Jméni xi Cuerpo Gobernante tsole je testigole Jeobá

Je xi Cuerpo Gobernante ʼmi jéní xi bándiaale jngo tjíjtsa Sonʼnde je testigole Jeobá. Tojngo jao mani je xi ya tjíojin kʼoa nʼio tjínle kjoafaʼaitsjen. Jao koya tjínni je xá xi sʼín:

• Jé kʼoatso jmeni xi faʼaitʼa je xo̱n xi Biblia yʼangini, jé kʼoatso jme xi faʼa nga satío kjoajtín kʼoa kao xi chotʼaya ya skuela xi satíole je testigole Jeobá (Lucas 12:42).

• Jé bándiaale je xá xi sʼín je testigole Jeobá jngo tjíjtsa Sonʼnde. Bándiaa josʼin ʼmiyason kʼoa josʼin machjén je tao̱n xi maxkó.

Je Cuerpo Gobernante kui fitjenngi je choa̱le “pastro kao chjotajchínga” xi tsakatio ya Jerusalén kʼianga siglo 1. Jé cuerpo gobernante tsakʼéndajin jmeni xi kisʼin je jtín (Hechos 15:2). Je xi ya tjíojin Cuerpo Gobernante ali jejin ngʼajko̱ tjíole naxinandále Niná, tojo koan nichxin kjoatse nga tsín je ngʼajko̱ tsakatio je xi ya tsakatiojin cuerpo gobernante xi kisʼe nga kʼia. Je Cuerpo Gobernante yaa Biblia básjaijin jmeni xi sʼín kʼoa bení nga je Jesucristo xi ngʼajko̱ tíjnale je jtín (1 Corintios 11:3; Efesios 5:23).

ʼYáni xi ya tjíojin Cuerpo Gobernante

Je xi ya tjíojin Cuerpo Gobernante jéní Kenneth Cook, hijo, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane kʼoa kao Jeffrey Winder. Ngatsʼi yaa síxá ya Warwick, Nueva York, jña tjen tísʼendiaanile xále Niná jngo tjíjtsa Sonʼnde.

Jósʼin síxá je Cuerpo Gobernante

Je Cuerpo Gobernante jaon comité tjíole kʼoa kjaʼaí kjaʼaí xá kjinele nga jngó jngó comité. Sakʼoa jngo kʼoa tsa jao comité kjinentsja nga jngó jngó xi ya tjíojin Cuerpo Gobernante.

• Comité de Coordinadores. Jé bʼakaole jme xi sʼendajin ngixko̱n chjotaxá. Kʼoa jé bʼéndajin josʼin bʼainganʼiole je ndsʼee jñani kjoaxkón sʼe, tsa jme xi kamale je testigole Jeobá kʼoa tsa jñani jotjíonikao xi totʼatsʼe religiónle.

• Comité de Personal. Jé kjinele ngayeje jme xá xi sʼín xi ya tjíosíxá ya Betel xi tjío ngakjijnda.

• Comité de Publicación. Jé kjinele tʼatsʼe xo̱n xi tíbitjo kʼoa xi nikasénle je jtín. Kʼoati je kjinele tʼatsʼe nga sʼenda Ndʼia jña kotʼaya je testigole Jeobá, ndʼia jña faʼatoya xo̱n xi Énle Niná nroatʼa kʼoa kao sucursal.

• Comité de Servicio. Jé bʼéndajin josʼin ʼmiyason “je énnda xi tʼatsʼe je kjoatéxomale ngʼajmi” (Mateo 24:14).

• Comité de Enseñanza. Jé bʼéndajin jmeni xi sakóya ya kjoajtín xi satíole testigole Jeobá kao skuela xi satíole kao jmeni xi ma grabar kʼoa kao video.

• Comité de Redacción. Jé batíonda jme xi faʼaitʼa je xo̱n xi Énle Niná nroatʼa kʼoa kao je xi faʼaitʼa ya Internet. Kʼoati je kjinele nga tífaʼatoya xi kjaʼaí én je xo̱n xi Énle Niná nroatʼa.

Ali tsa tokuijin xá jebi xi sʼín je Cuerpo Gobernante. Kʼoati xki̱ xomana batiojtín kʼianga bʼéndajin jmeni xi machjénle je naxinandále Niná. Kʼianga satíole kjoajtín jebi kui kotʼayajin jotso Biblia kʼoa jé nganʼiotsjele Niná bándiaale. Tojngo sʼín kjoafaʼaitsjenle ngatsʼi kʼianga jme xi bʼéndajin (Hechos 15:25).

ʼYáni xi binyakao je Cuerpo Gobernante

Nga jngó jngó comité tjínle je xi binyakao. Je xi binyakao tjínle kjoafaʼaitsjen kʼoa jebe josʼin maxá ya jñani bʼakaole je comité xi binyakao (1 Corintios 4:2). Kʼoati fi kjoajtín xi satíole Cuerpo Gobernante nga xki̱ xomana. Ninga tsín je kʼoatso jmeni xi sʼendajin, tsjoá kjoafaʼaitsjen tʼatsʼe jme xi tíchobayani. Kʼoasʼín jmeni xi kabʼéndajin je comité kʼoa kjitʼaa kotsenle tsa nda tíbichótsjoá jme xi kasʼendajin. Kʼoati sakʼoa kʼoaʼmile nga katafisíxatʼa je testigole Jeobá xi tjío jña xin naxinandá kʼoa kʼoati fi kjoajtín xi satío jolani je kjoajtín xi xki̱ nó satío kʼoa tsa kʼiaje̱ nga fetʼale skuela je xi fi Skuela xi tsʼe Galaad.