembre nó 2023, je kjoajchán xi tísʼejna ya Rusia kao Ucrania 9,701 chjota kʼien kʼoa 17,748 chjota xi kitsiʼaon ya naxinandá Ucrania.

Jmé kjoachoya xi tsjoále Biblia je xi kjoañʼai tjíojin xi totʼatsʼe kjoajchán.

Kjoachoya xi tsjoá Biblia

Je Biblia kʼoatso nga Niná “kjoaʼaxin kjoajchán ngakjijnda sonʼnde” (Salmo 46:9). Jé Chjotaxále Niná kʼoéjnangajaole chjotaxá xi tjío ndʼai (Daniel 2:44). Je Chjotaxále Niná kjoanyʼán kjoaʼaíkao i̱ Sonʼnde.

Kataʼyai jmeni xi sʼin Jesucristo nga koatexoma:

• “Kʼoasjentjainí je xi ma̱ tísíjchá yaole xi sijéle nganʼio kʼoa kao xi nangitokon ma kʼoa toʼyani xi tsínle xi basenkao. Skoe̱maa je xi nangitokon ma kao xi ma̱ tísíjchá yaole k’oa k’oasjentjai je xi ma̱ tjío. Kʼoasjentjai xi tʼatsʼe kjoatsʼen kʼoa nga taon ʼya” (Salmos 72:12-14).

Je Chjotaxále Niná kjoaʼaxin je kjoañʼai xi tjín xi totʼatsʼe kjoajchán kao kjoatsʼen.

• “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato” (Apocalipsis 21:4).

Jeme bichó nichxin nga je Chjotaxále Niná kjoaʼaxin je kjoa xi tjín i̱ sonʼnde. Je Biblia itso: “Kuinóʼyalao tʼatsʼe kjoajchán, kʼoa én xi kʼoámje tʼatsʼe kjoajchán” (Mateo 24:6). Kʼoa kʼoakjima nichxin xi tiyoaa ndʼaibi. Jmeni xi kjima kui bakó nga nichxin fetʼa tiyoaa kʼoa nga jeme tjóxin chjotaxá sonʼnde (2 Timoteo 3:1).