Kjoaʼmiya 18
Miyo le Niná katamai ngantsjai
Ñʼai tjín nga masjai ná jngo miyo, kʼoati ñʼai tjín nga tsín sichá. Nga tibʼene lai yao li nga miyo le Niná kjimai kʼoa nga tsín tinikʼejnai nʼió tse kjoanichikontʼain tsjoa li. Jesús kitsó le xi koankjain le tʼatsʼe: “Xi kjoakixi sikationdai no” (Juan 8:32). ¿Jmé xi tsoya ni le je?
Koan sʼe li kjoandai ndʼaibi. Koan ndai kuijna lai kjoaʼmiya ndiso kʼoa kao kjoandiso xi tíkanibason Satanás. Koan ndʼai kuijna lai kjoachoyá xi tsín le chjota xi miyón ma xi tsín be Jeobá (Romanos 8:22). Je miyo le Niná saʼnda koan ndai koatio le “xi tsakatioxkon [...] le kjoabiya” (Hebreos 2:14, 15).
Koan sʼe li kjoandai xi sʼe Soʼnde chjotse le Niná. ¡Jmé kʼoa sikji naskánatjín ni kjoandai xi sʼe li! Kʼianga je sʼejná Soʼnde naxó, ndai kuijna lai kjoajchán, chʼin, xi bʼatone kjoatéxoma. Ndai kuijna lai nga ma tinijchá yao ná, kjinrá. Ndai kuijna lai nga majchínga, kjoabiya. Ndai kuijna lai kjoabijkon, xi taon be xínkjín, kjoatéxoma xi tsín kixi. Biblia kʼoatso xi tsʼe Niná: “Tichjoʼai ni ndsai nga tibʼai lai je xi tjiókon ngayeje jme xi me le” (Salmo 145:16, NM).
Ngatsʼi miyo le Niná koatio ngantsjai nichxin. Je kjoabijnachon xi tsín kʼia fetʼa jngo kjoatjao le Niná xi nʼió chjí le kʼoa je tsjoá le ʼyani xi me le miyo le koan (Romanos 6:23). ¡Tikjaʼaitsjain lai tsa koan kuijnai ngantsjai nichxin!
Sʼe li nichxin nga nkjín koya xá sʼiain. Tsa kui nichxin me li nga koan li sikjanai jngo tsojmi xi ma nikjane. Tsa kui nichxin me li nga koan li sikʼi kʼoa tsa tsʼe chjineyá je. Tsa kui nichxin me li chótʼayasuin xi tʼatsʼe cho kao tsʼe tsojmi ntjé. Kʼoa tsa koantsjoa li je nga jchai xi kjaʼai naxinandá kʼoa kao chjota xi ya tjín. Kuitjoson ngayeje jebi kʼianga sʼe kjoabijnachon xi tsín kʼia fetʼa.
Sʼe li nichxin nga ngisa nkjín miyo sokó li. Kʼianga kuijnai ngantsjai nichxin nʼió nkjín miyo le Niná jchai. Jcha ni jme xá xi tsjoakie kʼoa jo kjoan je; kʼoa kʼoati miyo li koan. Koantsjoacha ni kʼoa koantsjoakie li (1 Corintios 13:8). Kao kjoabijnachon xi tsín kʼia kjoetʼa, sʼe li nichxin nga miyo li koan ngatsʼi chjota xi koatio Soʼnde. Xi ngisa nda koan: je kjoamiyo li xi kao Jeobá ngisa taja koan kʼianga kjoaʼa xi siento nó. ¡Koan miyo le Niná koain ngantsjai nichxin!