A kjoajchántse koaitsʼia | Jótso je Biblia

Nichxin kjoan 30 nóján nkjín chjota xi kʼoasʼin kisikjaʼaitsjen nga nda kuiyoaa. Tonga ndʼai alikui tikʼoasʼin síkjaʼaitsjenni xi totʼatsʼe kjoa xi tísʼe. Itso kʼa noticia xi tjín:

• “Nkjín chjota xi tjíosíkjáojin nga kjoajchán kjima ya Gaza, nga tjíokján naxinandá Israel kao Hezbolá ya Líbano nga̱ kʼoasʼin síkjaʼaitsjen nga kʼoati kjoajchán koaitsʼia jña xin naxinandá” (Reuters, 6 sá enero nó 2024).

• “Je naxinandá Irán nkjín naxinandá jñani kjoajchán tíbʼéjna kʼoa je xi tjíobinyakao je naxinandá Rusia kao China. Je naxinandá Irán ijngokʼa tjíosínda je ki̱cha̱ xi machjénle nga kjoajchán fijin” (The New York Times, 7 sá enero nó 2024).

• “Je naxinandá Rusia tosi tonda tísíkjeson naxinandá Ucrania” (UN News, 11 sá enero nó 2024)

• “Je naxinandá China tse tao̱n tjínle kʼoa nkjín mani sondadole, kʼoa naxinandá Taiwán nʼio tíʼyale, kʼoa naxinandá Pekín kjoa tjínle kao Washington. Nga kʼoakjima toxijñajin koaitsʼia kjoajchán” (The Japan Times, 9 sá enero nó 2024).

A tsoya Biblia tʼatsʼe kjoa xi tísʼe. A kuicho nichxin nga koaitsʼia kjoajchántse.

Ya Biblia kʼoatso nga toxá tse kjoa sʼe̱ni nichxin xi tiyoaa ndʼai

Je Biblia alikui kʼoatsokixi jñá naxinandáni nga kjoajchán sʼe̱. Tonga ñaki kʼoasʼin tíbitjoson jotso xi tʼatsʼe kjoajchán. Ya Biblia kʼoatso nga je kjoajchán “kjoaʼaxin xi nyʼán chon xi tsʼe sonʼnde” (Apocalipsis 6:4).

Je libro xi tsʼe Daniel kʼoatso nga “kuichokjetʼa nichxin” je naxinandá xi tse nganʼio tjínle kjoajchán koatio nga mele je koatexoma. Je xi kjoajchán bʼétsʼiakao bakó nga nʼio nkjín sondado tjínle kao ki̱cha̱ kjoajchán kʼoa kʼoati tse tao̱n síkjeya (Daniel 11:40, 42, 43).

Jngo kjoajchán xi jeme koaitsʼia

Je Biblia kʼoatso nga tsa chʼao sa chʼao koa̱nchon. Je Jesús kʼoakitso nga “sʼe̱ kjoañʼai xi tsín tsa kʼoakoan saʼnda nga totsʼinle kjoa, saʼnda ndʼai” (Mateo 24:21). Nga jekjoetʼa kjoañʼai xi nʼio tse kʼiaa kjoaʼaí Armagedón, je kjoajchán “xi tsʼe Niná xi batéxoma ngayije” (Apocalipsis 16: 14, 16).

Je kjoajchán xi Armagedón ʼmi alikui sikjeson ngatsʼi chjota tosaa kʼoasjentjai. Jmeni xi kjoaʼaxin kjoajchánle Niná je chjotaxá xi tjío ndʼai, xi nʼio tse kjoa tjíobajngi nga kjoajchán batío. Tsa meli jchai tʼatsʼe jósʼin koasenkaoná nga nda kuiyoaa je Armagedón, tʼexkiai jñani tso:

• “¿Qué es el Armagedón?”

• “Tsjoa sʼe̱ tokoán nga kjoaʼaí Armagedón”