Je ʼNdenaxó xi kisicha Adán kao Eva

KʼIANGA kjesa síndajin chjota, je Niná tokʼoa je kjoatse kisinda ánkje. Tonga jngo ánkje xi yátsʼi̱n tsakasénle Niná, jé xi Satanás kʼoa Na̱i tsakʼin nga je koanni. Jé tsakʼanachale Eva nga kiskine je tole yá xi kʼoakitso Niná nga tsín koa̱n ski̱ne.

Je Na̱i jngo ye̱ kisichjén nga tsakjákao Eva kʼianga kʼoakitsole nga tse kjoanda tjíosícha jé kʼoa kao xʼinle xi totʼatsʼe Niná. Kʼoati kitsole nga tsín kuiyá tsakui ski̱ne tole yá jebi. Joxi kui kjoanni xi kitso nga chjotandiso je Niná. Je Na̱i kʼoakitsole nga nʼio tse xi koa̱njinle kʼoa nga koa̱n kʼoasʼin tojmeni xi mele kʼiatsa tsín sitjosonle Niná. Tonga ñaki to énndisoni. Kui énndiso jebi xi títjon kinokjoa. Je Na̱i joxi i̱ kjoanni kitso: A tiʼndele Niná nga je koatexoma ya ngʼajmi kao i̱ Sonʼnde. A kixi tjín kjoatéxomale. A nda kuiyoaa tsa je si̱tjosonlee.

Je Eva kiskaya je che̱nle Na̱i. Koanmele je tole yá xi kisatechjoale kʼoa chan kiskine. Xijekoan, kʼoati kitsjoale je xʼinle. Ali tsa tochoajin kjoa jebi, yátsʼi̱n tsakinyále je Niná xi kʼoasʼin kitsjoale kjoabijnachon xi ñaki nda kʼoa kao ngayeje jmeni xi kisʼele. Kʼoa nga kʼoakisʼin jée tsakajngi. Ali tsa tjíochjoangijin xko̱n nga kʼoakisʼin. Bení nga kjoatéxomale Niná tjíofaʼatone.

Je Niná kisijéle kuenta je Na̱i, je Adán kʼoa kao Eva tʼatsʼe jme xi kisʼin. Tonga títjon kʼoakitso nga jngo chjota sikasén je xi sikʼien ye̱ jebi, xi tsonile, je Na̱i. Xijekoan, kʼia kʼoakitsole Adán kao Eva nga kuiyá. Tonga je Niná koanmake je ntje̱le Adán kao Eva, kuinga tsín tokjoan kisikʼienni. Jmé kjoachoya xi kitsjoale Jeobá je ntje̱le Adán kao Eva. Je Jeobá tongini kʼoakitso kʼianga tjín xi sikasén xi kjoaʼaxin ngayeje kjoa xi tjín xi totʼatsʼe jme xi koan ya ʼndenaxóle Edén. Tonga ʼyáni xi kʼoasʼin sikasén xi kʼoasjentjai je chjotasonʼnde, kʼoa jósʼin sitjoson jme xá sikasénni je Niná. Jebi kʼia sa tsaʼya sa tsaʼyale kʼianga je ki nichxin, nga tíchji je Biblia.

Xijekoanni, je Niná tsakʼaonsjejin ya ʼNdenaxó je Adán kao Eva. Nga je tsín tiya tjíoni, je jé kisixáson nangi kʼoa kao ndásjueyale kisokoʼanile yaole. Kʼoa kʼiaa kitsin je Caín, je ʼndítjonle. Xijekoan, kisʼesale xtixʼin joni tsa Abel kʼoa kao Set kʼoa kao xtiyánchjín. Je Set chjotajchíngale koan Noé.

(Ya yʼangini Génesis kapítulo 3 saʼnda 5 kao Apocalipsis 12:9.)