Tsín jngo libro xi mangóson je Biblia. Je xi jmi nó tífaʼato, miyón chjota xi ya tjíokjoenile Biblia josʼin makjainle. Tonga kʼoati tsínsa ijngo libro xi kʼoasikji tíchotʼayason kʼoa xi kʼoasikji síkʼaxki̱ je chjota joni tsa Biblia.

Tobʼelañá, je chjota xi kotʼayason Biblia, tjínkʼa xi kʼoatso nga tsín ñaki kʼoatjío je Biblia xi kjio ndʼaibi jotjío je xo̱njchá xi kjio saʼnda ngasʼa. Jngo xi i̱ kitso: “Saʼnda tsín tjínjngo tokuinjin tsa ñaki kʼoatjío je xo̱n xi kjionajin jokjoan kisatio je xo̱n xi títjon kichji”. Kitsosa: “Je copia xi kjionajin nkjín kʼa jñani tsín ndatjío, kʼoa xo̱n jebi siento nó koanskanni kichji kʼianga jekichji xi títjon xo̱n kʼoa nʼio nkjín koya jñani tsín mangóson”.

Kʼoa tjínkʼa chjota xi tsín makjainle tsa ñaki kʼoatjín je Biblia kʼoa kui xosíkao josʼin makjainle ngasʼa. Tobʼelañá, je familiale Faizal alikui makjainle tʼatsʼe Cristo. Kʼoa saʼnda nga sʼa ʼndí kji kʼoasʼin tsakʼinyale nga Énle Niná je Biblia tonga nga tsʼantjaiyajin jmeni xi tso. Je Faizal itso: “Kui xi koan nga tsín koankjainna jotso je chjota xi tʼatsʼe Biblia fákaonina. Nga̱ tsínkuijin Biblia xi títjon kichji kjiole, nga̱ jetsʼantjaiyajin”.

A bʼétʼaná tsa tsʼantjaiyajinlani je Biblia. Tobʼelañá, a koa̱nkjainli jmeni xi tso Biblia tʼatsʼe nichxin xi nroaján kʼiatsa ʼyalani nga tsín kʼoatso je xo̱njchá xi títjon kichji (Romanos 15:4). Tsa tsínlani ñaki kʼoatjío je Biblia xi tjín ndʼaibi jotjín je xi títjon kichji, a kʼuíntjennginí je kjoafaʼaitsjen xi tsjoá tʼatsʼe xá, tʼatsʼe familia kʼoa josʼin jchaxkuín Niná.

Ninga tsín tikjioni je xo̱n xi títjon kichjitʼa Biblia, jmi xo̱njchá kjio xi koa̱n chótʼayajiaan. Jósʼin tínjengi Biblia ninga kui kichjitʼa je xo̱n xi bitson, ninga nʼio nkjín chjota xi tsakatiochjoa kʼoa ninga tjín chjota xi koanmele kisikʼantjaiyajin jmeni xi tso. Kʼiatsa jchaa xi tʼatsʼe jebi jchañá nga ñaki kʼoatjín jmeni xi tso je Biblia xi kjio ndʼaibi. Kataʼyala jókjimani tínjengi je Biblia ninga tse kjoa tífaʼatojin.

XI TSAKʼETʼALE. Je xi kiski Biblia kʼoa kao xi kiski copiale kui kiskitʼa je xi papiro ʼmi kʼoa kao xi pergamino ʼmi (2 Timoteo 4:13).a Jókoanni kinjengi je Biblia nga kui xo̱n jebi kichjitʼa.

Je papiro maxkoa̱ní, bitjoní kʼoa tochoatse male. Je chjota xi Richard Parkinson ʼmi kʼoa kao xi Stephen Quirke ʼmi kui kotʼayason jokoanchon ngasʼa ya naxinandá Egipto, kʼoa itso: “Nga jefi nichxin, je xo̱n chan fe, to nʼólesa satío kʼoa to chao ma. Kʼianga sʼeyotjao, je rollo tjoxaa kʼoa fiʼndo. Kʼoa kʼianga satíoñe choo kjine, jolani je ni̱ʼyo chxoa”. Kʼianga jekoansjai xo̱n papiro tjín xi nʼio tsʼakaole ndoá kʼoa tjín xi ya kisʼeyo ya jñani nyʼán chon kʼoa kuinga ngisa ngotjo chitsonni.

