A tsín tifákaoni je testigole Jeobá xi tsín tiya tjíojinni religiónle

Jin xi testigole Jeobá maijin to ngóson nikoaijin toʼyani, bakolaijin nga tsjoachaijin, nda nikoaijin kʼoa ʼyaxkónníjin. Tsa jngo testigole Jeobá xi tsínti nanda tsoyasonni kʼoa xi tsín tifini je kjoajtín xi satíonajin,a chjakaonajmíníjin kʼoa kʼoaʼmilaijin nga tsjoachaijin kʼoa binyakaoníjin nga nda katasíxá ijngokʼanile je Niná (Lucas 15:4-7).

Sakʼoa machjén nga chʼasjejin jinjtín je xi kui kʼoasʼín xi jée tjenkao (1 Corintios 5:13). Tonga nga kjesa chʼasjejin jinjtín, títjonkjoanla binyakoaijin nga tsín kʼoakatama. Kʼoa ninga chʼa̱sjejinlani jinjtín tojo bakolaijin nga tsjoachaijin kʼoa ʼyaxkónníjin tojo tso ya Biblia (Marcos 12:31; 1 Pedro 2:17).

Ánni nga sakʼoa chʼasjejinni jinjtín

Ya Biblia kʼoatso kʼiatsa jngo chjotale Cristo xi tse jée koa̱njngí kʼoa tsa tsín sindaya yaole tjínnele nga chʼa̱sjejin jinjtínb (1 Corintios 5:11-13). Jmé jéeni xi bajngi sakʼoa je xi chʼasjejin jinjtín. Ya Biblia nkjín koya jée síkʼaxki̱, jolani xi síchajngitʼale chjoónle axo xʼinle, chjotachʼi̱, xi chjota síkʼien, xi taon be familiale kʼoa xi síché (1 Corintios 6:9, 10; Gálatas 5:19-21; 1 Timoteo 1:9, 10).

Alikui to kjitʼanangi chʼasjejin jinjtín je xi tse jée bajngi. Títjonkjoanla binyakao je xi chjotajchínga sʼin tjío ya jinjtínc ánni nga sindayani yaole. (Romanos 2:4). Ngasin nganda fákao ánni nga kuichokajinni ni̱ma̱le jmeni xi tsole (Gálatas 6:1). Nga kʼoasʼin chjakaonajmí kui xi basenkao nga katamajinle nga tsín nda kisʼin kʼoa nga kʼoakatamanile jmeni xi kisʼin (2 Timoteo 2:24-26). Tonga tsa tsín síndaya yaole ninga jenkjín kʼa kachjakaonajmí kʼoa tsa tojo tífaʼatone je kjoatéxoma xi faʼaitʼa ya Biblia kʼoa tsa tsín kʼoamanile je jée xi tíbajngi, tjínnele nga chʼasjejin ya jinjtín. Xijema, je xi chjotajchínga sʼin tjío bájinkon je jtín kʼoa kʼoatsole nga tsínti testigole Jeobá mani je chjota xi jée tíbajngi.

Jósʼin bichómani nga chʼasjejin jinjtín je chjota xi tosi tonda jée bajngi. Xi títjon, basenkao je jtín nga tsje sʼin bʼejna kʼoa kʼoati basenkao nga tsín kʼoati sʼín xi ngikʼa (1 Corintios 5:6; 15:33; 1 Pedro 1:16). Xi ijngosani, kʼoati basenkao je chjota xi chʼasjejin jinjtín nga síkʼéjna jmeni xi chʼaotjín tísʼín kʼoa nga síkʼantjaiya yaole (Hebreos 12:11).

