² Kʼianga kʼoasikji ñʼai kjoa tjíofaʼatojin je chjotale Cristo, je chjota romano kʼoati kitsoa je pastro Pablo. Tsakui nichxin kui kisikjaʼaitsjen je Pablo tsa koasenkao je chjotale Cristo xi ngikʼa. Ánni. Ñandia kʼianga nʼio ñʼai kjoa jaʼatojin kʼoa aliʼya xi tsakasenkao. Tonga je Pablo kʼoakitso nga je Jesús kisichjén je Jeobá nga kitsjoale nganʼio xi koanchjénle. Saʼnda kʼoakitso nga tsakʼasjentjai ya “tsʼoa xa” (2 Timoteo 4:16, 17).a (Tʼexkiai nota.)

³ Je Pablo ñaki kʼoatsakʼé kon nga koa̱n sinʼiotʼa je Jeobá. Ánni. Nga̱ kui kisikjaʼaitsjen josʼin tsakasenkao ngasʼa. Alikui jao kisʼele nga je tsjoále nganʼio xi machjénle nga ska̱le je kjoa xi tífaʼatojin kʼoa xi kjoaʼatojinsa nga koa̱nskanni. Ñaki kʼoatsakʼé kon nga je Nainá kʼoasjentjai tojmeyeje kjoa xi kjoaʼatojin (2 Timoteo 4:18). Ñaki kʼoatsakʼé kon nga je Jeobá kao Jesús koasenkao ngantsjai ninga tsín koasenkao je ndsʼe̱. Alikui jao kisʼele.

KʼIANGA NʼIO ÑʼAI KJOA BITJATOJIAAN

10-12. 1) Ánni nga tsín choa ñʼai tíjnasíni nga nikuindaa tsa jngo familianá xi chʼin tjínle. 2) Kʼianga jngo kjoa tjínná kʼoa je Jeobá ninʼiotʼaa, jósʼin biyoaa kao je. Jngola choa̱ tʼejnai.

¹⁰ Ya párrafo 2 kui kʼoakatsoná nga je Pablo kichʼasjentjai ya “tsʼoa xa” (2 Timoteo 4:17). Kʼiatsa nʼio ñʼai tjín kjoa xi tijnajin kʼoa kʼoatjín tokuin jokisʼe tsʼe Pablo, jméni xi sʼiain. Nʼio machjén nga si̱nʼiotʼai je Jeobá. Tobʼelañá, tsa jngo familiali tinikuindai xi chʼin tjínle. Jejin Jeobá tinijélai nganʼio nga katabasenkaoli kʼoa tsa jme xi sʼiain nga kui kʼoasʼiain xi kixi tíjna.c (Tʼexkiai nota.) Koaan tʼejngui tokuin nga̱ be Jeobá jme kjoa tibitjatojin. ʼYaní nga je koasenkaoli kʼianga ska̱li kʼoa nga kixi kʼuíntʼalai (Salmo 32:8).