Je xi pergamino ʼmi ngisaa taja tikʼoajinni papiro. Tonga kʼoati bitson tsa tsín nda koa̱nkuinda, tsa tse ndoá skoe̱ kʼoa tsa nʼio nyʼán chon jña sʼe̱yo.b Kʼoa kʼoati síkje cho̱. Tsa kʼoalani koan je Biblia jejin kichangi én xi nroatʼa.

JÓKOANNI KINJENGI BIBLIA. Je kjoatéxoma xi tsakʼaile chjota israelita kʼoatso nga ngatsʼi je xi rey ma ya naxinandá Israel katakji jngo copia xi tsʼe kjoatéxoma. Aon librole Biblia xi kiski (Deuteronomio 17:18). Kʼoa je chjota xi kui xá kisʼin nga copiale Biblia kiski nʼio nkjín copia kiski, kʼoa kʼianga jetífikjetʼa siglo 1 tojo tjínsa copiale Biblia ya ndʼia sinagogale naxinandá Israel kʼoa saʼnda ya naxinandá Macedonia (Lucas 4:16, 17; Hechos 17:11). Jókjimani tínjengi kʼa je xo̱njchá jebi saʼnda nichxin xi tiyoaa ndʼaibi.

Je chjota xi Philip Comfort ʼmi, xi tʼatsʼe Nuevo Testamento kotʼayason, itso: “Je chjota judío tiiniʼnde tsakatíoya je xo̱n Escritura nga tsakatíotjao”. Kʼoa je chjotale Cristo kʼoati kisʼin. Je xo̱njchá xi kjimasjai xi tsʼe Biblia tii tjíoya, yaa kjimasjai ya cuarto jñani njioʼya chon, jñani tjío ngijao kʼoa kao ya ʼnde jña nʼio kixí chon.

JÓSʼIN TÍBICHÓTSJOÁ. Nkjín jmi chxʼoále xo̱njchá xi tsʼe Biblia tjíosa saʼnda nichxin xi tiyoaa ndʼaibi, tjínkʼa xi tsʼato jao jmi nó tjínle. Nijngojinla xo̱njchá xi kʼoasikji tjíosa nichxin xi tiyoaa ndʼaibi kʼoa xi kʼoasikji kjoatsele.

XI TSAKʼETʼALE. Nʼio nkjín chjota polítiko kao chjota relijión xi tsínkui kʼoakisʼin jmeni xi tso je Biblia. Kʼoa nʼio nkjín xi tokui tsakʼangini nga je tsakatéxoma nga tsín kitsjoaʼnde nga Biblia kisʼeyole chjota, nga tsakʼasje kʼoa nga kisikʼatoya. Jaola choa̱ kataʼyaa.

• Kʼiala nga nó 167 nga kjesa faʼaijin Cristo, je rey xi Antíoco Epífanes tsakʼin tsakʼéne nga tsín tijme copiale Escrituras Hebreas katasʼeni nga̱ kui xi koanmele nga kui relijiónle chjota griego katasʼele je chjota judío. Je chjota xi Heinrich Graetz tsakʼin kʼoakitso nga je chjota xi xá kisʼele kisixkoaa kʼoa tsakaká je rollo xi faʼaitʼa kjoatéxoma tojñani nga koansjaile kʼoa kisikʼien je xi tsaʼyale nga kui tjíobʼéxkia.

