Ánni nga machjénsíni nga chótʼayá je Biblia
Je Biblia, kuiní libro xi ngisasa nʼio nkjín tíbʼabíson saʼnda ngasʼa. Kʼoa ji, a jesa tsakʼexkiai. Jokji tífaʼato nichxin, je én xi nya Biblia tjíosínʼio kon kʼoa tjíotsjoále kjoachoya je chjota xi tjín ngakjijnda Sonʼnde kʼoa tjíobinyakao kjoafaʼaitsjen xi ya nroatʼa. Tonga nkjínsa chjota xi kje bʼéxkiajin Biblia kʼoa tjío kʼa xi mele skoe̱ jotso, ninga relijión tjíojin kʼoa ninga mai. Kʼiatsa kje bʼexkiajin Biblia, je xo̱n jebi kui xá kisʼendani nga kuitsoyali jme én xi nya.
NGA kjesa chotʼajinjin jotso Biblia, machjén nga kataʼya choai xi tʼatsʼe. Je Biblia kʼoati Énle Niná ʼmi kʼoa jankan kaoni jaon libro tjínle. Je libro xi fitsʼiani Génesis ʼmi kʼoa xi fetʼani Apocalipsis (Revelación) ʼmi.
ʼYá tsʼe én xi nya je Biblia. Machjén nga jchaa xi tʼatsʼe jebi. Ñachanla chjota kiski kʼoa tsʼato xjaʼaonjngo siento nó koanjngoni. Je chjota xi kiski nijngojinla xi kʼoakitso tsa tsʼe én xi nroatʼa Biblia. Jngo xi i̱ kitso: “Ngayije xo̱n Escritura Niná jinroani” (2 Timoteo 3:16). Ijngosa xi kitso: “Nga nichxin kotse jaʼai je én xi tsakáyakonná, likuijin nga kʼoasʼin koanmele chjotasonʼnde. Tosa kinchjaya je chjota xi tsje tjío jatʼatsʼe Niná, josʼin kisiʼisenjin kjoafaʼaitsjenle je Espíritu Santo” (2 Pedro 1:21). Tojosítso én jebi, je chjota xi kiski Biblia kʼoakitso nga tsʼe Jeobá, je Niná xi batéxoma ngayeje, je én xi nya Biblia. Tiya Biblia kʼoatsoni kʼianga kui xá tsakájnaniná je Jeobá nga kataʼyaa xi tʼatsʼe.
Tonga kʼoati machjén nga kataʼyaa jmeni xi tínchjani ngayeje Biblia: Kui tínchjani nga jngo Rey sikʼéjna Niná ya ngʼajmi xi koako nga toje Niná xi tiʼndele koatexomale chjota. Yaa jchasai kjoaʼmiya xi fini nga kui tínchjani, fitsʼiakjoanni Génesis saʼnda Apocalipsis.
Jokji kʼuínkoai nga chótʼayai xo̱n jebi ali nichajinjin jme xi tínchjani ngayeje Biblia.