Job kixi kitʼale Niná

A KOAAN kixi koaitʼale Niná je choʼndale kʼiatsa chótʼayakao ninga tsín jme xi kuinjele koa̱nle. Jngo chjota xi Job tsakʼin kui kjoa jaʼatojin. Kataʼyala jokisʼin.

Je Job xínkjín koanni Abraham kʼoa yaa tsakʼejna jñani Arabia ʼmi ndʼaibi. Kʼiaa tsakʼejna nga ya tjío Egipto je chjota israelita. Ñandia kʼianga kisikatíojtín Jeobá je ánkjele ya ngʼajmi kʼoati kicho Satanás. Ngixko̱n ngatsʼi ánkje, je Jeobá nda kisikʼaxki̱ je Job nga kʼoasʼin kixi tífitʼale. Nga kʼoakitso Jeobá kui xi tsakakó nga be nga tsín yátsʼi̱n koasenle je Job. Tonga je Na̱i kʼoakitso nga tokui nga tísíxánile Job je Niná nga tísíchikontʼain kʼoa nga tísíkuinda. Ñaki kʼoakitso nga yátsʼi̱n koasenle Jeobá kʼiatsa tsín tijme xi sʼe̱nile.

Je Niná kitsjoaʼndele je Na̱i nga tsakjáʼale je Job ngayeje tsojmi xi kisʼele, nga kisikʼien xtile kʼoa nga kitsjoachʼinle. Je Job alikui be tsa jeni Na̱i xokisikao kʼoa kuinga tsín koanjinsínile anni nga kitsjoaʼndesíni je Niná nga kʼoakoantʼain. Ninga tselani kjoa jaʼatojin, nikʼiajinla yátsʼi̱n tsakasénle Jeobá.

Xijekoan, jan chjota kichokonle je Job xi tsínni ñaki miyole mani kʼoa nʼio tsakjákao. Je libro xi tsʼe Job me tokui tjítʼayeje jmeni xi kitsole chjota xokjoan. Kʼoakitsole kʼianga kuinga kjoañʼai tífaʼáni nga jée tsakajngi kʼoa nga je Niná xotísíkao. ¡Tonga likuini kʼoatjín jme xi kitso! Saʼnda kʼoakitso kʼianga je Niná likui mandosinle je choʼndale kʼoa nga be nga tsín kixi koaitʼale. Tonga je Job likui koankjainle jme xi kitsole, tosa kʼoakitsole nga kixi koaitʼale Niná saʼnda nga kuiyá.

Tonga xi tsín nda kisʼin je Job kuinga to yaole nʼio kisitoánntjai. Kʼianga je kinchja ngatsʼi, jngo ti xi Elihú tsakʼin kinchja. Ti jebi tsakatekjáyale Job nga kʼoasʼin to yaole nda tsakʼasje ʼndele nga je Jeobá kao kjoatéxomale nda kʼoasje. Kʼoa kʼoati nʼio kisikjakále nga jan chjota xi tsakjákao je Job.

Xijekoanni jesoa Jeobá kisikixiyandale je Job. Kui kisichjén jmeni xi kisinda nga tsakakóyale nga niʼijinlanatjín mangóson je chjota jokji jeya tíjna Niná. Je Job kisʼele kjoanangitokon kʼoa kinrʼoé jmeni xi tsakʼinle. Kʼoa je Jeobá nga “tjínle kjoamatokon, [tsa]bema̱ní” je Job, kisindaya chʼinle, ngi te xti kitsjoale kʼoa jaoya kʼoakji kjoanyiná kitsjoanile (Santiago 5:11). Kʼianga kʼoasʼin kixi kitʼale Niná je Job kui xi tsakakó nga ñaki toxokʼoatjín jmeni xi kitso je Na̱i. Xi ijngosani, kʼoati kui xi tsakakó nga koa̱n kixi koaitʼale Niná je chjota ninga chótʼayakao.

(Yaa yʼangini libro xi tsʼe Job.)