• Tjen nó 500 saʼnda chrianle nó 1500, tjínkʼa chjotatítjonle relijión xi koanjtile nga je xi toxkia chjota kui kuitsoya jmeni xi tso je Biblia ʼndele nga kui kuitsoya jmeni xi tsoya yo̱ngo̱. Kʼoakitso nga yátsʼi̱n tsakinyále relijiónle je chjota xi librole Biblia kisatiole, tokui xi koan kisatiole je librole Salmos nga én latín. Je chjota xi ya síxá ya yo̱ngo̱ kʼoasʼin tsakʼéne nga i̱ katasʼín kʼa chjota nga jngó jngó yo̱ngo̱: “Ñaki nda katasʼesjai, kʼoa kjitʼa katasʼesjai je chjota xi yátsʼi̱n binyále relijiónle [...] ya ndʼia kʼoa ninga ngiʼnde tojñani nga ʼyale nga librole Biblia kjiole je chjota. [...] Ya ndʼia jñani koa̱nsjai jngo chjota xi yátsʼi̱n basénle relijiónle katanixkoa̱ ndʼiale”.

Tsa kʼoalani koanle chjota nga kisichangi Biblia, tokichangijin je én xi nya.

JÓKOANNI KINJENGI BIBLIA. Je rey Antíoco yaa naxinandá Israel jñani nʼio tsakásjai je xi librole Biblia kjiole. Tonga je chjota judío kʼoati tsakatio jñani xin ʼnde. Je chjota xi kui kotʼayason kʼoatso nga kʼia nga siglo 1, tsʼato 60% chjota judío xi tsín ya tjío ya naxinandá Israel. Yaa yo̱ngo̱le kjiole je copiale xo̱n xi Énle Niná faʼaitʼa; tikui kisichjénni je xi tsakatio nga koanskanni. Kʼoati kui kisichjén je xi chjotale Cristo koan (Hechos 15:21).

Tjen nó 500 saʼnda chrianle nó 1500, je xi tsjoake koan je Biblia tosi tonda kiski copiale kʼoa tosi tonda kisikʼatoya ninga chjota kitjenngike. Kʼianga kjesa bʼatsenjin je imprenta nga siglo 15, tokʼoa jekantejan én kjio kʼa librole Biblia. Saʼnda nga kʼia nʼio nkjín én kinikʼatoya kʼoa nʼio nkjín kitjo.

JÓSʼIN TÍBICHÓTSJOÁ. Ningalani je rey xi nʼio tjínle nganʼio kao chjota relijión kjimamele tjíosíchangi je Biblia, tsínsa ijngo libro xi mangóson je Biblia nga̱ nʼio nkjín tíbʼabíson kʼoa nʼio nkjín én tífaʼatoya. Nʼio nkjín naxinandá xi ya tjíokjoenile Biblia jotjío kjoatéxomale kʼoa kao én xi nchja̱. Kʼoati miyón chjota tjíobinyakao je Biblia.

XI TSAKʼETʼALE. Ninga chitson xi kichjitʼa títjon je Énle Niná kʼoa ninga koanme kʼale chjota nga kisichangi, tsín kʼoakoanle. Tonga kʼoati tjíobatio je chjota xi copiale Biblia kji kao je xi síkʼatoya xi kjimamele tjíosíkʼantjaiya je én xi nya Biblia, nga kui xi mele nga kʼoasʼe̱ Biblia josʼin makjainle, ʼndele nga tosa kui kʼoasʼin jmeni xi tso je Biblia. Kataʼyala kʼaa choa̱.

• ʼNde jñani sʼetsʼoa. Kʼianga siglo 4 kao siglo 2 nga kjesa faʼaijin Cristo, je xi kiski Pentateuco Samaritano, ya Éxodo 20:17 itso xi tsakʼétʼasonle: “Ya Nindo Gerizim. Kʼoa yaa kʼoénda jngui sonxta”. Kuinga kʼoatso xi tsakʼétʼani je chjota samaritano nga̱ kui xi koanmele nga joxi ya Biblia tsakʼangini nga jngo yo̱ngo̱ tsakʼénda ya jña Nindo Gerizim ʼmi.

