Kjoaʼmiya 7

Jngo kjoasʼejinkon xi je kjoatse kʼoakoan

Likui tsjoaʼnde Jeobá nga chjota tsʼen sikitsón ʼNde naxó. To je miyo le xi ya koatio. ¿Jmé xi koan le chjota tsʼen? Xi koan nichxin le Noé ya tsoya ná jebi. Je sa ni nkjín jmi nó jaʼato saʼnda nga tsakʼejna; jngo xʼin xi nda chjota koan, tsakʼene le yao le ngantsjai nga kʼoa kisʼin josʼín koanme le Jeobá. Tonga ngatsʼi chjota xi tsakatio Soʼnde nga kʼia chʼao kisʼin. Kui nga Jeobá kʼoa kitsó si ni le Noé nga jngo jtsínʼió sikjieson ni chjota xi chʼao tjiómasʼin. Kʼoati kitsó le nga sinda jngo arka kʼianga jé kʼoa kao xi tjió yaniʼya le nga tsín ya kjoeson nga sikasen Jtsínʼió (Génesis 6:9-18).

Noé kao xi ʼyaniʼya le kisinda je arka. Noé kisikjinruʼe chjota nga Jtsínʼió kjoaʼai, tonga liʼya xi tsakʼa én le kʼoa tosí tonda chʼao kisʼin. Kʼianga je koanjngo le arka kʼoasʼin kisikʼasʼen cho; jé, kʼoa kao xi yaniʼya le kʼoati jaʼasʼen. Xi je koan, Jeobá kisikʼa jngo jtsí nʼió: ñachan nichxin ñachan nitjen, kʼoa jngo tjíjtsa Soʼnde kitsendá (Génesis 7:7-12).

Kʼien chjota xi chʼao kisʼin, toje Noé kao xi yaniʼya le xi kitjontjai. Jeobá kisikuinda nga jaʼai Jtsínʼió kʼoa kʼoasʼin kisikatió i Soʼnde nga je kisitsje xi chʼaotjín (Génesis 7:22, 23). Je Biblia kʼoatso nga Jeobá ijngokʼa sikjieson ngani xi tsín me le kʼoasʼin xi kixi. Likui sikjieson xi nda chjota, kʼoa jé kʼoatio ngantsjai ya Soʼnde naxó (2 Pedro 2:5, 6, 9).

Nichxin xi tiyoa ndʼai, nʼió nkjín chjota xi chʼaosʼin. Nʼió tse kjoa tjín le chjota soʼnde. Jeobá sikasen én le chjota xi kao Testigo le, to me ngatsʼi chjota nga tsín nruʼe, likui me le sikʼantjaiya yao le kʼoa ni me jin le nga Niná kʼoa kuitso le xi nda tjín kao xi chʼaotjín. ¿Jmé xi koan le? ¿A kuicho nichxin nga sikʼantjaiya yao le? Nʼió nkjín chjota xi nikʼia jin kʼoantjaiya jo kjoan. Je tíjna chrian nichxin nga kjoaʼai nikjieson chjota tsʼen, kʼoa nikʼia jin ti koatiokon ni (Salmo 92:7).

Je Soʼnde nikʼia jin kjue; ʼNde naxó koan. Xi miyo le Niná koan i koatio ngantsjai nichxin jngo Soʼnde naxó (Salmo 37:29).