Kjoaʼmiya 17

Nga sʼe li jngo miyo, tjínne li nga sʼe li kjoamiyo

ʼYani xi tsjoakie xínkjín nda fikao. kʼianga tse sa koan li xi tsʼe Jeobá ngisa nʼió sa koantsjoachai. Kʼia tsa koantse kjoatsjoacha li xi kao Jeobá, ngisa koanme sa li kʼianga sixá lai. Kui je tsjoá nganʼió li nga chjota ʼmiya le Jesukristo koain (Mateo 28:19). Miyo le Niná koain ngantsjai kʼia tsa tojngo niʼya koain xi tsjoa tjió kon testigo le Jeobá. ¿Jmé xi tjínne li xi sʼiain?

Tjínne li koakui kjoatsjoacha li xi kao Niná nga sitjosuin kjoatéxoma le. “Kʼoasʼin tjaocha Niná, nga nikitjosoan kjoatéxoma le. Je kjoatéxoma le a li ñʼai jin tjín.” (1 Juan 5:3.)

Titjosuin jme xi je koan li. Jngo xi tsakʼeyanajmí Jesús basenkao ná nga majin ná jebi. Jngo chjota chjine ya tsakʼendasón naxi ndʼia le, kʼoa jngo chjota xíjin ya tsakʼendasón jin tsomíi ndʼia le. Kʼianga jaʼai jngo jtsí nʼió ndʼia xi ya kisʼendasón naxi likui kiska, tonga ndʼia xi ya kisʼendasón tsomíi ñaki jane nga kixoya. Kitsó Jesús kʼianga jé chjota xi binyaño kjoaʼmiya le kʼoa sítjoson je mangoson chjota xi ya tsakʼendasón naxi ndʼia le. Kʼoati kitsó kʼianga jé chjota xi binyaño kjoaʼmiya le tonga likui sítjoson je mangoson chjota xíjin xi jin tsomíi tsakʼendasón ndʼia le. ¿ʼYa chjota ni xi me li chjengi lai? (Mateo 7:24-27.)

Kjoabʼaitʼa. Jebi kui xi tso ni le nga tʼetsʼoa lai Jeobá kʼoa kʼoatʼin lai nga me li kʼoasʼiain ngantsjai josʼín me le. Ya koakui nga chjota ʼmiya le Jesukristo mai tsa kʼoasʼiain josʼín me le Niná (Mateo 11:29).

Kjoachanisʼenginda. “[Tʼinsʼengindai, NM], titsjai jée li nga nokjoai jaʼain le.” (Hechos 22:16.)

Ñaki kjijngo tixá lai Niná. “To jmeni xi sʼiaon, tsjoa kʼoatʼiaon, tʼatsʼe Nai ná ni [Jeobá, NM], a li tʼatsʼe chjota jin.” (Colosenses 3:23.)