Kjoaʼmiya 1

Niná tinchja li nga miyo le koain

Niná me le nga miyo le koain. ¿A ʼyani nga koan miyo le koain jé Chjota xi nʼió ngʼa tíjna le ngʼajmi kao Soʼnde? Abraán kjoatse tsakʼejna; miyo le Niná tsakʼin (Santiago 2:23). Je Biblia bʼeyanajmí kʼa tʼatsʼe xi miyo le Niná koan kʼoa tse kjoanichikontʼain tsakʼai le. Nichxin xi tiyoa ndʼai, jngo tjíjtsa Soʼnde nʼió nkjín chjota xi miyo le Niná kjima. Ji kʼoati koan miyo le Niná koain.

Nga miyo le Niná koan ngisa nda tikʼoa jin ni nga miyo le koan toʼya chjota ni. Niná nikʼia jin chʼaosʼin bʼejna le miyo le xi nʼiotʼa (Salmo 18:25). Nga miyo le Niná koan ngisa nda tikʼoa jin ni nga kjoanyiná sʼe ná. Kʼianga mʼe jngo xi nyiná, kjaʼai xi tsʼe ma taon le. Tonga xi miyo le Niná tjín jngo le tsojmi xi nʼió chji le xi tsín ʼya xi koan kjoaʼa le (Mateo 6:19).

Tsa kui nichxin tjín kʼa xi koankai le nga koan salí xi tsʼe Niná. Saʼnda koatiochjoa kʼa miyo li kao xi yaniʼya li (Mateo 10:36, 37). Tsa ʼya xi bijnokie li kʼoa binyaxkón li, tikjaʼaitsjain ʼyani xi me li nga nda kuijnakoai: ¿a Niná a xo jé chjota? Tikjaʼaitsjain lai jebi: tsa ʼya xi kʼoa kuitso li nga tsín ti kʼia kuichí ni, ¿a sitjoson lai? Mai jin, kʼianga kuijnachuin tjínne li nga kuichí. Ngo, ¡Niná koan le tsjoá li kjoabijnachon xi ngantsjai! Kui nga, katama salí jósʼin nga miyo le Niná koain kʼoa li bʼaiʼnde jin nga ʼya xi kʼoechjoa li (Juan 17:3).