Jósíkao je testigole Jeobá je xi chʼasjejin ya jinjtín

Ya Biblia kʼoatso nga je chjotale Cristo tsín koa̱n je simiyo je xi kichʼasjejin ya jinjtín kʼoa nikoa̱njinla nga ya koakjenkao (1 Corintios 5:11). Kuinga tsín je nimiyonijin. Tonga ali tsa kuijin xi tsonile nga tsínti kuenta nʼianijin, tosi tonda ʼyaxkuínjin. Nda chjoeyaijin kʼianga bichó kjoajtín xi satíonajin kʼoa ma sítiʼnda je xi kʼoati ya bichó.d Kʼoati ma síjéle kjoafaʼaitsjen je xi chjotajchínga sʼin tjío nga katabasenkao nga nda kʼoéjna ijngokʼa ngixko̱n Niná.

Kʼoa jméni xi ma kʼiatsa jngo xi xʼin chʼasjejin jinjtín tonga tsa tojo testigole Jeobá ma je chjoónle kʼoa tsa je xtile. Ningalani likui tiñatjen skoe̱xkónni Niná, je chjoónle kao xtile tojo tsjoake koa̱n nga̱ tojo xínkjín mani.

Je xi chʼasjejin jinjtín ma kʼoatsole je xi chjotajchínga sʼin tjío nga katafisíxatʼa ya ndʼiale. Je xi chjotajchínga sʼin tjío kui Biblia síchjén nga fákaonajmí kʼoa ngasin nganda kʼoatsole nga kʼoakatamanile je jéele kʼoa nga nda katabʼejna ijngokʼa ngixko̱n Niná (Zacarías 1:3). Kʼiatsa tsín tikui kʼoasʼinni xi chʼaotjín kʼoa tsa kʼoasʼin koaikao ijngokʼa yaole jotso je kjoatéxomale Niná koaan testigole Jeobá koa̱n ijngokʼa. Je ndsʼee xi tjío ya jinjtín, sichatʼale kʼoa sinʼio kon tojo kisʼin je chjotale Cristo xi Corinto tsakatio kʼianga kʼoakoannile je jéele jngo chjota xi tsakajngijée (2 Corintios 2:6-8).

Jótjío kon ndʼaibi je testigole Jeobá xi kichʼasjejin jinjtín tsakai

Kataʼyai jotso kʼa je testigole Jeobá xi kichʼasjejin jinjtín xi kisichriantʼa ijngokʼale Niná nga koanskanni.

“Kʼianga koanmena kisichriantʼa ijngokʼale je Niná, kʼoasʼin kisikjaʼaitsjen nga tjínnele kʼoeyanajmíle je xi chjotajchínga sʼin tjío ngayeje jmeni xi kisʼian jokjitse nga tsín tiya tsakatejnajinña jinjtín. Tonga alikui kʼoakisʼin, tosaa i kitsona: Kui xi menajin nga tosa kui kuenta tʼiain josʼin si̱xálai Niná. Nga jekʼoakitsona, ñaki nda kisʼe tokoan...” (María, Estados Unidos).

“Je ndsʼee xi tjío ya jinjtín kui xi koanmele nga testigole Jeobá koa̱n ijngokʼa. Tsakinyakaona nga koanjinna nga jekisichatʼana Jeobá kʼoa kao je ndsʼee kʼoa nga je Jeobá sixá ijngokʼanile. Je xi chjotajchínga sʼin tjío kjitʼa kitsjoanganʼiona. Tsakinyakaona nga nda tsakatejna ijngokʼa ngixko̱n Jeobá kʼoa nga koanjinna nga tojo chjí bekonna je Jeobá” (Malcom, Sierra Leona).

“Nga ʼbe nga tsjoake Jeobá je naxinandále kui xi tsjoa bʼé tokoan kʼoa kui xi mele nga tsje katabʼejna je naxinandále. Ninga tjínkʼa je chjota xi kʼoasʼín síkjaʼaitsjen nga nʼio ñʼai tjínle nga kʼoanikao je xi jée bajngi tonga ʼbeña nga kʼoasʼin sakónile kjoatsjoacha je xi bajngijée. Tsjoale kjoanda je Jeobá nga bakó nga tsjoakená kʼoa nga síchatʼaná” (Sandi, Estados Unidos).