• Tʼatsʼe Trinidad. Tosʼaa 300 nó jaʼato nga jekoanjngo je Biblia, kʼianga jngo chjota xi tʼatsʼe trinidad makjainle itso én xi tsakʼétʼasonle ya 1 Juan 5:7: “Ya ngʼajmi, je Nʼainá, je én xi tijeni Cristo, kao je Espíritu Santo. Toñaki jngo ma nga janbe”. Én jebi alikui ya faʼaitʼa je xo̱njchá xi kichjitʼa títjon je Énle Niná. Tojo kitso je chjota xi tʼatsʼe Biblia kotʼayason, xi Bruce Metzger tsakʼin, “tjen siglo 6 [je én jebi] sa faʼaitʼa sa faʼaitʼa ya Biblia Versión Latina Antigua kao Vulgata latina”.

• Jaʼaínle Niná. Nga kui tsakʼangini josʼin makjainle chjota judío, nʼio nkjín chjota xi Biblia síkʼatoya xi tsakjaʼáxin je jaʼaínle Niná ya Biblia. Kui én tsakatíongajaole xi Niná kʼoa xi Señor tso. Kʼianga kui én jebi faʼaitʼa ya Biblia, ali tsa tojejin Niná xi kʼoatsole, kʼoati kui én machjén nga nokjoani tʼatsʼe chjota, tʼatsʼe xkóson xi bʼétsʼoale chjota kʼoa saʼnda kui én machjén nga nokjoani tʼatsʼe Na̱i (Juan 10:34, 35; 1 Corintios 8:5, 6; 2 Corintios 4:4).a

JÓKOANNI KINJENGI BIBLIA. Xi títjon. Ninga nkjín xi tsín ñaki kʼoakjoansʼin kiski ijngokʼa je copiale Biblia, kʼoati nkjín xi ñaki tsakʼénele yaole nga kʼoakjoansʼin kiski. Nga jinle siglo 6 saʼnda siglo 10, je chjota masoreta kui kiski copiale Escrituras Hebreas kʼoa testo masorético sʼin ʼyale. Chjota jebi ñaki tsakʼéxki je én kao letra nga tsín kjaʼaí sʼe̱ je xo̱n xi kiski. Kʼianga bele kon nga tsín ndatjín je xo̱n jñani kiskoenile nga kiski yaa tsakʼétʼa ya ndaile je copia xi kiski. Je chjota masoreta alikui kisikʼantjaiyajin je Biblia. Je chjota xi Moshe Goshen-Gottstein tsakʼin kʼoakitso nga “kʼoasʼin koankjainle je chjota masoreta nga nʼio tse jée koa̱njngi” tsa sikʼantjaiya je én xi nroatʼa Biblia.

Xi majaoni. Nga nʼio nkjín xo̱njchá kjio, kui xi binyakao je chjota xi kotʼajin Biblia nga be tsa jña tsʼantjaiya. Nkjín siento nó nga kʼoasʼin kitsoya je xi nyatítjonle relijión nga je Biblia xi síchjén xi én latín tjítʼa kui xi ñaki kʼoatjín jotso je xo̱n xi títjon kichji. Kuinga jngo én tsakʼétʼasonnile ya 1 Juan 5:7 tojosʼin jekaʼyaa. Én jebi saʼnda kisʼetʼason ya Biblia Reina-Valera. Tonga kʼianga jekoansjaisa je xo̱njchá xi kjio, jmé xi tsaʼyale. Je chjota xi Bruce Metzger tsakʼin i kitso: “Je én xi kisʼetʼa [ya 1 Juan 5:7] alikui faʼaitʼa ya xo̱njchá xi kjio, (jolani tsʼe én siríaco, copto, armenio, etiópico, árabe, eslavo) tokuikjoán tsʼe én latín xi tjínle”. Kʼoa kuinga tsakjaʼáxinni je Biblia Reina-Valera kʼoa kao xi kjaʼaísa Biblia je én xi tokisʼetʼason.

Je xo̱njchá xi jenʼio kjoatse kjio, a bakó nga tsín tíbʼantjaiyajin je én xi faʼaitʼa Biblia. Kʼianga nó 1947 koansjai rollo xi tsʼe Biblia ya mar Muerto. Rollo jebi jngo jmi nó ngisa jchá tikʼoajinni rollo xi ngikʼa. Kʼoa je chjota xi kui kotʼayason kisingósonkao rollo jebi kao xo̱n xi kiski chjota masoreta. Jngo chjota xi kisixákao je rollo xi koansjai ya mar Muerto kʼoatso nga rollo jebi “kui bakó nga likui tsʼantjaiya je copia xi tsʼe Biblia xi kiski je chjota judío xi tsʼato jngo jmi nó”.

