ʼYáni xi koa̱nndosinle jme xi tínchja̱ni ibi
1. Jméni xi si̱kjaʼaitsjeen kʼianga bʼexkiaa je rebistaná kʼoa ánni.
1 Kʼianga satíonda jme xi faʼaitʼa je Xo̱n xi Bájinkonná kʼoa kao ¡Despertad! kuenta ma ngatsʼi chjota xi tjín jngo tjíjtsa Sonʼnde. Kʼoa kuinga kʼoasikji nkjín koya xi faʼaitʼasíni. Kʼianga bʼexkiaa je rebistaná nʼio ndatjín nga ni̱kjaʼaitsjeen ʼyáni xi koa̱nndosinle nga jngó jngó koya jme xi faʼaitʼa kʼoa tsjoá kui chja̱kaoñá je chjota.
2. Jñá kʼanile xi faʼaitʼa je rebistaná xi koa̱nndosinle je chjota.
2 Kʼianga bʼexkiaa je Xo̱n xi Bájinkonná kuenta sʼiaan tsakui tínchja̱ni jmeni xi jesa kichobayañá kao jngo chjota xi ñatje̱n nixá, kʼoa tsakui tínchja̱ni xi koa̱nndosinle jngo xíngiaa xi jetjínle familia. Kʼoa tsa ʼyaxkoaan jngo chjota xi chʼin tjínle, kuenta sʼiaan tsakui tínchja̱ni je ¡Despertad! Kʼoati sakʼoa kui nchja̱ni je rebistaná xi bakinle tsa ya si̱káyoaa ya jña negosio tjín kʼoa tsa yaje̱ jña tjío chjota xi xá tjínle. Tobʼelañá, tsakui tínchja̱ni tʼatsʼe kjoatsʼen xi tjín ndʼaibi, koaan koanngínkjayolee jolani tsa je polisía. Kʼoa tsakui tínchja̱ni je kjoa xi faʼatojin ʼndíchjotajchínga, koaan koanngínkjayoaa ya jñani makuinda.
3. Tʼeyanajmí jngui choa̱ xi bakó nga nʼio nda bichótsjoá nga kuikjoan fayolee chjota je rebista xi kui tínchja̱ni jme xi mandosinle.
3 Jósʼin bichótsjoá. Jngo ndsʼee kʼoa kao chjoónle xi ya naxinandá Sudáfrica tsʼe, kan aon ndʼiaskuela kinchja̱le teléfono nga jekichole je ¡Despertad! xi tsʼe sá octubre nó 2011 xi i̱ tsakʼin “Cómo criar hijos responsables” kʼoa kʼoakitsole tsa koa̱nmele. Kʼoa kanjao ndʼiaskuela koanjyole kʼoa yaa kisikʼabíle je xti xi ya kotʼaya. Ijngosa ndsʼee kʼoa kao chjoónle xi tiyani naxinandá jebi tsʼe xi kʼoati kisikáyo rebista jebi ya ndʼiaskuela xi kjio ya jñani tsoyason. Kʼoa tjínkʼa maestro xi ya kiskoenile je kjoafaʼaitsjen xi kitsoyale je xtiskuelale. Je ndsʼee kʼoa kao chjoónle, tsakʼéyanajmíle je superintendente xi tsʼe circuito, kʼoa je ndsʼee jebi kʼoakitsole je jtín xi ngikʼa nga kʼoati katasʼín. Je sucursal saʼnda tsakʼasjesa rebista jebi nga̱ nʼio nkjín kinijésale.
4. Ánni nga mesíniná nga ngisasa nʼio nkjín chjota katabʼéxkia je rebistaná.
4 Nga jao rebistaná kui tsoya jmeni xi chon sonʼnde ndʼaibi, ánni kʼoakjimasíni kʼoa jméni xi tsoyanile. Kʼoati basenkao je chjota nga katamakjainle xi tʼatsʼe Biblia kao xi tʼatsʼe Chjotaxále Niná. Xi ijngosani, tokui nga jao rebista jebi “xi kjoabitjontjai t[jío]tsoyason” (Is. 52:7). Kui xi mená nga ngisasa nʼio nkjín chjota katabʼéxkia. Kʼoa kʼianga kuitjosonná jebi machjénní nga chjónangilee yaoná: “ʼYáni xi koa̱nndosinle jme xi tínchja̱ni ibi”.