JE XI KJONANGI XTI
Jósʼin koasenkaona je Biblia. Xi majaoni: Tsjoacha katamai nga kʼoéxkiai je Biblia
Jngo ti xi Will ʼmi itso: “Tsa tsín ʼyaa josʼin kʼoéxkiaa je Biblia tsakui nichxin tokoa̱ntsʼelee”.
A meli jchai jmé xi koasenkaoli nga tsjoa sʼe̱ tokuin nga kʼoéxkiai je Biblia. Jmeni xi tso artículo jebi nʼio koasenkaoli.
Tjasjailai jotʼiain ánni nga ngisa nda koa̱njinnili
Nga ngisa nda koa̱njinli jme xi kʼoéxkiai, kʼoatʼiain jebi:
Chjoéjin jñanile xi meli chótʼayai. Koaan kui chótʼayai jmeni xi koan kjoatse xi faʼaitʼa ya Biblia, jmeni xi tso Evangelio kʼoa tsakuije̱ audiodrama xi ya Biblia yʼangini xi faʼaitʼa ya jw.org.
Tʼexkiai xi kachjoejin. Koaan toji kʼoéxkiai, kʼoa tsa maije̱ koaan nʼio kʼoéxkiai kao familiali kʼoa tsa kao miyoli. Koaan jngo kʼoexkia jñani to bʼéyanajmí kʼoa xi ngikʼa koaan jngó jngó kʼoexkia jñani kjaʼaí kjaʼaí chjota nchja̱.
Koaan kʼoasʼiain jotso kjoafaʼaitsjen xi faʼaitʼa i̱bi:
Koaan jngo kʼoa tsa nkjín dibujo tindai xi kui tínchja̱ni jme xi tibʼexkiai. Tatio chʼin chʼin dibujoli kʼiani kʼoakoan jme xi tibʼexkiai. Nga jngó jngó dibujo tʼetʼai jme xi tínchja̱ni.
Jngo esquema tʼendai. Tobʼelañá, kʼianga kui kʼoéxkiai tʼatsʼe choʼndale Niná xi kixi kitʼale kui tingósonkoai jokoankjoan kʼoa jme xi kisʼin kao kjoanichikontʼain xi kisokole.
Kʼoasʼin tikjaʼaitsjain joni tsa ñaki je xi tichjonangilai. Koaan nkjín koya xi chjónangi xi tʼatsʼe. Kʼoati koa̱n kʼoasʼin tikjaʼaitsjain nga kʼoati je tichjonangilai je chjota xi tsabe jmeni xi koan.
Kʼiatsa kui tibʼexkiai tʼatsʼe chjota xi chʼao kisʼin, kui tikjaʼaitsjain jósʼin kichomani tsandalani kisʼin. Tobʼelañá, tikjaʼaitsjenjin xi tʼatsʼe Pedro nga kʼoakitso nga tsín bexkon je Jesús (Marcos 14:66-72). Jméni xi tjínnele kisʼin tsakai je Pedro.
Xi kʼoati koa̱n sʼiain kuinga chjí jókinʼiai tsa jilani xi kui kjoa kitjatojin jme kjoa xi jaʼatojin je chjota xi bʼaxki̱ ya Biblia. Tʼetʼaxuin jmeni xi bakóyali tʼatsʼe chjota xi tibʼexkiai (Romanos 15:4).
Koaan nga ngisa tsjoa sʼe̱ tokuin nga kʼoéxkiai Biblia.
Tjasjaiyai
Kʼiatsa tsesa kjoásjaiyai jme xi tibʼexkiai tsesa xi koa̱njinli. Ninga tojngo jao én kjoásjaiyai tse xi koa̱njinli.
Tobʼelañá, tingósonkoai jmeni xi tso Mateo 28:7 kao Marcos 16:7.
Ánni kui tsakʼétʼani je Marcos nga koa̱ntsenle Jesús je chjotale kʼoa “kao Pedro”.
Xi koasenkaoli nga koanjinli: Je Marcos alikui ya tíjna nga kui nichxin, tochale je Pedro xokitsole.
Én xi nʼio chjíle: Ánni nda kisʼeni kon Pedro kʼianga kʼoakitsole Jesús nga mele skoe̱ (Marcos 14:66-72). Jósʼin tsakakó je Jesús nga miyole koan kjoaixi je Pedro. Jósʼin chjénngi je choa̱le Jesús tsa meli nga miyo kuitsoli xi kjaʼaí.
Ngisaa mamená bʼexkiaa Biblia kʼianga nda chotʼayajiaan kʼoa nga fasjaiyaa.