Je Biblioteca Chester Beatty de Dublín xi tíjna ya Irlanda, me kjiole ngayeje xo̱n papiro xi tsʼe Escrituras Griegas Cristianas. Tjínkʼa xo̱n jebi xi kʼia kichji nga siglo 2, nga tosʼa jngo siento nó jaʼato nga koanjngo je Biblia. Je libro xi The Anchor Bible Dictionary ʼmi itso: “Ninga nʼio tse jme xi bakó je xo̱n papiro xi tʼatsʼe Biblia kʼoati bakó nga tsín tsʼantjaiya je én xi nroatʼa Biblia jokji tífaʼato nó”.

JÓSʼIN TÍBICHÓTSJOÁ. ʼNdele nga sikitsónjin je én xi nya Biblia, je xo̱njchá xi kjimasjai tosa tíbasenkao. Je chjota xi Sir Frederic Kenyon ʼmi i kitso: “Nijngojin libro jchá xi kʼoasikji xo̱njchá tjínle xi bakó nga ñaki kʼoatjín jme xi tso, kʼoa jngo chjota xi kixi kʼoajin kuitso nga ñaki kʼoatjío je xo̱n xi kjioná saʼnda ndʼaibi”. Kʼoa je xi William Henry Green tsakʼin i kitso: “Likui jao tjínná nga tsínsa ijngo libro xi kichji nichxin kjoatse xi ñaki tojo kʼoakjoantjín saʼnda ndʼaibi”.

Ninga tse kjoa jaʼatojin, je Biblia alikui tíchangi kʼoa kuinga koa̱n so̱koniná kʼoa koa̱n kʼoéxkiasíñá. Kʼianga jngo Biblia xi nda jaʼatoya chjoejiaan koaan kʼoakʼoé tokoán nga ñaki kʼoatjín je én xi tibʼexkiaa jokisʼe je xi títjon kichji.a Tonga ánni nga tojo kijnani Biblia saʼnda ndʼaibi ninga bitson xo̱n xi kichjitʼa, ninga chjota tsakatiochjoale kʼoa ninga tjío xi mele kisikʼantjaiyajin én xi nroatʼa. Ánni nga tsín mangósonsíni Biblia kao libro xi kjaʼaí.

Nʼio nkjín chjota xi kotʼaya Biblia xi kʼoati tso jokitso je pastro Pablo: “Ngayije xo̱n Escritura Niná jinroani” (2 Timoteo 3:16). Kʼoasʼin makjainle nga kuinga Énle Niná nga tsín tíchangini kʼoa nga je Niná xi tsín títsjoáʼnde nga jchangi. Je Faizal, xi jesa kanikʼaxkiaa, jesoaa kiskotʼaya Biblia. Tokʼoakoanle jme xi koanjinle. Tsabee nga nkjín koya xi tsínni ya Biblia faʼaitʼa jmeni xi tsoya je xi chjotale Cristo tsole yaole. Kʼoa ñaki kiskajin ni̱ma̱le nga tsabe jme xi tjínndajinle Niná tʼatsʼe Sonʼnde, tojosʼin tsoya je Énle.

Je Faizal itso: “Ndʼaibi ʼbeña nga je Biblia xi kijnana jngo kjoatjao xi tʼatsʼe Niná tínroani. Tsa koanle Niná kisinda ngʼajmi kao Sonʼnde, tsí kʼoati koa̱nle sikuinda je Énle ánni nga kataʼyasíñá. Tsa kjaʼaí kuixoán kʼoajinni tibixoán nga tsínle nganʼio je Niná xi nʼio ngʼa tíjna. ʼYáni an nga kʼoaxínña nga tsínle nganʼio je Niná” (Isaías 40:8).