Chjénngilee je profetale Niná: Oseas
1. Jméni xi tsakui nichxin chjonangilee yaoná.
1 Kʼianga nikjaʼaitsjenjiaan nga nda chjota kʼoa nga tjínle kjoamatokon je Jeobá tsakui nichxin chjonangilee yaoná: “Jméni xi tijnanda nga kʼoasʼian xi tʼatsʼe Jeobá” (Sal. 103:2-4; 116:12). Je profeta Oseas kʼoakisʼin jme xi kitsole Jeobá kʼoa ñaki kao kjoatsjoa kʼoakisʼin ninga xi ñʼai tjín. Jósʼin chjénngilee je choa̱ xi tsakʼéjna.
2. Jósʼin chjénngilee je Oseas nga kichokjoale nga kitsoyason.
2 Kʼuínyasoán ninga ñʼai koa̱nná. Tʼatsʼe je xi te ntje̱le naxinandá Israel kinchja̱ni je Oseas. Ya ʼnde jebi me likui ʼya xi je Jeobá tsabexkón. Saʼnda je Jeroboán II xi rey sʼin tsakʼejnale kui “kʼoakisʼin xi chʼaotjín ngixko̱n Jeobá”. Kʼoa tosi tonda kʼoasʼin tsakʼénele chjota nga kui katabʼétsʼoale nra̱ja̱ʼndí tojo kisʼin je Jeroboán I (2 Rey. 14:23, 24). Kʼoa je rey xi tsakatio nga koanskanni likui tsakinyakao je naxinandá nga nda tsakatio ijngokʼani ngixko̱n Jeobá kʼoa kʼiaa kichonikjeson nga nó 740 nga kjesa chʼajin nó 1. Tonga je Oseas ñaki kʼoatsakʼé kon nga kixi kitʼale je Jeobá xi ñachanxjaʼaonño nó kisixále ningalani kʼoasʼin xkóson tsakʼétsʼoale chjota xi tsakʼejnajinle. Kʼoa ñá, a kʼoasʼiaan jokisʼin Oseas. A tosi tonda kʼuínyasoán jokji koai nó ninga koatiochjoaná chjota kʼoa ninga tojtaya sikaoná (2 Tim. 4:2, Traducción del Nuevo Mundo).
3. Jokisʼin je Oseas, jósʼin bakóchoya je kjoamatokonle Jeobá.
3 Kui nʼio kuenta sʼiaan je kjoamatokon xi tjínle Jeobá. Je Jeobá i kitsole je Oseas: “Jngo chjoón xi síchajngi chjoétjoai” (Os. 1:2). Je chjoónle Oseas, Gómer tsakʼin, kʼoa jngo ʼndí kisʼele xi tsʼe Oseas. Tonga kisichajngi kʼoa ngi jao xti kisʼele xi tsakui nichxin kjaʼaí xi tsʼe. Je Oseas kisichatʼale je chjoónle kʼoa nga kʼoakisʼin kui tsakakó jokisikao Jeobá je naxinandá Israel kʼianga kʼoakoannile jée xi tsakajngi. Nʼio tse kjoamatokon tsakakóle kʼianga kisichatʼale (Os. 3:1; Rom. 9:22-26). A tiyondañá nga koakoyalee ngatsʼi chjota, toʼyani xi ska̱jiaan, je kjoamatokon xi tjínle Jeobá (1 Cor. 9:19-23).
4. Jméni xi tiyondaa nga kʼoasʼiaan xi tʼatsʼe Jeobá.
4 Tjínkʼa je choʼndale Jeobá xi kisikatío je xá jñani nʼio nda machjíle tsakai ánni nga ngisa tse nichxin sʼe̱sínile nga kuitsoyason. Kʼoa tjínkʼa xi tsín tjíobixan kʼoa tsa xi tsín tjíosʼele xti nga tosa kui xále Niná tjíosʼín. Tsakui nichxin kʼoasʼin nikjaʼaitsjeen nga tsín kʼoakoa̱nná kʼoasʼiaan jokisʼin Oseas. Tonga tsa tosi tonda koakoá nga chjí ʼyatokoán je kjoanda xi tsjoáná Jeobá kʼoa tsa ñaki kʼoakʼoé tokoán nga koasenkaoná kao nganʼiotsjele, tsakui nichxin kui xá tsjoáná xi tsín kuitjosonná maná tojo kisikao je Oseas (Mat. 19:26; Filip. 2:13).