Xo̱n xi síkasénná Cuerpo Gobernante

ʼNdíndsʼe kao ʼndítichja:

“Kʼoasʼin bʼailaijin kjoanda ngantsjai Niná xi tʼatsaon ngatsʼio. Nikjaʼaitsjenlaijin nga jon kʼia nga bʼetsʼoaijin. Ali kʼia nichajinjin nga nikjaʼaitsjenlaijin ngixko̱n Niná Nʼainá, jo nʼiao nga makjainno, josʼin nixáo nga tsjoachao, josʼin tjínno kjoatsejta nga choyalao Nainá Jesucristo.” (1 Tes. 1:2, 3.) Ñaki kʼoatjío tokuijin xi tʼatsaon tojo tso je én jebi. Nʼio bʼailaijin kjoanda je Jeobá xi tʼatsaon kʼoa nga kʼoasʼin nʼio nda tinixálao je Niná.

Je nó xi tífaʼato nʼio tibʼenelao yaono nga tibʼainganʼio tʼatsʼe xá xi kjima xi tsʼe Niná ngakjijnda Sonʼnde. Tifasjailao josʼin nga ngisa tse si̱xálao Niná. Tobʼelañá, tjínkʼa xi xin ʼnde kʼoa tsa xin naxinandá tjíofikatio ya jñani ngisa machjén xi jetsoyason. Tjínkʼa xi ya tjíotsoyason jñani nʼio tjín chjota. Nʼio nkjín xi precursor auxiliar sʼin kisixá kʼianga jaʼaitsjenya kjoabiyale Cristo, kʼianga kichosíxatʼa je jtín je superintendente xi tsʼe circuito kʼoa kʼianga tsʼabíson je tratado chjotse nga sá agosto nó 2014. Ningalani kjaʼaí kjaʼaí kjoa tibitjatojion nga jngó jngó, tonga nʼio tibʼenelao yaono nga tinixálao je Jeobá. Jótondani nga kʼoatinʼiao (Col. 3:23, 24). Nʼio bʼailaijin kjoanda je Nináná nga kʼoasʼin nʼio nda tinixáo.

Kʼoati nʼio bʼailaijin kjoanda je Niná nga kʼoasʼin kao kjoatsjoacha tinixálao nga tibʼainganʼio jñani tjíosʼenda ndʼia jñani ʼyaxkón Niná. Nga sa kjimankjín sa kjimankjín chjota ya jinnaxinandále Niná nʼio machjén ndʼia jebi (Is. 60:22). Je nó xi jaʼato 8,201,545 koanni xi jetsoyason kʼoa tsʼato 9,499,933 chjota tsakʼinyale Biblia nga xki̱ sá. Nga kʼoasikji kjimankjín chjota ya jinnaxinandále Niná machjén nga sʼe̱ndayanda kʼa sucursal. Kʼoa kʼoati nʼio nkjín Ndʼia jña chotʼayá machjén nga sʼe̱nda. Xi ijngosani, kʼoati nʼio nkjín naxinandá jñani sʼa sʼe̱nda ndʼia jña faʼatoya xo̱n xi Énle Niná nroatʼa, ánsíni nga je ndsʼee xi síkʼatoya ya koationi kʼoa ya sikʼatoya xo̱n xi Énle Niná nroatʼa ya ʼnde jñani nokjoa je énle.

Xi tʼatsʼe je xi kanikʼaxkiaa, jósʼin koa̱n kʼoainganʼioá. Tsakui nichxin tjínkʼa xíngiaa xi kʼoakoa̱nle nga koaitsjoánganʼio jñani sʼenda ndʼia jebi. Ninga tsín maná kʼoa ninga maná xá xi tsʼe chjinexjáo koaan kʼoainganʼioá ngatsʼiaa kao “tsojmichjí xi [tjínná]” (Prov. 3:9, 10). Nga kjesa sʼendajin je ndʼianajñole Jeobá, je chjota israelita nʼio nkjín tsojmi kichokao xi koanchjén kʼoa saʼnda kʼoatsakʼinle nga tsín titosi tonda katabichókaoni (Éx. 36:5-7). Je choa̱ jebi ñaki bichókajin ni̱ma̱ná kʼoa basenkaoná nga kʼoati sʼiaan tsanda ñá. ʼNdíndsʼe kao ʼndítichja, nga ʼyaijin nga kao kjoatsjoacha tinixálao je Niná nʼio bʼailaijin kjoanda je Jeobá.

Ijngosa koya xi kʼoati nʼio tsjoa bʼé tokuinjin kuinga nʼio nkjín ndsʼee xi tjíokale je kjoa xi tjíofaʼatojin. Tobʼelañá, saʼnda tjen nó 1950, je xti xi testigole Jeobá ma xi ya tsʼe ya Corea del Sur tjíochani ndoyá xi totʼatsʼe nga kixi tjíofitʼale Niná, kʼoa tjínkʼa xi nkjín nó kʼoa xi choa nó tjíonikatíonʼio. Nʼio nkjín je ndsʼee xi tsín tjíosíkinroajen kon kʼoa xi tjíokale xi tʼatsʼe kjoa jebi. Je choa̱ xi tjíobakó nʼio sítaja je kjoamakjainná.

Ya naxinandá Eritrea, jan ndsʼee xi jetsʼato kan nó tjíoʼya ndoyá. Kʼoa kʼoati tjíokʼa tichjaa xi kao xtiʼndíle kichani choatse ndoyá. Ninga nʼio tíbijnyisjaile nga koa̱n ndaí koatio, tojo kje sʼendajinjin. Ningalani kʼoakjima, je ndsʼee xi ya tsʼe tosi tonda kixi tjíofitʼale Niná. Ninga nʼio tse kjoa tjíofaʼatojin alikui yátsʼi̱n tjíobinyále Niná. Kʼoa tibʼetsʼoaníjin xi tʼatsʼe (Rom. 1:8, 9).

Alikui tsa tongatsʼio nga ndoyá tiyoʼyao xi totʼatsʼe kjoamakjainno. Tonga tiyo kʼao xi jejchíngao, xi chʼin tjíobʼetʼano, xi batiochjoano je xi xíngio xi tsín makjainle kʼoa tsakuije̱ kjoa tibitjatojion xi tojon ʼyao. Ninga kʼoalani, tosi tonda tinixálao je Jeobá (Sant. 1:12). Nʼio nda tinʼiao. Kʼoa kuinga kʼoati bʼainilaijin kjoanda je Jeobá nga tjíokano.

Nga nda tinixáo, nga kao kjoatsjoacha tinixálao Niná kʼoa nga tjíokano, kuinga nʼio bʼaisínilaijin “kjoanda je Jeobá, nga̱ nda chjota” (Sal. 106:1). ʼNdíndsʼe kao ʼndítichja nʼio tsjoachalaijin kʼoa bʼetsʼoantjailaijin nga je Jeobá katatsjoáno nganʼio kʼoa nga katasíchikontʼainno, ánsíni nga tosi tonda si̱xánilao ngantsjai nichxin.

Xi síkasénno xo̱n jebi jéní,

Cuerpo Gobernante xi tsʼe Testigole Jeobá