Kjoaʼmiya 15

Xi miyo le Niná kui xi ndatjín kʼoasʼin

Kʼia tsa jngo miyo tjín li xi nda chʼasjai kʼoa tjín li kjoaxkóntokon xi kao jé me li kʼoasʼiain josʼín. “Nda chjota kʼoa kixi jé Jeobá”, tso Biblia (Salmo 25:8, NM). Kʼianga miyo le Niná koan, tjínne ná nga nda chjota kʼoa kixi koan. Je Biblia kʼoatso: “Chjengi lao Niná, joni tsa ʼndi xi kjai nga tjaocha. Kao kjoatjaocha timakao xíngio” (Efesios 5:1, 2). Kui kʼa choa jebi josʼín nga koan chjengi le Jeobá:

Tisenkoai chjota. “Nda sixá tʼatsʼe ngatsʼi.” (Gálatas 6:10.)

Tjínne li nda chjota nixá katamai. “Je xi kisiché, a li ti síche jin ni. To sa katasixá, kʼoasʼin katasixá ni ntsja xi nda tjín.” (Efesios 4:28.)

Tjínne li nga tsje kuijnai kʼoa nga kʼoati tsje kʼuinkoai yao li. “Sitsjé ya le yao ná ngayeje xi chʼaokjoan xi tsʼe yao ná, kʼoa xi tsʼe espíritu ná, nga ñaki sijngoa xi koantsje ñá nga xkónchá Niná.” (2 Corintios 7:1.)

Tʼinchʼa lai kjoaxkóntokon kao kjoatsjoacha xi yaniʼya li. “Jngo jngo ngatsʼio bi ñaki kʼoasʼin tsjoacha katamao yánchjín no, josʼín tsjoachao yao no. Je xi chjoón xkón katabe xʼin le. Jon xi ʼndixtio, titjosón lao xijchá no.” (Efesios 5:33-6:1.)

Takó lai kjoatsjoacha chjota. “Kʼoasʼin tjaocha katama xíngía, nga je xi kjoatjaocha ʼmi tsʼe Niná.” (1 Juan 4:7.)

Titjosuin kjoatéxoma xi tjín naxinandá li. “Ngatsʼi chjota katasítjoson le [chjotaxá] [...]. Tʼechjí lao ngatsʼi xi kitjen no tsʼe, [...] tsa taon basen ni, tʼechjí lao taon basen no.” (Romanos 13:1, 7.)