A kontra tjíole je testigole Jeobá je vacuna
Mai. Je testigole Jeobá likui kontra tjíole je vacuna. Kʼoasʼin majinle nga jngó jngó xi kuixónñá tsa vacuna xinyáná kʼoa tsa mai. Nkjín mani testigole Jeobá xi binyá vacuna.
Kui xi menajin nga nda katamaxkinajin kʼoa nʼio chjí ʼyatokuinjin jmeni xi tjíosʼín je chjinexki nga nkjínsa vacuna tjíobitjo ánni nga choa chʼin katasʼeni. Kʼoati nʼio chjí ʼyatokuinjin nga binyakao je chjota, ngisaa kʼianga chʼin sʼe.
Je testigole Jeobá sítjoson jmeni xi tso je chjotaxá nga kʼoasʼin chʼin ma. Tobʼelañá, saʼnda nga kitsʼia nga koan je chʼin COVID-19 je testigole Jeobá ya página xi tíjnale ya Internet nkjín koya jmeni xi tjíobʼasje nga kʼoatjíotsole je chjota nga katasítjoson jmeni xi tso je chjotaxá ya ʼndele. Tobʼelañá, nga si̱tjosoán jmeni xi ʼminá tʼatsʼe nga biyojtían, nga tsín nanda jña kuitjoaa, nga kjin kuinyalee xíngiaa, nga kjitʼa koanejoaan je ndsaa kʼoa nga si̱chjén cubreboca kʼoa jmesani xi kjaʼaí xi tso je chjotaxá (Romanos 13:1, 2).
Jekjoatse nga je xo̱n xi bʼasje je testigole Jeobá kui nʼio nchja̱ni xi tʼatsʼe jebi:
Nga jngó jngó xi kuixónñá josʼin nga si̱xkiaa (Gálatas 6:5).
“[Revista jebi] ali kʼoajin tso tsa ngisa nda jngo xki kʼoa nikuijinla kʼoatso josʼin tjínnele si̱xkiaa. Tosa kui tsoya jmeni xi ma kʼoa nga jngó jngó xi kuixónñá josʼin nga tjínnele si̱xkiaa” (¡Despertad!, 8 de febrero de 1987).
“Jon xi kuixonño tsa meno nga vacuna xinyáno, jon kao xtino”. (¡Despertad!, 8 de diciembre de 1965).
Nʼio chjí ʼyatokuinjin je kjoabijnachon, kuinga kui fasjainijin nga nda katamaxkinajin (Hechos 17:28).
“Je testigole Jeobá nkjín koya josʼin síxki kʼoa fitjenngi je kjoafaʼaitsjen xi tsjoále je chjinexki. Chjí be kjoabijnachon kʼoa kʼoasʼín jotsole je chjinexki kʼoa fitjenngi kjoafaʼaitsjen xi tsjoá Biblia ánni nga nda koationi” (La Atalaya, 1 de mayo de 1976).
“Alikui chʼaotjín nga chjinexki mangínchonlee nga̱ kui xi mená nga nda kuiyoaa kʼoa nga tsesa kuiyoaa. Je testigole Jeobá alikui chʼaosʼin bekon nga síxkile yaole. Joni tsa Lucas (jngo chjinexki xi tsakʼejna nga siglo primero) tjínkʼa testigole Jeobá xi chjinexki ma [...]. Je testigole Jeobá nʼio chjí be josʼin nga maxkile kʼoa kʼoati chjí bekon je xá xi sʼín je chjinexki” (La Atalaya, 1 de febrero de 2011).